ខេត្តសៀមរាប ៖ ទំនាស់ក្នុងវង់ផឹកស៊ីយកកាំភ្លើងកែច្នៃបាញ់ច្រឡំ បណ្តាលឱ្យមន្ត្រីភ្នាក់ងារអភិរក្ស ប្រាសាទអាជ្ញាធរអប្សរាម្នាក់ស្លាប់ ហើយត្រូវបានកម្លាំងកងរាជអាវុធហត្ថមូលដ្ឋានស្រុកស្វាយលើចាប់ខ្លួនបញ្ជូនទៅការិយាល័យជំនាញនៃកងរាជអាវុធហត្ថខេត្តសៀមរាបចាត់ការបន្តតាមនីតិវិធីច្បាប់ ហើយបញ្ជូនបន្តទៅតុលាការខេត្តសៀមរាបចាត់ការតាមផ្លូវច្បាប់ ។
បើតាមប្រភពពីកម្លាំងកងរាជអាវុធហត្ថខេត្តសៀមរាបបានប្រាប់ នៅព្រឹកថ្ងៃទី៦ មីនា ឆ្នាំ២០២៥ នេះថា ក្រោយពីបានទទួលព័ត៌មានថា មានករណីឃាតកម្មនៅក្នុងភូមិសាស្ត្រស្រុកស្វាយលើ ដែលកើតឡើងនៅវេលាម៉ោង២០និង ៤៥នាទីយប់ថ្ងៃទី០៤ ខែមីនា ឆ្នាំ២០២៥ ស្ថិតនៅចំណុចផ្ទះរបស់ឈ្មោះ ឌុក សូត្រ ក្នុងភូមិថ្មជ្រួញ ឃុំខ្នងភ្នំ ស្រុកស្វាយលើ ខេត្តសៀមរាប បង្កឡើងដោយជនសង្ស័យបានធ្វើសកម្មភាពដោយយកកាំភ្នើងកែច្នៃ (កាំភ្លើងឆ្នុក) បាញ់ច្រឡំទៅលើជនរងគ្រោះពីក្រោយ ពេលកំពុងអង្គុយផឹកស៊ីជុំគ្នានៅផ្ទះបងប្អូន ហើយត្រូវបានមិត្តភក្តិ និងបងប្អូន ខណៈពេលបញ្ជូនទៅដល់មណ្ឌលសុខភាពខ្នងភ្នំបណ្តាលឱ្យស្លាប់។
ប្រភពបន្ថែមថា ជនរងគ្រោះដែលស្លាប់មាន ឈ្មោះ ឌុក ឌឿម ភេទប្រុស អាយុ៥០ឆ្នាំ មុខរបរភ្នាក់ងារអភិរក្សប្រាសាទអាជ្ញាធរអប្សរា រស់នៅភូមិអន្លង់ធំ ឃុំខ្នងភ្នំ ស្រុកស្វាយលើ ខេត្តសៀមរាប ។ សូមបញ្ជាក់ថា ករណីឃាតកម្មនេះ បានកើតឡើងនៅវេលាម៉ោង២២យប់ថ្ងៃទី០៤ មីនា ឆ្នាំ២០២៥ ស្ថិតនៅចំណុចផ្ទះរបស់ឈ្មោះឌុក សូត្រ ក្នុងភូមិអន្លង់ធំ ឃុំខ្នងភ្នំ ស្រុកស្វាយលើ ខេត្តសៀមរាប ។
ប្រភពបញ្ជាក់ថា ដោយមានកម្លាំងកងរាជអាវុធហត្ថមូលដ្ឋានស្រុកស្វាយលើ ចូលរួមចំនួន០៥នាក់ រថយន្ដ០១គ្រឿង ដឹកនាំសហការណ៍ជាមួយកម្លាំងការិយាល័យព្រហ្មទណ្ឌ ដឹកនាំដោយលោកអនុសេនីយ៍ឯក សៀក សោភា នាយការិយល័យព្រហ្មទណ្ឌ ចុះស្រាវជ្រាវស្វែងរកជនសង្ស័យជាប់ពាក់ព័ន្ធករណីខាងលើ ។
លុះនៅវេលាម៉ោង០៦ និង៥០នាទីព្រឹកថ្ងៃទី០៥ ខែមីនា ឆ្នាំ២០២៥ រហូតឃាត់ខ្លួនបានជនសង្ស័យឈ្មោះ លឹម វ៉ាន់ ភេទប្រុស អាយុ២០ឆ្នាំ ទីលំនៅបច្ចុប្បន្នភូមិថ្មជ្រួញ ឃុំខ្នងភ្នំ ស្រុកស្វាយលើ ខេត្តសៀមរាប នៅត្រង់ចំណុចដូនអ៊ិន ភូមិសក្ដា ឃុំបឹងមាលា ស្រុកស្វាយលើ ខេត្តសៀមរាប រួចបញ្ជូនយកមកសួរនាំ នៅការិយាល័យព្រហ្មទណ្ឌ នៃកងរាជអាវុធហត្ថខេត្តសៀមរាប ដើម្បីរៀបចំកសាងសំណុំរឿងបញ្ជូនបន្តទៅកាន់តុលាការខេត្តចាត់ការតាមនីតិវិធី ។
ប្រភពបន្ថែមទៀតថា ក្រោយឃាត់ខ្លួនបានជនសង្ស័យ កម្លាំងជំនាញធ្វើការដកហូត វត្ថុតាងរួមមាន៖
១.កាំភ្លើងកែច្នៃ ចំនួន០១ដើម ប្រវែង១,៥៨ម៉ែត្រ ។ ២.គ្រាប់បាដាងកង់ ចំនួន០៦គ្រាប់ ។ ៣.គីបផាវ ចំនួន០៥សាង (ស្មើនឹង៣៩ គ្រាប់) ។ ៤.ស្រកីដូង ចំនួន០១ដុំ ។ ៥.រំសេវចំនួន០១កំប៉ុង ។
ចំពោះមូលហេតុៈ ជនសង្ស័យមានជម្លោះជាមួយឈ្មោះ ភឿន ផិត ខណៈឈ្មោះ ភឿន ផិត បានវាយរូបខ្លួននឹងកៅអីចំនួន០២កៅអី ធ្វើឱ្យខ្លួនមានកំហឹងក៏បានទៅផ្ទះយកកាំភ្លើងកែច្នៃមកបាញ់ ប៉ុន្ដែពុំបាន ដឹងថា រូបខ្លួនបាញ់ច្រឡំចំទៅលើឈ្មោះ ឌុក ឌឿម បណ្តាលឱ្យស្លាប់នោះទេ ។
បច្ចុប្បន្ន កម្លាំងមូលដ្ឋានស្រុកស្វាយលើ បានប្រគល់ជនសង្ស័យ និងវត្ថុតាងខាងលើទៅឱ្យកម្លាំងកងរាជអាវុធការិយាល័យជំនាញ ខេត្តសៀមរាប ដើម្បីចាត់ការបន្តរួចរៀបចំកសាងសំណុំរឿងបញ្ជូនបន្តទៅកាន់តុលាការខេត្តចាត់ការតាមនីតិវិធីច្បាប់ ៕
ចែករំលែកព័តមាននេះ