ហ្វេសបុក តិកតក់ … ជាដើមមិនមែនជាសមត្ថកិច្ច ឬជាតុលាការទេ ប៉ុន្តែមហាជនមួយចំនួននៅតែច្រឡំ ហើយពួកគេកំពុងតែប្រើប្រាស់វាតាមរបៀបនោះនៅពេលដែលមានបញ្ហា ។ នេះមិនមែនជាដំណោះស្រាយឡើយ សូមនាំគ្នាប្រើប្រាស់ច្បាប់…
ហ្វេសបុក តិកតក់ … ជាដើមមិនមែនជាសមត្ថកិច្ច ឬជាតុលាការទេ ប៉ុន្តែមហាជនមួយចំនួននៅតែច្រឡំ ហើយពួកគេកំពុងតែប្រើប្រាស់វាតាមរបៀបនោះនៅពេលដែលមានបញ្ហា ។ នេះមិនមែនជាដំណោះស្រាយឡើយ សូមនាំគ្នាប្រើប្រាស់ច្បាប់ និងយន្តការសង្គមដែលមាន ។
និន្នាការសង្គមកម្ពុជាសព្វថ្ងៃនេះ គឺបែបនោះពលរដ្ឋជាច្រើននៅពេលដែលមានបញ្ហា គឺពួកគេតែងតែប្រើប្រាស់បណ្តាញសង្គមចែករំលែកភ្លាមៗនូវអ្វីដែលពួកគេមានបញ្ហា ហើយក៏មានអ្នកបញ្ចេញយោបល់អាកាត់ភ្លាមៗថា រឿងនេះវាគួរធ្វើបែបនេះ រឿងនោះវាគួរធ្វើបែបនោះ ។ ពួកគេសព្វថ្ងៃនេះ មិនសូវប្រើប្រាស់យន្តការច្បាប់ទេ គឺប្រើប្រាស់បណ្តាញសង្គមនេះតែម្តង សូម្បីតែរឿងគ្រោះថ្នាក់ចរាចរណ៍ រឿងជម្លោះផ្ទៃក្នុងគ្រួសារ រឿងជម្លោះរកស៊ី រឿងជម្លោះជិតខាង រឿងជម្លោះនៅក្នុងរឿងភេទសម្ព័ន្ធ និងរឿងរ៉ាវជាច្រើនទៀត ។
គ្រប់គ្នានៅក្នុងយុគសម័យឌីជីថល គឺមានសិទ្ធិផ្សព្វផ្សាយ មានសិទ្ធិបញ្ចេញយោបល់ ឬទស្សនៈ ប៉ុន្តែកុំចេះអារកាត់នរណាខុសនរណាត្រូវពីព្រោះយើងទាំងអស់គ្នាមិនមានមូលដ្ឋានច្បាប់ មិនមែនជាសមត្ថកិច្ចឬមន្ត្រីជំនាញឡើយ ដូច្នេះសូមទុកឲ្យអ្នកជំនាញគេដោះស្រាយ ។ ហើយជំនាញទៀតសោត ក៏គួរតែប្រើប្រាស់ច្បាប់ជាគោលកុំយកផលប្រយោជន៍ យកបក្សពួក យកបនភឿន ឬយកមេកើយ ហើយកិច្ចកែបន្លែបន្លំយកច្បាប់មកសំអាងខុសនិតិវិធីដែរ ។
ពាក់ព័ន្ធនឹងបញ្ហាទាំងអស់នេះ សូម្បីតែសម្តេចមហាបវរធិបតី ហ៊ុន ម៉ាណែត ប្រមុខរដ្ឋាភិបាលកម្ពុជាក៏បានចាប់អារម្មណ៍ផងដែរ ហើយសម្តេចក៏បានធ្វើការអំពាវនាវកុំឲ្យប្រជាពលរដ្ឋយកបញ្ហាតូចៗរបស់បុគ្គលទៅបំប៉ោងឲ្យធំនៅតាមបណ្ដាញសង្គម ។ សម្តេចក៏បានស្នើឲ្យមហាជននៅពេលដែលមានបញ្ហាគួរតែនាំគ្នាជជែកដោះស្រាយដោយសន្ដិវិធី ។
ថ្លែងកាលពីរសៀលថ្ងៃទី៥ ខែមីនា ឆ្នាំ២០២៥នេះ ក្នុងឱកាសអញ្ជើញជាអធិបតីប្រារព្ធទិវាវប្បធម៌ជាតិ ៣មីនា លើកទី២៧ និងទទួលទានភោជនាអាហារជាមួយតំណាងសិល្បករទូទាំងប្រទេស នៅមជ្ឈមណ្ឌលពិព័រណ៌ និងសន្និបាតកោះពេជ្រ សម្តេចធិបតី បានរំលឹករឿងរ៉ាវករណីគ្រោះថ្នាក់បន្ដិចបន្តួច តែព្យាយាមតេហៅអ្នកនេះអ្នកនោះ ឬក៏ផ្សាយផ្ទាល់ពីទីនោះធ្វើឲ្យរឿងកាន់តែធំ ។
សម្ដេចមហាធិបតី បានអំពាវនាវឲ្យពលរដ្ឋប្រើប្រាស់នូវអភិក្រម «មានបញ្ហាត្រូវរួមគ្នាដោះស្រាយ» កុំឲ្យមហាជនលើបណ្ដាញសង្គមជួយដោះស្រាយ ។ សម្តេចបានបន្តថា នៅពេលនេះដោយម្នាក់ៗអាងតិកតក់ និងហ្វេសប៊ុកខ្លះ មានរឿងអីបន្តិចបន្តួចផ្សាយផ្ទាល់ៗ ។ ម្ខាងៗគិតតែយកឈ្នះរៀងៗខ្លួន ទីបំផុតរឿងតូចក៏អាចក្លាយជារឿងធំ ។
សម្តេចបានផ្តល់អនុសាសន៍ថា នៅពេលមានបញ្ហានៅនឹងមុខគួរនិយាយគ្នា ដោះស្រាយបញ្ហាងាយ ។ ប៉ុន្តែដោយសារយើងមិននិយាយគ្នា យើងទាញហ្វេសប៊ុករៀងៗខ្លួនមកជះកំហឹង ។ សម្តេចបានអំពាវនាវដល់ប្រជាពលរដ្ឋ ដោះស្រាយបញ្ហាដោយសន្ដិវិធី កុំព្យាយាមផ្សាយផ្ទាល់នៅលើបណ្ដាញសង្គមដែលធ្វើឲ្យបញ្ហាកាន់តែក្ដៅលើសដើម ហើយអ្នកមើលរាប់ពាន់នាក់អត់ដឹងទេ ។
នេះ គឺជាសាររបស់ប្រមុខរដ្ឋាភិបាល ហើយការលើកឡើងនេះ គឺកញ្ចក់មួយបង្ហាញថា ស្ថានភាពសង្គមរបស់យើង គឺនៅក្នុងស្ថានភាពបែបនេះ ។ ដូចនេះគួរតែនាំគ្នាយល់ពីបញ្ហា ហើយព្យាយាមដោះស្រាយដោយសន្តិវិធី ដោយប្រើប្រាស់ច្បាប់ជាគោល ។ កាលណាសង្គមដែលប្រើប្រាស់ច្បាស់ជាគោល សង្គមនឹងក្លាយជា សង្គមមួយដែលមានបែបបទ ត្រឹមត្រូវមានអរិយធម៌ មានភាពស៊ីវិល័យ និងសណ្តាប់ធ្នាប់សង្គមប្រសើរ ។ ប៉ុន្តែប្រសិនបើយើងចេះតែអាងនេះអាងនោះ សង្គមនឹងមើលទៅរញ៉េរញ៉ៃ រស់នៅជាមួយនឹងវប្បធម៌អាង ។ ច្បាប់ គឺជាមូលដ្ឋាន និងមាត្រាដ្ឋានកំណត់ភាពត្រឹមត្រូវសម្រាប់គ្រប់សមាជិកសង្គមទាំងអស់ មិនថា នរណាជានរណាឡើយ ។
សង្គមដែលប្រើប្រាស់ច្បាស់ជាគោល គឺពិតជាច្រកចេញមួយដ៏ប្រសើរសម្រាប់គ្រប់គ្នា ។ សង្គមយើងសព្វថ្ងៃនេះមានច្បាប់មានទម្លាប់ច្រើនណាស់ ដូច្នេះយើងគួរតែរៀនស្វែងយល់ពីច្បាប់ ហើយលើកកម្ពស់ការអនុវត្តតាមច្បាប់ឲ្យបានខ្ជាប់ខ្ជួន ។ ច្បាប់ គឺជាឯកសារគតិយុទ្ធសម្រាប់គ្រប់គ្នា ហើយក៏ជាដែនកំណត់ភាពត្រឹមត្រូវរបស់បុគ្គលម្នាក់ៗ ៕
ចែករំលែកព័តមាននេះ