ពលរដ្ឋខ្មែរត្រូវតែប្រុងប្រយ័ត្នជំងឺបួន ដែលសាហាវ ហើយផ្ទុះកំណើនខ្លាំងបំផុតនៅកម្ពុជាយើង ។ ជំងឺទាំងនោះ គឺជំងឺទឹកនោមផ្អែម មហារីក ជំងឺផ្លូវចិត្ត និង សម្ពាធឈាមខ្ពស់…
ពលរដ្ឋខ្មែរត្រូវតែប្រុងប្រយ័ត្នជំងឺបួន ដែលសាហាវ ហើយផ្ទុះកំណើនខ្លាំងបំផុតនៅកម្ពុជាយើង ។ ជំងឺទាំងនោះ គឺជំងឺទឹកនោមផ្អែម មហារីក ជំងឺផ្លូវចិត្ត និង សម្ពាធឈាមខ្ពស់ ។
ថ្លែងនៅក្នុងសន្និសីទសារព័ត៌មាន ស្តីពីសន្និបាតសុខាភិបាល លើកទី៤៤ លោកវេជ្ជបណ្ឌិត ឡូ វាសនាគីរី រដ្ឋលេខាធិការក្រសួងសុខាភិបាល បាននិយាយថា ជំងឺដែលមិនឆ្លងទាំងនេះ មានកំណើនគួរឲ្យបារម្ភមែនទែន ។ លោកបានឲ្យដឹងថា កាលពីឆ្នាំ២០២៤ បើតាមការកត់ត្រាករណីជំងឺទឹកនោមផ្អែមថ្មី សរុបមានចំនួនរហូតដល់ទៅ២៣០.២៧៩ ត្រូវបានធ្វើរោគវិនិច្ឆ័យដោយកើនឡើងដល់ទៅ៥៩ភាគរយឯណោះ ។
ដោយឡែក ជំងឺមហារីកវិញ អ្នកជំងឺចំនួន៣១.៥១៨នាក់បានទទួលការព្យាបាល នៅមន្ទីរពេទ្យ កាលពីឆ្នាំមុនកើនឡើងរហូតដល់ទៅ៨៧,៤២ ភាគរយ ហើយអ្នកស្លា.ប់មានរហូតដល់ចំនួន១២៧នាក់ ត្រូវបានកត់ត្រាទុក ។
លោកវេជ្ជបណ្ឌិត បាននិយាយថា ប្រភេទមហារីកទូទៅបំផុត គឺមហារីកសុដន់ដែលមានចំនួន២០,៤ភាគរយនៃករណីទាំងអស់ ហើយមហារីកមាត់ស្បូនមានចំនួន១១,៥ភាគរយ ។
ដោយឡែកសម្រាប់ករណីនៃជំងឺផ្លូវចិត្តវិញ លោកវេជ្ជបណ្ឌិត បានកត់ត្រាប្រមាណជា២៨២.៦១៥ នាក់ កាលពីឆ្នាំមុនកើនឡើងដល់ទៅ១៩៧,៨ ភាគរយ បើធៀបនឹងឆ្នាំមុន ។ លោកវេជ្ជបណ្ឌិត ក៏បានបន្ថែមថា ជំងឺលើសឈាមក៏កំពុងកើនឡើងផងដែរ ដោយមានករណីចំនួន៤០១.៩៣៦នាក់ ត្រូវបានរាយការណ៍ កាលពីឆ្នាំមុន កើនឡើង២១,៤ ភាគរយ ។
ដោយឡែកករណីជំងឺឆ្លងដូចជា មេរោគអេដស៍ក៏មានការកើនឡើងដែរ នៅឆ្នាំ២០២៤ ។ ចំនួនអ្នកផ្ទុកមេរោគអេដស៍ ដែលបានទទួលថ្នាំប្រឆាំងមេរោគអេដស៍បានកើនឡើងដល់៦៩.៦៩៤នាក់ កាលពីឆ្នាំមុន ពោល គឺកើនឡើងប្រហែល៣ភាគរយធៀបនឹងឆ្នាំមុន ។
ពាក់ព័ន្ធនឹងជំងឺទាំងនេះ និងស្ថានភាពសុខភាពជារួមនៅកម្ពុជា លោកវេជ្ជបណ្ឌិត ឈាង រ៉ា រដ្ឋមន្ត្រីក្រសួងសុខាភិបាលបានជំរុញ និងស្នើឲ្យមន្ត្រីសុខាភិបាលគ្រប់រូបបំពេញភារកិច្ចជាតួអង្គសំខាន់ ដើម្បីសុខភាពរបស់ប្រជាជន ។ លោករដ្ឋមន្ត្រីបានលើកឡើងថា ការកើនឡើងនូវពពួកជំងឺមិនឆ្លងទាំងនេះ គឺជាកត្តាតម្រូវឲ្យក្រុមគ្រូពេទ្យ និងវេជ្ជមណ្ឌិតកម្ពុជាកាន់តែទាមទារជំនាញ និងវិជ្ជាជីវៈកាន់តែប្រសើរឡើងថែមទៀត ដើម្បីរ៉ាប់រងជំងឺទាំងនេះ ។
លោកបានបន្តថា ក្រសួងកំពុងតែលើកកម្ពស់កម្រិតនៃការព្យាបាលនៃជំងឺទាំងនេះដល់កម្រិតមូលដ្ឋាន ពោល គឺពង្រីកឲ្យដល់កៀក និងចំតម្រូវការកន្លែងដែលត្រូវការ ហើយក្រុមគ្រូពេទ្យក៏ត្រូវតែផ្តល់នូវសេវាដែលពលរដ្ឋកក់ក្តៅ ។
ក្រៅពីនោះ លោកបានបន្តទៀតថា ក្រសួងក៏កំពុងតែយកចិត្តទុកដាក់ពង្រឹងសេវាអប់រំលើកកម្ពស់សុខភាព សេវាបង្ការ ព្យាបាលថែទាំ ដែលគុណភាពត្រូវបានកែលម្អជាប្រចាំ និងអន្តរាគមន៍សុខភាពសាធារណៈសារវន្តតាមរយៈកម្មវិធីលើកកម្ពស់សុខភាពបន្តពូជ សុខភាពមាតា ទារក កុមារ និងអាហារូបត្ថម្ភ កម្មវិធីបង្ការ និងគ្រប់គ្រងជំងឺឆ្លង រួមទាំងប្រព័ន្ធសន្តិសុខសុខភាព និងកម្មវិធីជំងឺមិនឆ្លង និងបញ្ហាសុខភាពសាធារណៈដទៃទៀត ៕
ចែករំលែកព័តមាននេះ