ក្រោយផ្ទុះការរិះគន់រហូតដល់ផ្អើលថ្នាក់ដឹកនាំរបស់ប្រទេសករណីសម្តីនិយាយនៅសាធារណៈរបស់ពិធីករប្រដាល់គុនខ្មែរទៅលើនារីលើកស្លាកសញ្ញាឲ្យទឹកដែលផ្ទុះនៅដើមសប្តាហ៍នេះ គឺជាសារព្រមានមួយថា រឿងពាក់ព័ន្ធនឹងស្ត្រី គឺជារឿងដែលរសើបបំផុតមួយក្នុងចំណោមរឿងដ៏រសើបផ្សេងៗទៀតដូចជា រឿងទាក់ទងកុមារ រឿងឯកជនភាព រឿងទាក់ទងផ្លូវភេទ សុខភាព ជាតិសាសន៍ សាសនា…
ក្រោយផ្ទុះការរិះគន់រហូតដល់ផ្អើលថ្នាក់ដឹកនាំរបស់ប្រទេសករណីសម្តីនិយាយនៅសាធារណៈរបស់ពិធីករប្រដាល់គុនខ្មែរទៅលើនារីលើកស្លាកសញ្ញាឲ្យទឹកដែលផ្ទុះនៅដើមសប្តាហ៍នេះ គឺជាសារព្រមានមួយថា រឿងពាក់ព័ន្ធនឹងស្ត្រី គឺជារឿងដែលរសើបបំផុតមួយក្នុងចំណោមរឿងដ៏រសើបផ្សេងៗទៀតដូចជា រឿងទាក់ទងកុមារ រឿងឯកជនភាព រឿងទាក់ទងផ្លូវភេទ សុខភាព ជាតិសាសន៍ សាសនា និងសន្តិសុខជាតិជាដើម ។
រឿងពាក់ព័ន្ធនឹងស្ត្រី មិត្តអ្នកអានបានឃើញឥទ្ធិពលរបស់វាហើយ ក្រោយផ្ទុះប្រតិកម្មដោយមហាជនអ្នកលេងបណ្តាញសង្គម និងអ្នកសិល្បៈជាបន្តបន្ទាប់ ក្រោយពេលដែលពិធីកររបស់ស្ថានីយ៍ទូរទស្សន៍មួយដែលបានប្រើប្រាស់ពាក្យសម្តីមិនសមរម្យទៅកាន់នារីដែលជាអ្នកលើកស្លាកទឹក នៅក្នុងកម្មវិធីប្រដាល់មួយនោះ ។
រូបភាពវីដេអូមួយ ត្រូវបានគេបង្ហោះលើបណ្តាញសង្គម ដោយបានបង្ហាញពីការនិយាយបែបលេងសើចជាមួយក្បាលមេក្រូទៅលើនារីដែលជាអ្នកលើកស្លាកទឹក នៅចំពោះមុខមនុស្សម្នាជាច្រើនរយនាក់ ដែលកំពុងទស្សនាកម្មវិធីប្រដាល់ ។
ពិធីករទូរទស្សន៍រូបនោះបាននិយាយលេងទៅកាន់នារីលើកទឹកថា «និយាយលេងសើចអី លេខ១នេះ (ទឹកទី១)ទំនងណាស់ ហើយបងប្អូនយល់ថា លេខ១នេះពីក្រោយ ឬពីមុខទំនងជាង? សម្រាប់ខ្ញុំ គឺយកខាងក្រោយហើយ ព្រោះខាងក្រោយទំនងជាង» ។
តាមរយៈវីដេអូជាមួយការប្រើពាក្យពេចន៍ខាងលើនេះ ត្រូវបានមហាជនជាអ្នកលេងបណ្តាញសង្គមផ្ទុះប្រតិកម្ម និងចេញរិះគន់យ៉ាងខ្លាំងទៅលើពិធីកររូបនេះ ខណៈពេលពួកគេចាត់ទុកថា ការនិយាយលេងសើចមួយនេះ គឺមិនសមរម្យនោះឡើយ ។ រឿងនេះផ្ទុះការរិះគន់រហូតដល់រដ្ឋមន្ត្រីក្រសួងព័ត៌មាន កោះហៅពិធីកររូបនេះមកបំភ្លឺ និងឲ្យសូមទោស ហើយលោកឧបនាយករដ្ឋមន្ត្រី និងរដ្ឋមន្ត្រីក្រសួងមហាផ្ទៃ ក៏បានចេញមកប្រតិកម្មតាមសំណេរនៅលើបណ្តាញសង្គម ។ មិនតែប៉ុណ្ណោះ សម្តេចធិបតី ហ៊ុន ម៉ាណែត នាយករដ្ឋមន្ត្រីក៏បានចេញមកប្រតិកម្មផងដែរ ។
សម្តេចធិបតី បានលើកឡើងថា ការថ្លែងដោយសាធារណៈបែបនេះ ទោះជាចេតនា ឬអចេតនា គឺវាបានធ្វើឲ្យប៉ះពាល់យ៉ាងខ្លាំងដល់អារម្មណ៍ក៏ដូចជា សេចក្តីថ្លៃថ្នូររបស់អ្នកដទៃ ។ សម្តេចក៏បានអំពាវនាវឲ្យពលរដ្ឋ ជាពិសេស គឺយុវជនប្រើប្រាស់ពាក្យសម្តីជាមួយនឹងអ្នកដទៃដោយការគោរពទៅវិញទៅមក និងប្រកាន់ខ្ជាប់នូវសីលធម៌ គុណធម៌ និងសេចក្តីថ្លៃថ្នូររបស់ខ្មែរឲ្យស័ក្តិសមជាប្រជាពលរដ្ឋដែលរស់នៅក្នុងសង្គមស៊ីវិល័យ ។
តាមរយ:បទពិសោធន៍នេះ មនុស្សគ្រប់គ្នាត្រូវចេះប្រយ័ត្នសម្តី សំណេរ និងមាតិកាដែលប៉ះពាល់ដល់សេក្តីថ្លៃថ្នូររបស់អ្នកដទៃ ពិសេសស្ត្រី ។ ទន្ទឹមនោះ យើងគ្រប់គ្នាក៏ត្រូវចៀសវាងផងដែរការនិយាយស្តី ការសរសេរ និងការផលិតមាតិកាដែលធ្វើអោយប៉ះពាល់ដល់សិទ្ធិឯកជនដូចជា បញ្ហាផ្លូវភេទ សុខភាព បញ្ហាទាក់ទងកុមារ បញ្ហាទាក់ទងជាតិសាស៍ និងសាសនា ព្រមទាំងសន្តិសុខជាតិ ។
ខណ:ដែលច្បាប់បានចែងអំពីសេរីភាពនៃការបញ្ចេញមតិ និងសេរីភាពសារព័ត៌មាននោះ ច្បាប់ក៏បានចែងផងដែរថា រាល់ការបញ្ចេញមតិមិនត្រូវធ្វើអោយប៉ះពាល់ដល់សិទ្ធិឯកជន សិទ្ធិស្ត្រី សិទ្ធិកុមារ ជាតិសាសន៍ សាសន៍ និងសន្តិសុខជាតិជាដើម ។
នៅពេលដែយើងគ្រប់គ្នាមានសិទ្ធិយ៉ាងទូលំទូលាយ វាមានភាពចាំបាច់ដែលយើងត្រូវដឹងថា ច្បាប់ប្រទេសកម្ពុជា បានកំណត់រាល់ការបញ្ចេញមតិ គឺដើរទន្ទឹមនឹងការទទួលខុសត្រូវផ្នែកច្បាប់ ។
ដូច្នេះ នៅពេលយើងនិយាយ សរសេរ និងផលិតមាតិកាផ្សេងៗទៀត តាមបណ្តាញសង្គម យើងមិនត្រូវធ្វើអោយប៉ះពាល់ដល់សេចក្តីថ្លៃថ្នូរ និងកិត្តិយសរបស់អ្នកដទៃ មិននាំអោយមានការររើសអើង ឬជម្លោះជាតិសាសន៍ និងសាសនា ហើយសំខាន់ជាងនេះមិនធ្វើអោយប៉ះពាល់ដល់សន្តិសុខជាតិ ។ តាមរយ:ការធ្វើដូច្នេះ យើងលើកកម្ពស់សេរីភាពនៃការបញ្ចេញមតិប្រកបដោយការទទួលខុសត្រូវ ហើយយើងចូលរួមកសាងប្រទេសកម្ពុជាអោយក្លាយជានីតិរដ្ឋដែលជាសេចក្តីប្រាថ្នារបស់យើងទាំងអស់គ្នា ៕
ចែករំលែកព័តមាននេះ