ពិធីអាពាហ៍ពិពាហ៍ដែលគូស្វាមីនានានៅសម័យនេះ បានចំណាយលុយរាប់ម៉ឺនដុល្លារ គឺមិនមែនចំណាយខ្ជះខ្ជាយនៅលើពិធីតាមបែបប្រពៃណី និងក្បួនខ្នាតបុរាណដែលដូនតាបន្សល់ទុកមកនោះទេ គឺមកពីការចាយវា.យផ្តេសផ្តាសលើសេវាកម្មផ្សេងៗ ។ លោក សឹង គា ម្ចាស់ផ្ទះជ័យភូមិ…
ពិធីអាពាហ៍ពិពាហ៍ដែលគូស្វាមីនានានៅសម័យនេះ បានចំណាយលុយរាប់ម៉ឺនដុល្លារ គឺមិនមែនចំណាយខ្ជះខ្ជាយនៅលើពិធីតាមបែបប្រពៃណី និងក្បួនខ្នាតបុរាណដែលដូនតាបន្សល់ទុកមកនោះទេ គឺមកពីការចាយវា.យផ្តេសផ្តាសលើសេវាកម្មផ្សេងៗ ។
លោក សឹង គា ម្ចាស់ផ្ទះជ័យភូមិ និងជាអ្នកជំនាញផ្នែកអរិយធម៌ខ្មែរ បានអោយដឹងថា ការរៀបអាពាហ៍ពិពាហ៍ គឺកើតមានតាំងពីមានមនុស្សពីរនាក់ដំបូងលើផែនដី ដែលមានក្នុងក្បួនដែលអ្នកប្រាជ្ញ មានការផ្តាំផ្ញើថា នៅពេលដែលធ្លាក់ខ្យល់មកពីទិសខាងជើងមានក្រអូបក្លិនផ្កា មានការផ្សំផ្គុំអោយបានគ្នាជាប្តីប្រពន្ធ នេះជាការរៀបការរបស់មនុស្សទីមួយនៅលើផែនដី ។
លោក សឹង គា បានអោយកម្មវិធីលុយនៃសារព័ត៌មានកោះសន្តិភាពដឹងថា ការរៀបអាពាហ៍ពិពាហ៍របស់ខ្មែរមានអត្រាលែងលះតិចជាងបណ្តាប្រទេសនានា ដោយសារអាពាហ៍ពិពាហ៍របស់ខ្មែរមានអត្ថន័យទូលំទូលាយ ហើយពិធីនីមួយៗ គឺបង្កប់នូវការអប់រំចិត្តសាស្ត្រគូស្វាមីភរិយាថ្មីឲ្យចេះព្យាយាមតស៊ូរស់នៅជាមួយគ្នា ។ លោក សឹង គា បញ្ជាក់ថា «គិតអោយមែនទែនទៅ បើការតាមខ្មែរ គ្មានចំណាយអី ទៅលើពិធីកម្ម ដែលត្រូវនោះច្រើនទេ ដោយត្រូវចំណាយលើក្រុងពាលីបន្តិចទៅ លើកាត់សក់បន្តិចទៅ បើថា មានបុកល័ក្ខណ ក៏ចំណាយបន្តិចថែមទៀត ប៉ុន្តែមិនដូច្នេះទេ យើងនិយមចំណាយរាល់ថ្ងៃលើធុងបាស់ ហើយបង្អួតស្រា និងម្ហូប ។ អាពាហ៍ពិពាហ៍យើងរាល់ថ្ងៃ ចំណាយលើម្ហូបខ្លាចគេថា អន់ ថតរូប កាត់នំផ្តេសផ្តាស បើពិធីរបស់ខ្មែរយើងគន្លឹះគ្មានចំណាយស្អីច្រើនផង» ។
លោក ស៊ុយ កុសល ជាយុវជនមួយរូបបានអោយដឹងថា ការចំណាយលើអាពាហ៍ពិពាហ៍បច្ចុប្បន្នរបស់គូស្វាមីភរិយាមិនចាត់ទុកថា ជាការចំណាយខ្ជះខ្ជាយនោះទេ ប្រសិនបើគ្រាន់តែធ្វើ ដើម្បីក្តីសុខសុភមង្គលរបស់ខ្លួន ដែលមិនមែនជាការបង្អួតគ្នានោះ ឬការខ្ចីថវិការបស់អ្នកដទៃ ។ លោក ស៊ុយ កុសល បន្ថែមថា «ការខ្ជះខ្ជាយដោយសារតែពួកគាត់ប្រើប្រាស់ថវិកាទាំងអស់នោះ ដើម្បីចង់បង្អួតថា គាត់ឡូយ ធ្វើអោយបានច្រើន ហើយទៅខ្ចីលុយអ្នកដទៃ ដើម្បីទៅរៀបចំកម្មវិធីទាំងអស់នោះខ្ញុំយល់ឃើញថា ទាំងនេះជាបញ្ហា ។ មែនទែនទៅ ការរៀបការគ្រាន់តែការបំពេញសេចក្តីសុខ សុភមង្គលសម្រាប់គូស្វាមីភរិយាថ្មី ជាពិសេសចាស់ទុំបានដឹងលឺ» ។
លោក ស៊ុយ កុសល បន្តថា យុវជនមួយចំនួនដែលមិនទាន់យល់ពីការគ្រប់គ្រងហិរញ្ញាវត្ថុ បន្ទុកការចំណាយផ្សេងៗក្នុងការរៀបអាពាហ៍ពិពាហ៍នោះជាបន្ទុករបស់អាណាព្យាបាល ជាជាងយុវជនមួយចំនួនផ្សេងៗទៀត ដែលចេះរៀបចំផែនការជីវិតអាជីពការងារ និងមុខរបរច្បាស់លាស់ ។
លោក ស៊ុយ កុសល បន្តថា «ជារួមការរៀបមង្គលការគ្រាន់តែការស្វែងរកសេចក្តីសុខឱកាសសម្រាប់គូស្វាមីភរិយាថ្មីគាត់ចាប់ដៃគូគ្នា ដោយអោយសាធារណៈជនគាត់បានដឹងលឺ ជាពិសេសអាណាព្យាបាលទាំងសងខាង ហើយធ្វើទៅតាមប្រពៃណីរបស់យើងនោះ ទោះបីជាលទ្ធភាពរបស់គាត់ធ្វើបានប៉ុន្មាន មិនសំខាន់លើធំពេក តូចពេក សំខាន់អោយពួកគាត់យល់ពីខ្លឹមសារនៃការរៀបការបែបនោះ ខ្ញុំយល់ថា វាមិនខុសនោះទេ ចំណែកមួយបែបទៀត ដែលមិនត្រឹមត្រូវនោះ គឺរៀបការមិនមែនគ្រាន់តែដើម្បីសុភមង្គលដៃគូចង់បានរបស់គូស្វាមីភរិយាទេ ប៉ុន្តែគាត់ធ្វើដើម្បីអួតបង្ហាញនោះឫ» ។
កញ្ញា ងឿង ចាន់លីន បានអោយដឹងថា ការចំណាយទៅលើការរៀបពិធីមង្គលការ មានតម្លៃថ្លៃ ដោយត្រូវចំណាយទៅលើសំអាងការ ការរៀបចំរោងការ និងការចំណាយទៅពិធីការផ្សេងៗទៀត ។ កញ្ញា ងឿង ចាន់លីន បន្តថា «ដោយសារពួកយើងមានសិទ្ធិស្មើគ្នាកន្លែងណាជួយចេញគ្នា បានជួយចេញគ្នាទៅ ។ ដោយសារតែពេលយើងការរួចហើយ លុយទាំងនេះនឹងក្លាយជាលុយរួម ។ ហេតុអ្វីត្រូវដាក់បន្ទុកខាងប្រុសដាច់ខាត? ឱ្យគាត់ត្រូវតែខំប្រឹងរកលុយតែម្នាក់ឯង ដើម្បីរៀបការ? បើយើងស្រឡាញ់គេដែរ»។
កញ្ញា ងឿង ចាន់លីន បន្ថែមថា បើសិនជាដៃគូថ្មោងថ្មីចង់រៀបការ ប៉ុន្តែមានជីវភាពមធ្យមនោះ គួរតែបង្រួមពិធីរៀបការមកតូចសមល្មម ស្របទៅតាមសមត្ថភាពតាមរយៈការអញ្ជើញតែមិត្តភក្តិសិទ្ធស្នាល និងសាច់ញាតិសងខាង ដើម្បីបង្គ្រប់កិច្ចទៅបានហើយ ៕
ចែករំលែកព័តមាននេះ