ខេត្តស្ទឹងត្រែង ៖ ប្រជាពលរដ្ឋដែលអះអាងចំពោះសមត្ថកិច្ចបានលើកឡើងថា ការចូលកាប់ទន្ទ្រានដីព្រៃសហគមន៍យកធ្វើជាកម្មសិទ្ធិ បានចំណាយពេលឥតប្រយោជន៍ប្រឈមទោសទាន់ផ្លូវច្បាប់ និងពុំមានអាជ្ញាធរទទួលស្គាល់ ឬជំនាញផ្ដល់សិទ្ធិកាន់កាប់ស្របច្បាប់នោះឡើយ។ ដូចនេះ ពួកគាត់បានលះបង់គំនិតពីការចូលលុកលុយកាត់ទន្ទ្រានដីព្រៃសហគមន៍ទៅចុះឈ្មោះដាក់ពាក្យស្នើសុំដីធ្លីស្របតាមគោលនយោបាយរបស់ប្រមុខរាជរដ្ឋាភិបាលផ្ដល់ដីការពារព្រៃ ។
លោកហ៊ុន សំអឿន នាយផ្នែករដ្ឋបាលព្រៃឈើថាឡាបរិវ៉ាត់បានលើកឡើងថា គម្រោងរេដបូកមេគង្គ នៃជំហាន១ ស្ទឹងត្រែងអនុវត្តបានលទ្ធផលយ៉ាងល្អប្រសើរ បន្ទាប់ពីមានការចុះផ្សព្វផ្សាយជាបន្តបន្ទាប់ទៅដល់មូលដ្ឋានផ្ទាល់ និងការចុះទប់ស្កាត់អំពីសកម្មភាពនៃការចូលកាប់ទន្ទ្រានកាន់កាប់ដោយខុសច្បាប់ព្រមទាំងចុះកំណត់ព្រំប្រទល់ទីតាំងដីព្រៃសហគមន៍ផងដែរ ។
លោកបន្តថា មន្ត្រីជំនាញបានរួមសហការអាជ្ញាធរមូលដ្ឋានសហគមន៍ និងបណ្ដាអង្គភាពពាក់ព័ន្ធពន្យល់ណែនាំអំពីសារប្រយោជន៍នានាដែលទទួលបានពីព្រៃសហគមន៍ទៅដល់ប្រជាពលរដ្ឋដែលចូលកាត់ទន្ទ្រានដីព្រៃសហគមន៍ខុសច្បាប់ចាកចេញអំពីបទល្មើសនិងទោសទាន់ផ្សេងៗ ។ ពួកគាត់ក៏បានយល់ដឹងនិងស្ម័គ្រចិត្តប្រគល់ដីជូនរដ្ឋថែរក្សាវិញដែលមាន៤១គ្រួសារ មានផ្ទៃដីចំនួន១២០ហិកតា.៨១អារ ។
ហើយងាកទៅរកដាក់ពាក្យតាមបណ្ដាឃុំស្រុក ដើម្បីចុះឈ្មោះស្នើសុំដីធ្លីលើទីតាំងដែលប្រមុខរាជរដ្ឋាភិបាលបានរៀបចំគោលនយោបាយផ្ដល់ដីការពារព្រៃជូនជាស្រេច ស្ថិតនៅចំណុចអូរសេវ ក្នុងស្រុកសេសាន ។ លោក ហ៊ុន សំអឿន នាយផ្នែករដ្ឋបាលព្រៃឈើថាឡាបរិវ៉ាត់បានបញ្ជាក់ថា តាមរយៈគម្រោងរេដបូកមេគង្គមានរយៈពេល៣ឆ្នាំ២០២៤-២០២៦ ។
ហើយឆ្នាំ២០២៧ យើងចាប់ផ្តើមលក់កាបូន រហូតដល់៣០ឆ្នាំ អនុវត្តទៅ១៤សហគមន៍ព្រៃឈើក្នុងខេត្តស្ទឹងត្រែង ដោយការប៉ាន់ប្រមាណឥណទានកាបូនមានចំនួន ៣៥០,០០០តោន (២០២៤-២០២៦) គម្រោងនេះ នឹងជួយកាត់បន្ថយការកាប់បំផ្លាញព្រៃឈើ ការរេចរឹលព្រៃឈើ សំណឹកដី ល្បឿនលំហូរទឹក និងការហូរច្រោះដី ហើយតំបន់ទីជម្រាលក្នុងតំបន់នោះនឹងត្រូវបានជះឥទ្ធិពលជាវិជ្ជមានដល់ការរស់នៅក្បែរដងទន្លេមេគង្គ និងប្រព័ន្ធអេកូឡូស៊ី។
ដើម្បីធានាជីវភាពរស់នៅប្រកបដោយនិរន្តរភាព និងបង្កើនប្រាក់ចំណូល សម្រាប់សហគមន៍មូលដ្ឋានដែលចូលរួមតាមរយៈការលើកកម្ពស់សហគ្រាសព្រៃឈើ និងការអភិវឌ្ឍន៍អេកូទេសចរណ៍ក្នុងសហគមន៍ផងដែរ ។ លោកក៏បានលើកឡើងទៀតថា ចំពោះផ្ទៃដីដែលមានដកហូត តាមដីការរបស់តុលាការនិងដីដែលប្រជាពលរដ្ឋប្រគល់ជូនរដ្ឋដោយស្ម័គ្រចិត្តនោះ គម្រោងរេដបូក និងដាំដើមឈើឡើងវិញ ដើម្បីបង្កើនឥណទានកាបូនបន្ថែមទៀត ។
ក្នុងនាម ជំនាញរដ្ឋបាលព្រៃឈើនៃខណ្ឌរដ្ឋបាលព្រៃឈើស្ទឹងត្រែង សូមអំពាវនាវដល់ប្រជាជនទាំងអស់ សូមជួយថែរក្សាការពារព្រៃឈើ ជាពិសេស ការពារព្រៃសហគមន៍ក្នុងខេត្តស្ទឹងត្រែង ដើម្បីរក្សាជាព្រៃលំហែរ ដើម្បីជាការទាក់ទាញភ្ញៀវទេសចរ និងលក់កាបូនទៅទីផ្សារអន្តរជាតិទទួលបានប្រាក់ចំណូលបង្កើតកំរិតជីវភាពសហគមន៍មូលដ្ឋានផងដែរ ៕
ចែករំលែកព័តមាននេះ