ប្រទេសចិន ៖ អ្នកចូលរួមរត់ម៉ារ៉ាតុងរាប់រយនាក់ នៅឯព្រឹត្តិការណ៍ Suzhou Marathon ឆ្នាំ ២០២៥ នៅក្នុងប្រទេសចិន កំពុងតែស្ថិតក្រោមការស៊ើបអង្កេតពាក់ព័ន្ធរឿងបត់ជើងតូចនៅទីសាធារណៈ…
ប្រទេសចិន ៖ អ្នកចូលរួមរត់ម៉ារ៉ាតុងរាប់រយនាក់ នៅឯព្រឹត្តិការណ៍ Suzhou Marathon ឆ្នាំ ២០២៥ នៅក្នុងប្រទេសចិន កំពុងតែស្ថិតក្រោមការស៊ើបអង្កេតពាក់ព័ន្ធរឿងបត់ជើងតូចនៅទីសាធារណៈ រួមទាំងលើផ្លាកឈ្មោះសាលារៀន ដើមផ្កា និងសួនច្បារនៅតាមដងផ្លូវ។
រូបថតជាច្រើនត្រូវបានចែកចាយលើប្រព័ន្ធផ្សព្វផ្សាយសង្គមយក្សចិន Weibo បង្ហាញអំពីអ្នករត់មួយក្រុមកំពុងបត់ជើងតូចលើផ្លាកឈ្មោះសាលារៀនមួយ នៅជិតបន្ទាត់ចាប់ផ្តើមការត់។ បុគ្គលិកសាលាបានបញ្ជាក់ពីហេតុការណ៍នេះ ហើយបាននិយាយថា ពួកគេនឹងរាយការណ៍ទៅកាន់អាជ្ញាធរ។ រូបមួយទៀតថតជាប់អ្នករត់៣នាក់ កំពុងបត់ជើងតូចលើដើមផ្កា ខណៈដែលដើរត្រឹមតែមួយជំហានប៉ុណ្ណោះ ដល់បង្គន់ចល័តមួយនៅជិតនោះ ដែលគណៈកម្មការរៀបចំបង្គន់ចល័តរាប់រយនៅតាមផ្លូវ។
ទង្វើអសីលធម៌ទាំងនេះ ទទួលរងការរិះគន់យ៉ាងខ្លាំងលើបណ្តាញសង្គម ដោយមតិភាគលើកឡើងមិនខុសគ្នាថា តើបន្ទាន់ពេក ឬខ្វះការយល់ដឹងជាសាធារណៈ និងបានអំពាវនាវឱ្យមានការផាកពិន័យ ឬដាក់បម្រាមធ្ងន់ធ្ងរផងដែរ។ នៅទីក្រុងស៊ូចូវ (Suzhou) ភាគខាងត្បូងខេត្តជាំងស៊ូ (ជាំងស៊ូ) ការបត់ជើងតូចជាសាធារណៈគឺខុសច្បាប់ ហើយត្រូវផ្តន្ទាទោសពិន័យជាប្រាក់ចំនួន១ពាន់យន់ ឬ ១៣៧ដុល្លារអាមេរិក។
ការិយាល័យកីឡាក្រុង និងអ្នករៀបចំបានបើកការស៊ើបអង្កេត ដោយពិនិត្យមើលរូបភាពពីកាមេរ៉ាសុវត្ថិភាព និងភស្តុតាងផ្សេងទៀតពីបណ្តាញសង្គម ដើម្បីកំណត់អត្តសញ្ញាណអ្នកបំពាន។ ក្នុងសេចក្តីថ្លែងការណ៍មួយ អាជ្ញាធរ និងអ្នករៀបចំបានថ្កោលទោសយ៉ាងខ្លាំងចំពោះអាកប្បកិរិយានេះ និងបានជំរុញឱ្យសាធារណជនផ្តល់រូបថត និងវីដេអូបន្ថែមទៀត។ សេចក្ដីថ្លែងការណ៍បានសរសេរថា «យើងបានជូនដំណឹងដល់នាយកដ្ឋានពាក់ព័ន្ធ និងចាប់ផ្តើមការស៊ើបអង្កេត។ យើងមានបំណងអនុវត្តបទប្បញ្ញត្តិកាន់តែតឹងរ៉ឹង និងបង្កើនការត្រួតពិនិត្យ ដើម្បីលើកកម្ពស់វប្បធម៌ការគោរពក្នុងជាតិសាសន៍របស់នាពេលអនាគត»។
ការបត់ជើងតូចជាសាធារណៈ អំឡុងព្រឹត្តិការណ៍រត់ធំៗ មិនមែនជាបញ្ហាថ្មីក្នុងប្រទេសចិននោះទេ។ ភាពចម្រូងចម្រាសស្រដៀងគ្នានេះ បានកើតឡើងអំឡុងព្រឹត្តិការណ៍រត់ម៉ារ៉ាតុងទីក្រុងប៉េកាំងឆ្នាំ ២០១៣ (Beijing Marathon 2013) នៅពេលបង្គន់អនាម័យមិនគ្រប់គ្រាន់ ជាហេតុនាំជញ្ជាំងសាធារណៈជាច្រើនកន្លែងពោរពេញដោយដាមទឹកនោម។ ចាប់តាំងពីពេលនោះមក អ្នករៀបចំព្រឹត្តិការណ៍រត់ម៉ារ៉ាតុងបានបន្ថែមចំនួនបង្គន់ចល័ត នៅតាមដងផ្លូវរត់។ ប៉ុន្តែទោះបីជាយ៉ាងណាក៏ដោយ ការបត់ជើងតូចតាមទីសាធារណៈពីអ្នកចូលរួមរត់នៅតែបន្តឃើញដដែលជាដដែល។
សូមជម្រាបថា ព្រឹត្តិការណ៍ Suzhou Marathon គឺជាការរត់ម៉ារ៉ាតុងប្រចាំឆ្នាំដ៏ធំបំផុតមួយរបស់ប្រទេសចិន ដែលត្រូវបានបញ្ជាក់ជាផ្លូវការដោយសហព័ន្ធអត្តពលកម្មចិន និងរៀបចំដោយរដ្ឋាភិបាលក្នុងតំបន់ ខណៈដែលព្រឹត្តិការណ៍នៅឆ្នាំនេះ បានទាក់ទាញអ្នកចុះឈ្មោះរត់បម្រាណជាង ១៦០,០០០នាក់ឯណោះ៕ ដកស្រង់ ៖ VnExpress
<<កំណត់សម្គាល់: រាល់ការបញ្ចេញមតិទៅលើអត្ថបទមិនមែនជាការទទួលខុសត្រូវរបស់កោះសន្តិភាពទេ។ វាជាការទទួលខុសត្រួវដោយផ្ទាល់របស់អ្នកបញ្ចេញមតិ។ ដូច្នេះ សូមមិត្តអ្នកអានទាំងអស់ ធ្វើការបញ្ចេញ មតិប្រកបដោយការទទួលខុសត្រូវ មានសីលធម៌ និង ប្រកបដោយន័យស្ថាបនា ហើយចៀសវាង ការបញ្ចេញមតិណាដែលមិនពិត ជេរប្រមាថ និង អុជអាល នាំដល់ការយល់ច្រឡំ ឬ ការរើសអើង ជាតិសាសន៍ សាសនា ឬក៏ បុគ្គលណាមួយ។>>
ចែករំលែកព័តមាននេះ