រាជធានីភ្នំពេញ ៖ សហព័ន្ធកីឡាប្រដាល់សាកលកម្ពុជា នៅថ្ងៃទី២៨ ខែកុម្ភៈ ឆ្នាំ២០២៥ បានរៀបចំធ្វើមហាសន្និបាត បញ្ចប់អាណត្តិទី៧ ដើម្បីជ្រើសរើសផ្លាស់ប្តូរក្បាលម៉ាស៊ីនដឹកនាំថ្មី សម្រាប់ដឹកនាំអាណត្តិទី៨…
រាជធានីភ្នំពេញ ៖ សហព័ន្ធកីឡាប្រដាល់សាកលកម្ពុជា នៅថ្ងៃទី២៨ ខែកុម្ភៈ ឆ្នាំ២០២៥ បានរៀបចំធ្វើមហាសន្និបាត បញ្ចប់អាណត្តិទី៧ ដើម្បីជ្រើសរើសផ្លាស់ប្តូរក្បាលម៉ាស៊ីនដឹកនាំថ្មី សម្រាប់ដឹកនាំអាណត្តិទី៨ ឆ្នាំ២០២៥-២០២៩ ជាបន្តទៀត ។
លោកវេជ្ជបណ្ឌិត ឆឹង យ៉ៅយ៉េន បានធ្វើជាប្រធានសហព័ន្ធកីឡាប្រដាល់សាកលកម្ពុជា ចំនួន២អាណត្តិ តាំងពីឆ្នាំ២០១៧ មកម្ល៉េះ។ លោកបានបង្កើតបាននូវស្នាដៃសំខាន់ៗជាច្រើន ក្នុងក្នុងវិស័យកីឡាប្រដាល់សាកលកម្ពុជា ដូចជាបានដឹកនាំប្រតិភូប្រដាល់សាកលកម្ពុជា ចូលរួមប្រកួតកីឡាស៊ីហ្គេម នៅប្រទេសហ្វីលីពីន ឆ្នាំ២០១៩ ស៊ីហ្គេមនៅប្រទេសវៀតណាម ឆ្នាំ២០២២ និងជាពិសេសការប្រកួតកីឡាស៊ីហ្គេម ឆ្នាំ២០២៣ ដែលកម្ពុជា ដណ្ដើមបានមេដាយចំនួន ៩គ្រឿង ក្នុងនោះមេដាយចំនួន១គ្រឿង មេដាយប្រាក់ចំនួន ៣គ្រឿង និងមេដាយសំរឹទ្ធ ចំនួន៥គ្រឿង ។
ដូច្នេះទាំងនេះ គឺស្នាដៃដ៏ធំធេងរបស់លោកវេជ្ជបណ្ឌិត ឆឹង យ៉ៅយ៉េន ក្នុងអាណត្តិ ដែលលោកធ្វើជាប្រធានសហព័ន្ធ ដែលធ្វើឲ្យវិស័យកីឡាប្រដាល់សាកលកម្ពុជា ល្បីសុះសាយ នៅលើឆាកអន្តរជាតិ ។
ដោយឡែកសម្រាប់តំណែងប្រធានសហព័ន្ធកីឡាប្រដាល់សាកលកម្ពុជា អាណត្តិថ្មីទី៨ ឆ្នាំ២០២៥-២០២៩ ត្រូវបានអង្គមហាសន្និបាត បោះឆ្នោតគាំទ្រលោក ប៊ុយ សុភ័ណ្ណ ដែលជាអគ្គលេខាធិការអាណត្តិចាស់ ដោយលោកទទួលបានសំឡេងគាំទ្រ ១០០ភាគរយ ។
ទោះជាយ៉ាងណា លោកវេជ្ជបណ្ឌិត ឆឹង យ៉ៅយ៉េន ត្រូវបានអង្គមហាសន្និបាតឆ្នោត គាំទ្រធ្វើជាប្រធានកិត្តិយស សហព័ន្ធកីឡាប្រដាល់សាកលកម្ពុជា ក្នុងអាណត្តិថ្មីទី៨ ដើម្បីរួមចំណែកលើកស្ទួយវិស័យកីឡាប្រដាល់សាកលកម្ពុជា កាន់តែមានការរីកចម្រើនថែមទៀត ៕
ចែករំលែកព័តមាននេះ