ខេត្តកំពង់ឆ្នាំង ៖ ប្រាសាទកំពង់ព្រះស្ថិតក្នុងភូមិកំពង់ព្រះ ឃុំឆ្នុកទ្រូ ស្រុកបរិបូណ៌ ត្រូវបានរៀបចំធ្វើពិធីក្រុងពាលីដើម្បីរៀបចំជួសជុលឡើងវិញ កាលពីថ្ងៃទី២៩ មិថុនា បន្ទាប់ពីរងការខូចខាតផ្នែកគ្រឹះប្រាសាទ ដោយសារការជីកដីសាងសង់ដងអង់តែនទូរស័ព្ទរបស់ក្រុមហ៊ុន ទូរស័ព្ទមួយ កាលពីឆ្នាំ២០០៨កន្លងទៅ ។
ពិធីនេះបានប្រារព្ធធ្វើក្រោមអធិបតីភាពលោកហ៊ីម ឆែម រដ្ឋមន្ត្រីក្រសួងវប្បធម៌ និងវិចិត្រសិល្បៈដោយមានការចូលរួមពីលោកហាប់ ទូច អគ្គនាយកនៃអគ្គនាយកដ្ឋានបេតិកភណ្ឌ និងមន្ត្រីក្រសួងវប្បធម៌ ប្រធានមន្ទីរ កងកម្លាំងប្រដាប់អាវុធ និងប្រជាពលរដ្ឋប្រមាណជាង១០០នាក់ ។
ក្រោយពីលោកតាអាចារ្យធ្វើពិធីក្រុងពាលី រួចមក លោកហ៊ុន សុថុន មន្ត្រីមន្ទីរវប្បធម៌ និងវិចិត្រសិល្បៈខេត្ត បានរាយការណ៍ថា ប្រាសាទដ៏មានវ័យចំណាស់ឈ្មោះប្រាសាទកំពង់ព្រះនេះបានរងការខូចខាតផ្នែកគ្រឹះប្រាសាទ ដោយសារក្រុមហ៊ុនទូរស័ព្ទក្នុងស្រុកមួយមកជីកដីក្បែរប្រាសាទ ដើម្បីដាក់ដងអង់តែន ទូរស័ព្ទកាលពីឆ្នាំ២០០៨ ដែលកាលណោះមន្ទីរបានធ្វើការហាមឃាត់ និងប្តឹងប្តល់ដល់តុលាការខេត្តផងដែរ ។ ពេលនេះយើងបានរៀបចំក្រុងពាលីធ្វើការជួសជុលឡើងវិញ ដើម្បីរក្សាកេរដំណែលដូនតាដែលជាស្នាដៃដ៏ល្អឆ្នើមនេះឱ្យគង់វង្ស ។
លោកហាប់ ទូច បានលើកឡើងថា ប្រាសាទនេះជាស្នាដៃដ៏ល្អវិចិត្ររបស់បុព្វបុរសយើងបានកសាងឡើងក្នុងសតវត្សទី៨ ចុងក្រោយសម័យចេនឡា ដែលកសាងដោយស្តេចស្រីមួយអង្គ ព្រះនាមម្ចាស់ក្សត្រីជ័យ ទេវី មានរចនាបថ កំពង់ព្រះ ហើយក៏មានឈ្មោះថា ប្រាសាទកំពង់ព្រះរហូតមក ។ ប្រាសាទនេះរៀបចំកសាងដោយឥដ្ឋ និងថ្មភក់ មានចំនួន២ ដែលយើងសន្មតថា មួយជាប្រាសាទស្រី ដែលមានទំហំធំជាងប្រាសាទប្រុស ។ ចាប់តាំងពីពេលកកើតប្រាសាទរហូតមកដល់បច្ចុប្បន្ន ប្រាសាទបានរងការខូចខាតយ៉ាងច្រើនដែលបណ្តាលមកពីកត្តាធម្មជាតិមានភ្លៀង-ខ្យល់ជាដើមព្រោះថា វាមានអាយុជាង១ពាន់ឆ្នាំមកហើយ ។ ចំណែកកត្តាមួយទៀត គឺបណ្តាលមកពីមនុស្សដែលមានជនខិលខូចមកលបលួចគាស់កាយរុករកវត្ថុបុរាណលួចយកចេញពីជំនាន់មួយទៅជំនាន់មួយ ។ ថ្មីៗនេះ មានក្រុមហ៊ុនទូរស័ព្ទមួយបានមកជីកដីក្បែរជើងប្រាសាទចំនួន៤រណ្តៅធ្វើឱ្យរងការខូចខាតគ្រឹះប្រាសាទខ្លះ ។ ចំពោះការរៀបចំជួសជុលនៅពេលនេះ គឺយើងសិក្សាពីគម្រោងប្លង់ ដើម្បីធ្វើការសង្គ្រោះប្រាសាទ ដកបេតុងដែលចាក់ក្បែរគ្រឹះប្រាសាទដោយក្រុមហ៊ុនចេញរួចចាក់ដីលុបរណ្តៅពង្រឹងគ្រិះប្រាសាទ ព្រមទាំងកាប់ព្រៃ និងមែកឈើ ដែលគ្របពីលើប្រាសាទជាដើម ។
លោកហ៊ឹម ឆែម រដ្ឋមន្ត្រីក្រសួងវប្បធម៌ និងវិចិត្រសិល្បៈ មានប្រសាសន៍ថា ថ្ងៃនេះយើងមានមន្ត្រីជំនាញផ្នែកបុរាណវិទ្យា មន្ត្រីវប្បធម៌មកច្រើនណាស់ ។ ទីទួលប្រាសាទនេះមានអំណោយផលសំខាន់ណាស់ កាលសម័យដើមបុព្វបុរសយើងបានប្រើមធ្យោបាយសំពៅមកចតនៅទីទួលនេះ ។ ប្រាសាទដែលមានតម្លៃមិនអាចកាត់ថ្លៃបាននេះ សូមប្រជាពលរដ្ឋយើងចេះជួយថែរក្សា ។ កន្លងមក មានការជីកគាស់កាយធ្វើគ្រឹះអង់តែនដែលនេះមកពីមិនយល់តែលោកមិនបន្ទោសទេ ទាំងអ្នកថែរក្សានៅមូលដ្ឋាននេះ ។ បុព្វបុរស យើងមានសុភាសិតមួយឃ្លាថា «បើមនុស្សទាំងឡាយណាជួយថែរក្សាសម្បត្តិបុរាណវប្បធម៌ ដូនតា មនុស្សនោះនឹងរីកចម្រើនរុងរឿង ប៉ុន្តែបើមនុស្សណាបំផ្លិចបំផ្លាញសម្បត្តិវប្បធម៌ដូនតា មនុស្សនោះនឹងវិនាសរលាយសាបសូន្យគ្មានកំណើត» ។ តួយ៉ាងដូចចោរសៀមរាល់ថ្ងៃ វាបានបាញ់មកលើប្រាសាទព្រះវិហាររបស់ខ្មែរយើង វាក៏ទទួលភាពបរាជ័យទាំងលើឆាកអន្តរជាតិ និងនយោបាយក្នុងប្រទេស ។
ចុងបញ្ចប់ លោករដ្ឋមន្ត្រីបានឧបត្ថម្ភប្រជាពលរដ្ឋដែលបានចូលរួមក្នុងម្នាក់ៗ ក្រមា១ និងប្រាក់១ម៉ឺនរៀល និងឧបត្ថម្ភវត្តសុរិវង្សកំពង់ព្រះ១លានរៀល ៕
ចែករំលែកព័តមាននេះ