សហរដ្ឋអាមេរិក ៖ នៅ​ទីបំផុត កំពូល​អ្នក​កីឡាកាស John Cena បាន​ផ្លាស់​ប្តូរ​១៨០​ដឺ​ក្រេ ក្លាយទៅជា​តួអង្គ​ចិត្តអាក្រក់ (Heel) ជា​លើក​ដំបូង​រយៈពេល​ជាង​២៣​ឆ្នាំ នៃ​អាជីព​ជា​អ្នក​កីឡាកាស WWE អ្នកគាំទ្រ ពិសេស​កុមារ​តូច​ៗ បង្ហាញ​អារម្មណ៍​ខកចិត្ត​ខ្លាំង ចំពោះ​អាយ​ដល (Idol) ដ៏​ល្អ​តាំងពី​ដើម​របស់​ពួក​គេ​។

ប្រភព​ពី BBC និង​Today News កាលពី​ថ្ងៃ​ទី​៤ ខែមីនា ឆ្នាំ​២០២៥ បានឱ្យ​ដឹង​ថា កំពូល​អ្នក​កីឡាកាស John Cena ម្ចាស់​ខ្សែ​ក្រា​វាត់​ពិភពលោក​១៦​សម័យកាល ដែល​កាលពី​ខែកក្កដា ឆ្នាំ​មុន បាន​ប្រកាស​អំពី​គម្រោង​ចូល​និវត្តន៍​ពី​អាជីព​កីឡា​ចំបាប់​នៅ​ឆ្នាំ​នេះ កាលពី​ពេល​ថ្មី​ៗ​នេះ បាន​ត្រឡប់​មក​សង្វៀន​ប្រកួត​សា​ជា​ថ្មី ក្រោយ​បាត់​មុខជា​យូរ ពោល​ក្នុង​កម្មវិធី WWE Elimination Chamber​។ ប៉ុន្តែ​ការ​មក​លើក​នេះ អ្នកគាំទ្រ​ដែល​ទស្សនា​ផ្ទាល់ និង​ជុំវិញ​ពិភពលោក​ភ្ញាក់ផ្អើល និង​ខកចិត្ត​ជា​ខ្លាំង ដោយ​អ្នក​កីឡាកាស​និមិត្តរូប​នៃ​តួអង្គ​ចិត្តល្អ​របស់​ពួក​គេ បែរ​ក្លាយទៅជា​តួអង្គ​ចិត្តអាក្រក់ ដោយ​បាន​វាយ​អ្នក​កីឡាកាស Cody Rhodes ហើយ​ចូល​ដៃ​គ្នា​ចូល​ជើង​ជាមួយ​កំពូល​អ្នក​កីឡាកាស The Rock ព្រមទាំង​តារា​រ៉េ​ប​ដ៏​ល្បី​របស់​អា​មេ​រិ​ក Travis Scott​។

អំឡុង​ពេល The Rock, Travis Scott និង Cody Rhodes ប៉ះពារ​សម្តី​គ្នា Cena បាន​ឈរ​អបអរ​នៅ​ពីក្រោយ Rhodes​។ បន្ទាប់​មក​អ្នក​កីឡាកាស​វ័យ​៤៧​ឆ្នាំ​រូប​នេះ បាន​ឱប Rhodes ប៉ុន្តែ​ពេល​ឱប​គ្នា​នោះ ស្នាមញញឹម Cena ប្រែជា​បង្ហាញ​ភាព​ជា​តួអង្គ​អាក្រក់ មុន​ពេល​វាយ Rhodes ដួល​សន្លប់​ធ្វើ​ឱ្យ​អ្នក​ទស្សនា​ភ្ញាក់ផ្អើល​ជា​ខ្លាំង​។ អ្នកគាំទ្រ​ខ្លះ​លើក​ឡើង​ថា John Cena ជា​តួអង្គ​ចិត្តល្អ​តាំងពី​ដើម ចុង​ក្រោយ​ប្រកាស​ចូល​និវត្តន៍​នៅ​ឆ្នាំ​នេះ ស្រាប់តែ​គេ​ឱ្យ​ដើរតួ​អង្គ​ចិត្តអាក្រក់​ទៅ​វិញ​។

សូម​ជម្រាប​ថា John Cena បាន​ចុះ​កិច្ចសន្យា​ជាមួយ WWE ក្នុង​ឆ្នាំ​២០០១ និង​បង្ហាញខ្លួន​លើក​ដំបូង​នៅ​ឆ្នាំ ២០០២ និង​ក្រោយមក​បាន​ចាប់​អាជីព​ជា​តារា​សម្តែង​នៅ​ក្នុង​ឆ្នាំ​២០០៦​។ អំឡុង​អាជីព​ក្នុង WWE អ្នក​កីឡាកាស​វ័យ​៤៧​ឆ្នាំ​រូប​នេះ បាន​ឈ្នះ​ខ្សែក្រវាត់​គ្រប់​ប្រភេទ​ជា​ច្រើន ពិសេស​ខ្សែក្រវាត់​ទម្ងន់​ធ្ងន់​ពិភពលោក​រហូត​ដល់​១៦​សម័យកាល​។ អាជីព​សម្តែង John Cena ទទួល​បានការ​គាំទ្រ​យ៉ាង​ខ្លាំង តាម​រយៈ​ការ​សម្តែង​ក្នុង​កម្មវិធី​ទូរទស្សន៍ និង​ខ្សែភាពយន្ត​ជា​ច្រើន រួម​ទាំង The Suicide Squad និង Fast & Furious 9 និង X ដ៏​ល្បីល្បាញ​ខ្លាំង​បំផុត​ជាដើម​៕