រាជធានីភ្នំពេញ ៖ នៅក្នុងកិច្ចសម្ភាសន៍មួយកាលពីថ្ងៃទី៣០ មិថុនា លោកចាន់ យុត្ថា អគ្គលេខាធិការអាជ្ញាធរទន្លេសាប និងជាអ្នកនាំពាក្យឱ្យក្រសួងធនធានទឹកនិងឧតុនិយមបានថ្លែងថា ដើម្បីអភិវឌ្ឍន៍លើគោលនយោបាយអនុត្តរភាពធារាសាស្ត្ររបស់សម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា រដ្ឋាភិបាលជប៉ុនបានសម្រេចផ្តល់គ្រឿងចក្រចំនួន១១៥គ្រឿងដល់ក្រសួងធនធានទឹក និងឧតុនិយម ដែលមានតម្លៃសរុបចំនួន១១លានដុល្លារអាមេរិក ។
លោកចាន់ យុត្ថា បញ្ជាក់ថា ក្នុងចំណោមគ្រឿងចក្រទាំង១១៥គ្រឿងនោះ បច្ចុប្បន្នបានដឹកមកដល់ចំនួន៥១គ្រឿងហើយ សល់ពីនោះនឹងដឹកមកជាបន្តបន្ទាប់នៅដំណាច់ខែកក្កដា ឬដើមខែសីហា ខាងមុខនេះយ៉ាងយូរបំផុត ។នៅពេលគ្រឿងចក្រទាំងនោះដឹកមកដល់កម្ពុជាគ្រប់ចំនួនហើយ ពិធីប្រគល់និងទទួលគ្រឿងចក្រនេះ នឹងត្រូវរៀបចំធ្វើឡើងរវាងស្ថានទូតជប៉ុន និងក្រសួងធនធានទឹកនិងឧតុនិយម ។ បន្ទាប់មក ក្រសួងនឹងធ្វើការបែងចែកគ្រឿងចក្រទាំងនោះទៅតាមតំបន់ចំនួន៥ ស្មើៗគ្នា គឺ១-រាជធានីភ្នំពេញ និងខេត្តកណ្តាល ២-ខេត្តឧត្តរមានជ័យ ៣-ខេត្តបាត់ដំបង ៤-ខេត្តតាកែវ និង៥-ខេត្តស្វាយរៀង ដើម្បីឱ្យខេត្តទាំងនោះយកទៅបម្រើការងារអភិវឌ្ឍន៍ធារាសាស្ត្រ ពីព្រោះបច្ចុប្បន្ន ហេដ្ឋារចនាសម្ព័ន្ធធារាសាស្ត្រនៅក្នុងប្រទេសកម្ពុជាមិនទាន់ក្លាយជាធារាសាស្ត្រដែលមានលក្ខណៈគ្រប់ជ្រុងជ្រោយនៅឡើយទេ ។
លោកចាន់ យុត្ថា មានប្រសាសន៍ថា គ្រឿងចក្រទាំងនោះមានដូចជា អេស្កាវ៉ាទ័រ ប៊ុល ដូហ្សែ៊រ រថយន្តបែន នីវឺលឺ រឡូបង្ហាប់ដី រថយន្តដឹកទឹក ដឹកគ្រឿងចក្រ សាហ្សឺ និងរថយន្តជាងសម្រាប់ជួសជុលផងដែរ ៕
ចែករំលែកព័តមាននេះ