កុំអាលច្រឡំនឹងចេតនារបស់រាជរដ្ឋាភិបាលលើរឿងការធ្វើសេចក្តីសម្រេចចិត្តបញ្ចប់កម្មវិធីមជ្ឈមណ្ឌលសិក្សាទំនើប នៅតាមសាលារៀនបឋមសិក្សា និងអនុវិទ្យាល័យជាមួយនឹងកម្មវិធីសាលាជំនាន់ថ្មីអោយសោះ ។ កាលពីថ្ងៃទី២៧ ខែកុម្ភៈ ឆ្នាំ២០២៥ សាធារណៈមតិបានផ្ទុះការរិះគន់ព្រោងព្រាតក្រោយពេលដែលសម្តេចធិបតី ហ៊ុន ម៉ាណែត…
កុំអាលច្រឡំនឹងចេតនារបស់រាជរដ្ឋាភិបាលលើរឿងការធ្វើសេចក្តីសម្រេចចិត្តបញ្ចប់កម្មវិធីមជ្ឈមណ្ឌលសិក្សាទំនើប នៅតាមសាលារៀនបឋមសិក្សា និងអនុវិទ្យាល័យជាមួយនឹងកម្មវិធីសាលាជំនាន់ថ្មីអោយសោះ ។ កាលពីថ្ងៃទី២៧ ខែកុម្ភៈ ឆ្នាំ២០២៥ សាធារណៈមតិបានផ្ទុះការរិះគន់ព្រោងព្រាតក្រោយពេលដែលសម្តេចធិបតី ហ៊ុន ម៉ាណែត ប្រមុខរាជរដ្ឋាភិបាលកម្ពុជាប្រកាសបញ្ចប់កម្មវិធីមជ្ឈមណ្ឌលសិក្សាទំនើបព្រោះតែរាជរដ្ឋាភិបាលមិនចង់ឃើញស្តង់ដារពីរនៅក្នុងប្រព័ន្ធអប់រំ ជាពិសេស គឺនៅតាមសាលារៀននៅក្នុងប្រទេស ។
រឿងនេះផ្ទុះការរិះគន់ជាច្រើនដោយសារតែសាធារណៈមតិយល់ច្រឡំរវាងកម្មវិធីអប់រំសាលាជំនាន់ថ្មី និង កម្មវិធីមជ្ឈមណ្ឌលសិក្សាទំនើប ក្រោយពេលដែលសម្តេចធិបតី ប្រកាសនៅក្នុងពេលបិទសន្និបាត ក្រសួងអប់រំ យុវជន និងកីឡា នៅថ្ងៃទី២៦ ខែឆ្នាំដដែល ។
ក្រោយការប្រកាសសាធារណៈមតិបានរិះគន់ខ្លាំងៗធ្ងន់ៗដែលលើកឡើងពីអសមត្ថភាព និងបញ្ហាផលប្រយោជន៍នៅពីក្រោយការសម្រេចចិត្តនេះ ។ ពលរដ្ឋខ្លះបានលើកឡើងថា ការបិទកម្មវិធីនេះ គឺដោយសារ តែនិន្នាការថ្មីដែលកំពុងតែកើតមាននៅសាលាឯកជន ដោយថ្មីៗមាតាបិតាសិស្សបានកំពុងតែបញ្ឈប់ការសិក្សាកូនៗរបស់ពួកគេដែលបង់ថ្លៃខ្ពស់នៅសាលាឯកជនងាកមករកមជ្ឈមណ្ឌលសិក្សាទំនើបនៅតាមសាលារដ្ឋដោយសារតែពួកគេចំណាយតិច ហើយគុណភាព និងសម្ភារៈនៃការបង្រៀន គឺប្រសើរជាងឯកជន ។ ដោយសារតែនិន្នាការនោះហើយទើបសាលារៀនទាំងនោះផ្តូចផ្តើមឲ្យកម្មវិធីសិក្សានេះឡើង ។
នៅលើបណ្តាញសង្គមក៏មានការរិះគន់ធ្ងន់ធ្ងរជាងនេះជាច្រើនទៀត ដូច្នេះហើយទើបសម្តេចធិបតី នាល្ងាចថ្ងៃទី២៧ ខែកុម្ភៈ នៅក្នុងពេលបិទសន្និបាតក្រសួងទេសចរណ៍ថ្លែងបញ្ជាក់ពីបញ្ហានេះ ដើម្បីកុំអោយយល់ច្រឡំ ។
សម្តេចធិបតី បានថ្លែងបញ្ជាក់ថា ការរិះគន់នេះ ពលរដ្ឋអាចយល់ច្រឡំរវាងកម្មវិធីសាលាជំនាន់ថ្មី និង កម្មវិធីមជ្ឈមណ្ឌលសិក្សាទំនើប ។ សម្តេចធិបតី លើកឡើងថា កម្មវិធីនេះ គឺផ្តួចផ្តើមឡើងដោយក្រសួងដូចគ្នា ហើយក៏មានបំណងលើកកម្ពស់គុណភាព និងគុណវឌ្ឍន៍នៃការអប់រំបណ្តុះបណ្តាលកូនខ្មែរដូចគ្នា ។ ប៉ុន្តែកម្មវិធីទាំងពីមិនដូចគ្នាទេ ។
សម្តេចធិបតីបានបញ្ជាក់យ៉ាងច្បាស់ៗនៅពេលនោះថា អ្វីដែលរាជរដ្ឋាភិបាលសម្រេចចិត្តបិទនោះគឺកម្មវិធីមជ្ឈមណ្ឌលសិក្សាទំនើប រីឯកម្មវិធីអប់រំសាលាជំនាន់ថ្មី គឺមិនមានការបិទ ឬបញ្ចប់ទេ ។ ដូច្នេះយើងកុំយល់ច្រឡំ ។ សម្តេចធិបតី បានបន្ថែមថា កម្មវិធីសាលាជំនាន់ថ្មី គឺអត់មានរំសាយនោះទេ មានតែពង្រីកបន្ថែម ដោយសាលាជំនាន់ថ្មីនេះ គឺគ្រប់គ្រងដោយរដ្ឋ និងជាសាលាដើម្បីបង្កើនលទ្ធភាព សមត្ថភាព ជូនប្រជាពលរដ្ឋ ក្រោមការដឹកនាំ និងគ្រប់គ្រងរបស់ក្រសួងអប់រំ យុវជន និងកីឡា ។
សម្តេចធិបតី បានបញ្ជាក់ដដែលៗច្បាស់ៗថា អត់មានការសម្រេចិត្តលុប ឬបិទសាលាជំនាន់ថ្មីនោះទេ ហើយរាជរដ្ឋាភិបាលនៅតែបន្តគាំទ្រ ។ សាលាជំនាន់ថ្មីនេះ គឺរដ្ឋជាអ្នកគ្រប់គ្រងតែមួយគត់ទាំងនាយក ទាំងអ្នកគ្រប់ និងទាំងកម្មវិធីសិក្សាផ្សេងៗ គឺជារបស់រដ្ឋ ។ សាលានេះ គឺជាសាលាដែលបង្រៀនកូនខ្មែរដោយអនុវត្តស្តង់ដារបង្រៀនតែមួយសម្រាប់សិស្សទាំងអស់មិនថា កូនអ្នកមាន ឬកូនអ្នកក្រនោះទេ ។
សម្តេចធិបតីក៏បានបញ្ជាក់បន្ថែមថា សិស្សានុសិស្សនៅសាលាជំនាន់ថ្មីនេះ មាតាបិតាសិស្សមិនមានកាតព្វកិច្ចត្រូវបង់ថ្លៃសិស្សាទេ រាជរដ្ឋាភិបាលបានបញ្ឈប់កម្មវិធីបង់នេះ ហើយដោយរាជរដ្ឋាភិបាលជាអ្នកទ្រទ្រង់ផ្ទាល់ ប៉ុន្តែប្រសិនបើមាតាបិតាស្ម័គ្រចិត្តសាលាក៏ទទួល ។ ដោយឡែក កម្មវិធីដែលរាជរដ្ឋាភិបាលសម្រេចចិត្តបញ្ចប់ ក្រោយអនុវត្តបានមួយរយៈដែលមានប្រមាណជា១៨សាលា ដោយសាលាខ្លះទើបតែចាប់ផ្តើម និងសាលាខ្លះបានចាប់ផ្តើម៣ទៅ៤ឆ្នាំដែរមកហើយ ដោយសារវា គឺមូដែលកម្មវិធីបង្រៀនមួយដោយពាក់កណ្តាលរដ្ឋ និងពាក់កណ្តាលឯកជនតាមរូបមន្ត BOT ។
កម្មវិធីអប់រំនៅមជ្ឈមណ្ឌលសិក្សាទំនើបនេះ គឺពិតជាស្រដៀងគ្នានឹងកម្មវិធីសាលាជំនាន់ថ្មីដែរ ដោយវាដំណើរការដោយសាលាមួយចំនួន ក្រោមការចុះ អនុស្សរណយោគយល់គ្នារវាងសាលារដ្ឋ និងក្រុមហ៊ុនឯកជន ដោយគេយកអគាររបស់រដ្ឋ នៅសាលារដ្ឋ ដើម្បីអនុវត្តនៅគម្រោងដូចសាលាឯកជនដែរ ដោយយកកម្មវិធីជាតិ បូកជាមួយកម្មវិធីបន្ថែម ប៉ុន្តែគ្រប់គ្រងដោយឯកជន ។
សម្តេចធិបតីបានពន្យល់ថា សូមយោគយល់ដល់រាជរដ្ឋាភិបាលចំពោះការសម្រេចចិត្តនៅក្នុងការបញ្ចប់កម្មវិធីមជ្ឈមណ្ឌលសិក្សាទំនើបនេះ ដោយសារតែវាបង្កើតឲ្យមានស្តង់ដា២នៅក្នុងសាលាតែមួយ ។ សិស្សបង់លុយត្រូវអង្គុយរៀនផ្សេង និងសិស្សមិនបង់លុយត្រូវអង្គុយរៀនផ្សេង ដោយឡែកសម្រាប់សាលាជំនាន់ថ្មី គឺមិនមានស្ទង់ដារ២នោះទេ គឺរៀនជាមួយគ្នាទាំងអស់ ។ ដូចនេះហើយមិនអាចឱ្យមានការពង្រីកការបង្រៀនមានស្ទង់ដារ២ ក្នុងសាលាតែមួយបានទៀតនោះទេ។
សម្តេចធិបតី ហ៊ុន ម៉ាណែត ក៏បានស្នើសុំការយោគយល់អាណាព្យាបាល ក៏ដូចជា លោកគ្រូ អ្នកគ្រូ ដែលមានកូនរៀន និងបង្រៀននៅមជ្ឈមណ្ឌលសិក្សាទំនើប ចំពោះសេចក្តីសម្រេចចិត្តដូចនេះ ក្រោយមានការថ្លឹងថ្លែងជាយូរ ។
ផ្អែកតាមការបញ្ជាក់របស់ប្រមុខរាជរដ្ឋាភិបាលយើងពិតជាយល់ស្រប ហើយគាំទ្រឲ្យកម្មវិធីមជ្ឈមណ្ឌលសិក្សាទំនើបនេះបញ្ចប់មែន ពីព្រោះថា ប្រសិនជាយើងនៅតែបន្តឱ្យមានមជ្ឈមណ្ឌលសិក្សាទំនើបនេះ បញ្ហាកាន់តែមានភាពរ៉ាំរ៉ៃយូរអង្វែងផងដែរ ហើយវានឹងអាចឲ្យសង្គមមើលឃើញពីវិសមភាពនិង ការបែងចែកស្រទាប់វណ្ណៈសង្គមនៅសាលាដែលជាស្ថាប័នអប់រំផ្ទាល់តែម្តង ។
យើងខ្ញុំយល់ថា សាលារៀន គឺជាកន្លែងបណ្តុះបណ្តាលមនុស្ស ប៉ុន្តែប្រសិនបើនៅសាលាតែមួយហើយអនុវត្តតាមស្តង់ដា២បែបនេះ ក្មេងៗជំនាន់ក្រោយនឹងមានគំនិតនិងទស្សនៈបែងចែកបក្សពួកតាំងពីក្មេង។ ដូច្នេះ វាគឺជាគ្រោះថ្នាក់នៃសង្គមមួយដែលយើងអាចនឹងមិននឹកស្មានដល់ ។ នៅពេលនេះសាលានេះមាន១៨ ហើយបើបន្តនឹងមានសាលាផ្សេងៗទៀត ។ ដូច្នេះវិសមភាព និងគម្លាតនឹងកាន់តែធំ ហើយនៅពេលនោះបញ្ហាសង្គមក៏កាន់តែធំផងដែរ ។
បញ្ហានេះប្រសិនបើរាជរដ្ឋាភិបាលមិនពិចារណាទេ នៅថ្ងៃអនាគតនឹងអាចមានការបែងចែកវណ្ណៈហើយតែកាលណាសង្គមមានការបែងចែកវណ្ណៈនោះសុដុមនីយកម្មសង្គម ពិតជាពិបាកនឹងនឹងស្មានដល់ ។ ដូច្នេះយើងខ្ញុំសង្ឃឹមថា សាធារណៈមតិនឹងយោគយល់បញ្ហនេះ ។ ការអប់រំសំខាន់ណាស់ ប្រសិនបើធ្វេសប្រហែសតែបន្តិច នៅពេលអនាគតសង្គមនឹងរងនូវផលដែលកើតចេញពីការសម្រេចចិត្តបែបនោះ ។ ប៉ុន្តែទោះជាយ៉ាងណាក៏ដោយសង្ឃឹមថា ក្រសួងអប់រំ និងសាលាដែលកំពុងតែដំណើរកម្មវិធីសិក្សាតាមគំរូមជ្ឈមណ្ឌលសិក្សាទំនើបគិតគូពីការបន្សាំកម្មវិធី និងបរិយាកាសដល់សិស្សានុសិស្សដែលកំពុងតែរៀននៅសាលានេះឲ្យច្បាស់លាស់សិន មុនពេលបញ្ចប់កម្មវិធីនេះភ្លាមៗ ។ ការបញ្ចប់ដោយភ្លាមៗ ពិតជាពិបាកធ្វើឲ្យគេទទួលយកបានណាស់ ។ ដូច្នេះសង្ឃឹមថា ក្រសួងនិងសាលានឹងរៀបចំវាឲ្យស្រួលបួល ៕
ចែករំលែកព័តមាននេះ