ប្រទេស​អង់គ្លេស ៖ លោក Pep Guardiola អ្នកចាត់ការ​ទូទៅ​ក្រុម Manchester City បាន​ធ្វើការ​រិះគន់​គុណភាព​បាល់​ប្រើ​ក្នុង​ការ​ប្រកួត​ពានរង្វាន់ FA Cup ក្រោយ​កូនក្រុម​ស៊ុត​ខុស​គោលដៅ​រហូត​ដល់​២០​លើក (Off Target)​។

យោង​តាម​ប្រភព​ពី BBC ចេញផ្សាយ​នៅ​ថ្ងៃ​ទី​៣ ខែមីនា ឆ្នាំ​២០២៥ បានឱ្យ​ដឹង​ថា ការ​អត្ថាធិប្បាយ​អ្នកចាត់ការ​សញ្ជាតិ​អេ​ស្ប៉ា​ញ​វ័យ​៥៤​ឆ្នាំ​រូប​នេះ កាលពី​ថ្មី​ៗ​នេះ ក៏​មិន​ខុស​គ្នា​ពី​ការ​លើក​ឡើង​របស់​អ្នកចាត់ការ​ទូទៅ​ក្រុម​កាំភ្លើង​ធំ Arsenal លោក Mikel Arteta នៅ​ដើមរដូវ​កាល​នេះ ដែល​បាន​ចំអក​រឿង​គុណភាព​បាល់​ប្រើ​ក្នុង​ពានរង្វាន់ EFL Cup បន្ទាប់​ពី​ក្រុម​លោក​ចាញ់​ក្រុម​សារិកា​ព្រៃ Newcastle វគ្គ​ពាក់កណ្តាល​ផ្តាច់ព្រ័ត្រ​។

ក្រុម​មេឃ​ខៀវ Man City កាលពី​ថ្ងៃ​សៅរ៍​ស​ប្តា​ហ៍​មុន បាន​យកឈ្នះ​លើ​ក្រុម Plymouth មក​ពី​លី​គ​លំដាប់​ទី​២ Championship លទ្ធផល ៣-១ ការ​ប្រកួត​ជម្រុះ​ជុំ​ទី​៥ ពានរង្វាន់ FA Cup ដើម្បី​បន្ត​ឡើង​នៅ​វគ្គ​៨​ក្រុម​ចុង​ក្រោយ ដោយ​ត្រូវ​ប៉ះ​ក្រុម Bournemouth ប៉ុន្តែ​នៅ​ក្នុង​ការ​ស៊ុត​សំដៅ​ទី​សរុប​២៩​ជើង​របស់ Man City លើ​ក្រុម Plymouth ខុស​គោលដៅ​រហូត​ដល់​២០​លើក​ឯណោះ​។

លោក Pep សម្តែង​អារម្មណ៍​មិន​សប្បាយចិត្ត​ជាមួយ​គុណភាព​បាល់​របស់​ក្រុមហ៊ុន Mitre ដែល​ជា​ក្រុមហ៊ុន​ក្នុងស្រុក និង​បាន​និយាយ​ថា បាល់​ប្រើ​នៅ UEFA Champions League និង English Premier League គឺ​ពិសេស ប៉ុន្តែ​សម្រាប់​មួយ​នេះ​វិញ វា​ពិបាក​គ្រប់គ្រង​សម្រាប់​កីឡាករ​។ នៅ​ពេល​អ្នក​ចាញ់ ការ​និយាយ​បែប​នេះ គេ​មើល​មក​គឺជា​លេស ប៉ុន្តែ​ពិតមែន​បាល់​នេះ​មិន​ត្រឹមត្រូវ​ទេ​។ ក្នុង​រយៈពេល​ជា​ច្រើន​ឆ្នាំ រឿង​នេះ​បាន​កើតឡើង​ក្នុង​ការ​ប្រកួត FA Cup និង EFL Cup ខ្ញុំ​ដឹង​ថា​ជា​អាជីវកម្ម​ឬ​យ៉ាងណា​ទេ ហើយ​ពួក​គេ​បាន​ព្រមព្រៀង​គ្នា​។ អ្នកដឹង​ថា បាញ់​ប៉ុន្មាន​គ្រាប់​ហើយ ដែល​ស៊ុត​ខុស​គោលដៅ? សូម​មើលទៅ​ការ​ប្រកួត​ផ្សេង​ទៀត​»​។

សូម​ជម្រាប​ជូន​ថា បាល់​ក្រុមហ៊ុន Nike ត្រូវ​បាន​ប្រើ​ក្នុង​ការ​ប្រកួត English Premier League ចំណែក​បាល់​ប្រើ​ក្នុង​ការ​ប្រកួត​ពានរង្វាន់​ទ្វីបអឺរ៉ុប UEFA គឺជា​របស់​ក្រុមហ៊ុន Adidas ខណៈ​បាល់​របស់​ក្រុមហ៊ុន Puma ត្រូវ​បាន​ប្រើ​ក្នុង​ការ​ប្រកួត EFL Cup​។ ជា​ការ​ឆ្លើយ​តប​ទៅ​នឹង​ការ​អត្ថាធិប្បាយ​របស់​លោក Pep អ្នកនាំពាក្យ​សហព័ន្ធ​បាល់ទាត់​អង់គ្លេស​ថ្លែង​ថា «​បាល់ Ultimax Pro របស់ Mitre ដែល​ប្រើ​ក្នុង​ការ​ប្រកួត FA Cup និង​ការ​ប្រកួត​ទាំងអស់​ផ្សេង​ទៀត​របស់​សហព័ន្ធ បាន​ឆ្លងកាត់​ការ​ធ្វើតេស្ត​ដោយ​អនុលោម​តាម​ស្តង់ដា​សហព័ន្ធ​បាល់ទាត់​ពិភពលោក FIFA​។

អ្នកនាំពាក្យ​ដដែល​បន្ត​ថា «​បាល់​ទាំងអស់​ក្នុង​ការ​ប្រកួត​អាជីព តម្រូវ​ឱ្យ​បំពេញ​តាម​ស្តង់ដា​គុណភាព FIFA ហើយ​បាល់​មួយ​នេះ​បានការ​ទទួលស្គាល់​ត្រឹមត្រូវ និង​តម្រូវការ​ធ្វើតេស្ត​ទាំងអស់​។ យើង​យល់​ថា ចំណង់​ចំណូលចិត្ត​ផ្អែក​លើ​ទស្សនៈ​ផ្ទាល់ខ្លួន ប៉ុន្តែ​យើង​មាន​ទំនុកចិត្ត​ថា​បាល់​ដំណើរការ​បាន​ល្អ​ណាស់ ជាមួយ​ការ​ស៊ុត​បញ្ចូល​ទី​ច្រើន​ជាង ៣៥០​គ្រាប់​ក្នុង​ការ​ប្រកួត​ជម្រុះ​»៕ ប្រភព ៖ BBC