ក្រោយពីសម្រេចការទាក់ទាញភ្ញៀវទេសចរបរទេស សរុបបាន៦,៧លាននាក់ កាលពីឆ្នាំ២០២៤ ជាមួយនឹងកំណើន២៣ភាគរយធៀបនឹងឆ្នាំ២០២៣ ក្រសួងទេសចរណ៍បានដាក់គោលដៅទាក់ទាញភ្ញៀវទេសចរបរទេសឲ្យបាន៧,៥ លាននាក់ ។ នេះបើតាមការលើកឡើងដោយលោក ហួត ហាក់…
ក្រោយពីសម្រេចការទាក់ទាញភ្ញៀវទេសចរបរទេស សរុបបាន៦,៧លាននាក់ កាលពីឆ្នាំ២០២៤ ជាមួយនឹងកំណើន២៣ភាគរយធៀបនឹងឆ្នាំ២០២៣ ក្រសួងទេសចរណ៍បានដាក់គោលដៅទាក់ទាញភ្ញៀវទេសចរបរទេសឲ្យបាន៧,៥ លាននាក់ ។ នេះបើតាមការលើកឡើងដោយលោក ហួត ហាក់ រដ្ឋមន្ត្រីក្រសួងទេសចរណ៍ បានព្យាករណ៍កាលពីចុងខែកុម្ភៈ កន្លងទៅថ្មីៗនេះ ។
អ្នកវិភាគបានលើកឡើងថា នេះ គឺជាក្តីរំពឹងទុកដែលមិនសុទិដ្ឋិនិយមពេកនោះទេ គឺវាសមហេតុសមផលដែរ ហើយកាតាលីករមួយដែលនឹងរុញច្រានកម្ពុជាឲ្យដល់កំណត់នៃក្តីរំពឹងនេះចិននឹងរួមចំណែកដ៏មានសក្តានុពលមួយ ។
អ្នកវិភាគរូបនោះបានលើកឡើងថា នៅក្នុងចំណោមទីផ្សារទេសចរណ៍ធំៗរបស់កម្ពុជាទាំងអស់ដែលមានប្រទេសជិតខាងលោកខាងលិច និងអ្នកទេសចរចិន ។ លោកបានបន្តថា សម្រាប់ប្រទេសជិតខាងទំនោរនៃកំណើន និងការផ្លាស់ប្តូទេសចរណ៍ទៅវិញទៅមក គឺប្រក្រតី ដោយការតភ្ជាប់ព្រំដែន គឺទូលំទូលាយស្រាប់ ដូច្នេះហើយកម្ពុជាបានទទួលប្រហាក់ប្រហែល៤លាននាក់ទេ ។
លោកបានបន្ថែមទៀតថា សម្រាប់ភ្ញៀវទេសចរមកពីអឺរ៉ុប និងពិភពលោកខាងលិច ថ្វីត្បិតតែជាទីផ្សារល្អ ពួកគេចាយច្រើន តែយើងអាចខ្វះមធ្យោបាយនៅក្នុងការធ្វើទីផ្សារដោយសារខ្វះការតភ្ជាប់ទូលំទូលាយ ហើយច្រកដែលចូលមកពីភាគច្រើនតាមប្រទេសជិតខាង ។
ផ្អែកតាមកត្តានេះ អ្នកវិភាគរូបនោះបានលើកឡើងថា ចិន គឺជាគោលដៅ និងជាទីផ្សារដែលគួរគិតគូរឲ្យបានដិតដល់ ដោយសារតែកម្ពុជាមានទំនាក់ទំនងនយោបាយ ការទូត សេដ្ឋកិច្ច ហើយជាពិសេសនោះ គឺការតភ្ជាប់គ្នា គឺច្រើនគួរសម ។
មកដល់ពេលនេះ នៅក្នុងចំណោមព្រលានអន្តរជាតិ៤ ដែលអាចចុះចតបាននោះ គឺចិនកសាង និងប្រតិបត្តិការផ្ទាល់២កន្លែង គឺនៅសៀមរាប និងនៅខេត្តកោះកុង រីឯការតភ្ជាប់ជើងហោះហើរនោះក៏ទូលំទូលាយ ពោល គឺនៅក្នុងមួយសប្តាហ៍ៗមានការហោះហើរទៅវិញទៅមកប្រហាក់ប្រហែល២០ជើង ។
សក្តានុពលនៃទីផ្សារទេសចរណ៍ចិនក៏មិនត្រូវលោក ហួត ហាក់ ច្រានចោលដែរ ហើយលោកធ្លាប់បានលើកឡើងផងដែរថា កម្ពុជាគ្រោងនឹងទាក់ទាញភ្ញៀវទេសចរមកពីចិនឲ្យបានរហូតដល់១លាននាក់ ខណៈដែលនៅក្នុងឆ្នាំ២០២៤ កម្ពុជាអាចសម្រេចបានការទាក់ទាញប្រមាណជាជាង៨៤ម៉ឺននាក់ ជាមួយនឹងកំណើនប្រមាណជា៥៥ភាគរយរួចទៅហើយនោះ ។
ក្រៅពីរដ្ឋមន្ត្រីទេសចរណ៍ចេញ សូម្បីតែមេដឹកនាំប្រទេស ជាពិសេស គឺប្រមុខរាជរដ្ឋាភិបាល ព្រឹទ្ធសភា រដ្ឋសភា នៅពេលដែលជួបមេដឹកនាំចិនសំខាន់ៗក៏តែងតែរំលេច និងផ្សារភ្ជាប់ពីសក្តានុពលនៃការពង្រឹង និងពង្រីកការទាក់ទាញទេសចរពីចិនជាបន្តបន្ទាប់ផងដែរ ។
មកដល់ពេលនេះ ទេសចរណ៍ គឺជាសសរស្តម្ភមួយ ក្នុងចំណោមសសរស្តម្ភទាំងបួនដែលជួយដល់សេដ្ឋកិច្ចរបស់ប្រទេសកម្ពុជា បន្ថែមពីលើការនាំចេញសម្លៀកបំពាក់ កសិកម្ម អចលនទ្រព្យ និងសំណង់ ។
របាយការណ៍របស់ក្រសួងទេសចរណ៍បាននិយាយថា វិស័យទេសចរណ៍បានរួមចំណែកប្រហែលប្រមាណជា៩,៤ភាគរយដល់ផលិតផលក្នុងស្រុកសរុប (GDP) របស់ប្រទេសក្នុងឆ្នាំ ២០២៤ កើនឡើងពី ៧,៥ភាគរយកាលពីឆ្នាំមុន ដោយបន្ថែមថា វិស័យនេះបានបង្កើតការងារផ្ទាល់ចំនួន ជាង៥១ម៉ឺននាក់ ។
កាលពីឆ្នាំ២០២៤ កម្ពុជាទទួលចំណូលពីវិស័យទេសចរណ៍សរុបប្រមាណជា៣,៦៣ ពាន់លានដុល្លារ ហើយចិនបានរួមចំណែកទីផ្សារទេសចរណ៍កម្ពុជាប្រមាណជា១២,៧ភាគរយ ដូច្នេះចិនបាននាំយកលុយប្រមាណជាជាង៤៦០លានដុល្លារមកចាយនៅកម្ពុជារួចហើយ ។ នេះ គឺជាសក្តានុពលមួយ ហើយប្រសិនបើកម្ពុជាអាចបង្កើនការទាក់ទាញភ្ញៀវទេសចរពីចិនឲ្យកើនឡើងថែមទៀតចំណូលក៏កាន់តែប្រសើរ ។ ដូច្នេះយើងសង្ឃឹមថា យើងនឹងដុតដៃដុតជើងប្រើប្រាស់សក្តានុពលដែលយើងមានទាក់ទាញភ្ញៀវទេសចរចិន ។
កម្ពុជាយើងមានតំបន់បេតិកភណ្ឌពិភពលោកចំនួន៤ ដែលចុះក្នុងបញ្ជីបេតិកភណ្ឌពិភពលោករបស់អង្គការយូណេស្កូ រួមមានឧទ្យានបុរាណវិទ្យាអង្គរនៅភាគពាយព្យខេត្តសៀមរាបតំបន់ប្រាសាទសំបូរព្រៃគុកនៅខេត្តកំពង់ធំ និងប្រាសាទព្រះវិហារ និងតំបន់បុរាណវិទ្យាកោះកែរនៅភាគពាយ័ព្យនៃខេត្តព្រះវិហារ ។ ក្រៅពីនេះយើងនៅមានឆ្នេរដ៏ស្អាតមួយដែលលាតសន្ធឹងប្រវែងប្រហែល៤៥០ គីឡូម៉ែត្រ ក្នុងខេត្តភាគនិរតីចំនួន ៤ គឺខេត្តព្រះសីហនុ កំពត កែប និងកោះកុង ហើយទៅនោះក៏កំពុងតែទាក់ទាញគម្រោងទេសចរណ៍ធំៗពីចិនស្រាប់ ៕
ចែករំលែកព័តមាននេះ