រាជធានីភ្នំពេញ ៖ ជីវិតពិតជាមិនទៀងមែន បុរសចំណាស់ម្នាក់ កំពុងជិះម៉ូតូតាមផ្លូវ ស្រាប់តែមានរថយន្តក្រុង ១គ្រឿង បើកស្របគ្នាក្នុងល្បឿនលឿន ទៅដល់កៀរពីក្រោយ បណ្ដាលឲ្យដួលខ្ទាតចូលក្រោមកង់រថយន្តនោះ…
រាជធានីភ្នំពេញ ៖ ជីវិតពិតជាមិនទៀងមែន បុរសចំណាស់ម្នាក់ កំពុងជិះម៉ូតូតាមផ្លូវ ស្រាប់តែមានរថយន្តក្រុង ១គ្រឿង បើកស្របគ្នាក្នុងល្បឿនលឿន ទៅដល់កៀរពីក្រោយ បណ្ដាលឲ្យដួលខ្ទាតចូលក្រោមកង់រថយន្តនោះ កិនបែកក្បាលស្លា.ប់ភ្លាមៗនៅនឹងកន្លែង បន្ទាប់មក រថយន្តបង្កបានបើកគេចបាត់ដោយសុវត្ថិភាព ។
ឧប្បត្តិហេតុនោះ បានកើតឡើងកាលពីវេលាម៉ោង៤និង៤០នាទីល្ងាច ថ្ងៃទី០៧ ខែមីនា ឆ្នាំ២០២៥ នៅតាមផ្លូវ៥០ម៉ែត្រ ស្ថិតនៅក្នុងសង្កាត់ចោមចៅទី២ ខណ្ឌពោធិ៍សែនជ័យ រាជធានីភ្នំពេញ ។
បុរសរងគ្រោះ ឈ្មោះ សៀក អៀង អាយុជាង៦០ឆ្នាំ មុខរបរជាមេការសំណង់ មានស្រុកកំណើត នៅឃុំកោះអន្លង់ចិន ស្រុកស្អាង ខេត្តកណ្ដាល។ ចំណែករថយន្តបង្ក ជារថយន្តក្រុង មិនចាំស្លាកលេខឡើយ ។
ស្ត្រីអ្នកលក់ចង្រិតបំពងម្នាក់ បាននិយាយថា នៅមុនពេលកើតហេតុ នាងបានឃើញបុរសរងគ្រោះ ជិះម៉ូតូ១គ្រឿងម៉ាក Honda Scoopy ពណ៍ប្រផេះ ពាក់ស្លាកលេខ ភ្នំពេញ 1JA-8184 ។ ធ្វើដំណើរតាមផ្លូវខាងលើ ក្នុងទិសដៅពីកើតទៅលិច លុះពេលទៅដល់ត្រង់ចំណុចកើតហេតុ ខណៈដែលជនរងគ្រោះ កំពុងជិះយឺតៗល្មម ស្រាប់តែមានរថយន្តក្រុងដឹកអ្នកដំណើរ១គ្រឿង មិនចាំម៉ាក និងស្លាកលេខ បើកបរស្របគ្នា ក្នុងល្បឿនលឿន ទៅដល់កៀរដៃចង្កូតម៉ូតូពីក្រោយ ។
នាងបានបញ្ជាក់ប្រាប់ឲ្យដឹងបន្ថែមទៀតថា ខណៈនោះ បានបណ្តាលឲ្យម៉ូតូដួលមកខាងឆ្វេងដៃ ហើយខ្ទាតបុរសរងគ្រោះ ចូលក្រោមកង់រថយន្តក្រុងនោះ កិនបែកក្បាលស្លា.ប់ភ្លាមៗនៅនឹងកន្លែង ក្បែរម៉ូតូរបស់គាត់តែម្ដង។ បន្ទាប់មក រថយន្តបង្ក មិនបានឈប់នោះទេ ក្រោយពីបានដឹងថា បើកកិនមនុស្សស្លា.ប់ហើយ អ្នកបើកបរក៏បានបន្ថែមល្បឿន កាន់តែលឿនគេចបាត់ស្រមោល ។
ក្រោយកើតហេតុ នគរបាលប៉ុស្តិ៍ចោមចៅទី២ និងនគរបាលខណ្ឌពោធិ៍សែនជ័យ បានចុះទៅពិនិត្យ និងស្រាវជ្រាវរកឃាត់រថយន្តបង្កខាងលើ ប៉ុន្តែភ្លាមៗ នៅពុំទាន់មានតម្រុយពីរថយន្តនោះនៅឡើយទេ។ បន្ទាប់មក នគរបាលបានស្វះស្វែងរកក្រុមគ្រួសារសាច់ញាតិជនរងគ្រោះ ដើម្បីទៅទទួលយកសព ទៅធ្វើបុណ្យតាមប្រពណី ៕
ចែករំលែកព័តមាននេះ