ទីក្រុងសេអ៊ូល៖ នៅទីបំផុត ប្រធានាធិបតីកូរ៉េខាងត្បូង លោកយូនស៊ុកយូល ត្រូវអាជ្ញាធរដោះលែងពីមន្ទីរឃុំឃាំងវិញហើយ។ ប៉ុន្តែមិនមែនមានន័យថាគាត់រួចខ្លួនពីការចោទប្រកាន់ទេ។ ដំណើរការសាកសួរ និងជំនុំជម្រះទោសគាត់ពាក់ព័ន្ធនឹងការប្រកាសច្បាប់អាជ្ញាសឹកនៅតែបន្តធ្វើនៅតុលាការធម្មនុញ្ញដដែល។ គ្រាន់តែថាគាត់មិនចាំបាច់ជាប់ឃុំ ហើយមិនចាំបាច់មានសមត្ថកិច្ចហែហមនៅពេលចូលស្ដាប់សវនាការ។
បន្ទាប់ពីដើរចេញពីបន្ទប់ឃុំឃាំងនៅជិតទីក្រុងសេអ៊ូល លោកយូនបានគ្រវីដៃឡើងទៅលើ។ ក្រោយមក គាត់ក្ដាប់ដៃជាប់ និងឱនគោរពបន្តិចទៅអ្នកគាំទ្ររបស់គាត់។ ពួកគេស្រែកហៅឈ្មោះគាត់ពេញៗមាត់ និងគ្រវីទង់ជាតិកូរ៉េខាងត្បូង និងអាមេរិក។ បន្ទាប់ពីសម្ដែងការគួរសមដាក់គ្នារួចហើយ លោកយូនក៏ឡើងជិះឡានពណ៌ខ្មៅក្រិបសំដៅទៅវិមានប្រធានាធិបតី។
តាមរយៈសេចក្ដីថ្លែងការណ៍ដែលផ្សព្វផ្សាយដោយមេធាវីរបស់គាត់ លោកយូនថ្លែងថាលោកសូមវាយតម្លៃខ្ពស់ចំពោះសេចក្ដីក្លាហានរបស់តុលាការដែលបានសម្រេចចិត្តដោះលែងរូបលោកឱ្យនៅក្រៅឃុំ។ លោកចាត់ទុកថាតុលាការធ្វើនេះជាការកែតម្រូវទង្វើឃុំខ្លួនលោកទាំងខុសច្បាប់ពីសំណាក់អាជ្ញាធរ។ លោកក៏សូមថ្លែងអំណរគុណចំពោះក្រុមអ្នកគាំទ្រផងដែរ។ ចំពោះអ្នកគាំទ្រលោកយ៉ាងប្ដូរផ្ដាច់ដល់ថ្នាក់បង្អត់អាហារខ្លួនឯងដើម្បីធ្វើកូដកម្មនោះសូមបញ្ឈប់សកម្មភាពត្រឹមនេះចុះ។
សូមរំលឹកថាកាលពីថ្ងៃសុក្រ តុលាការសាលាដំបូងកូរ៉េខាងត្បូងបានបង្គាប់ឱ្យសមត្ថកិច្ចដោះលែងលោកយូនស៊ុកយូលឱ្យនៅក្រៅឃុំតបតាមសំណើរបស់លោក។ តុលាការយល់ស្របតាមការលើកឡើងរបស់ក្រុមមេធាវីដែលថាការស៊ើបអង្កេតប្រធានាធិបតីកំពុងកាន់អំណាចបែបនេះមិនមែនជានីតិវិធីស្របច្បាប់ទេ។ មេធាវីចោទថាស្ថាប័នស៊ើបអង្កេតបានឃុំខ្លួនលោកយូនស៊ុកយូលតាំងពីមិនទាន់ទទួលបានដីការបស់តុលាការទៅទៀត។ ដូច្នេះខ្វះនីត្យានុកូលភាព (ឬភាពស្របច្បាប់)។
ការសម្រេចដោះលែងលោកយូនស៊ុកយូលបន្ទាប់ពីអាជ្ញាធរខ្ជិលតវ៉ាវែងឆ្ងាយទៅសាលាឧទ្ធរណ៍ជាបន្តទៀត។ ដូច្នេះសុខចិត្តទទួលយកសេចក្ដីសម្រេចរបស់សាលាដំបូង និងដោះលែងគាត់ឱ្យនៅក្រៅឃុំទៅចុះ។ ប៉ុន្តែគណបក្សប្រជាធិបតេយ្យសេរីដែលជាបក្សប្រឆាំងធំជាងគេនៅកូរ៉េខាងត្បូងមិនសុខចិត្តនឹងរឿងនេះទេ។ ពួកគេរិះគន់រដ្ឋអាជ្ញាដែលមិនព្រមប្ដឹងទាស់៕
ចែករំលែកព័តមាននេះ