ប្រទេសអេស្ប៉ាញ ៖ កីឡាករបាល់ទាត់ Jude Bellingham កាលពីថ្មីៗនេះ ត្រូវ​បាន​គេ​ប្រទះ​ឃើញនៅជាមួយ​មិត្ត​ស្រី​ថ្មី​​ឈ្មោះ Ashlyn Castro ខណៈមិត្តស្រីថ្មីស្រស់សោភារូបនេះ ក៏តែងតែទៅ​គាំទ្រ​មិត្តប្រុសជា​ច្រើន​លើក ដោយ​បានឆក់យក​ការ​ចាប់​អារម្មណ៍​យ៉ាងខ្លាំងពី​ប្រព័ន្ធ​ផ្សព្វផ្សាយធំៗ និង​អ្នក​គាំទ្រ​បាល់ទាត់​នៅជុំវិញពិភពលោក។

ជាក់ស្តែង អំឡុងការប្រកួតរវាងក្រុម Real Madrid និងក្រុម Girona កាលពីថ្ងៃទី ២៣ ខែកុម្ភៈ កន្លងទៅថ្មីៗនេះ នៅឯកីឡដ្ឋាន Santiago Bernabeu កញ្ញា Ashlyn Castro ​ក៏ត្រូវបានគេប្រទះឃើញអង្គុយទស្សនាក្នុងកីឡដ្ឋានផងដែរ។ ក្រោយបញ្ចប់ការប្រកួត កាមេរ៉ាបានបង្វែរចាប់យករូបភាព Castro ព្រមទាំងមិត្តប្រុស និងក្រុមគ្រួសាររបស់គេនៅផ្នែកមួយនៃកីឡដ្ឋាន។ ជារឿយៗ Castro ក៏ធ្លាប់​ត្រូវ​បាន​​ប្រទះ​ឃើញ​មកទស្សនា​ការ​ប្រកួតផ្សេងទៀតរបស់ Real Madrid ​ក្នុង​រដូវ​កាល​នេះផងដែរ។

យោងតាមកាសែត The Sun បានរាយការណ៍ថា គូស្នេហ៍មួយគូនេះ តែងតែណាត់ជួបគ្នា ដោយមានទាំងវត្តមានឪពុកម្តាយរបស់ Bellingham នៅជាមួយផងដែរ។ គេសង្កេតឃើញថា Castro មានភាពស្និទ្ធិស្នាលខ្លាំងជាមួយម្តាយ Bellingham មើលទៅប្រៀបដូចជាកូនប្រសារស្រី និងម្តាយក្មេក។ ដូច្នេះថាតើមិត្តស្រីថ្មីខ្សែបម្រើ Jude Bellingham ជានរណា ទើបបានជាប្រព័ន្ធផ្សព្វផ្សាយធំៗជាច្រើន ចាប់អារម្មណ៍ខ្លាំងបែបនេះ?

កញ្ញា Ashlyn Castro អាយុ២៧ឆ្នាំ គឺជាតារាអ៊ីនធឺណិតដ៏មានឥទ្ធិពល និងតារាម៉ូដែលជនជាតិអាមេរិកាំង រស់នៅទីក្រុងឡូស​អាន់​ជ័រ​លេស (Los Angeles) រដ្ឋកាលីហ្វ័រញ៉ា (California)។ មុនមានទំនាក់ទំនងស្នេហាជាមួយ Bellingham នាងមានអ្នកតាមដានលើបណ្តាញទំនាក់ទំនងសង្គមច្រើនរួចទៅហើយ ពិសេសលើគណនី Instagram ជាង២០ម៉ឺននាក់ មុនពេលកើនឡើងដល់ជាង៤០ម៉ឺននាក់ នៅពេលបច្ចុប្បន្ន។ នាងក៏មានប្រជាប្រិយភាពខ្លាំងលើកម្មវិធី TikTok ដោយតែងតែចែករំលែកការបង្រៀនតុបតែងមុខ និងណែនាំការស្លៀកពាក់ម៉ូដទាន់សម័យ និងទាក់ទាញ។

ពីមុន Castro ធ្លាប់មានទំនាក់ទំនងស្នេហាជាមួយកីឡាករបាល់បោះអាមេរិក Terance Mann ហើយក្រោយមកធ្លាប់មានពាក្យចចាមអារ៉ាមថា នាងក៏ធ្លាប់ទំនាក់ទំនងស្នេហាបុគ្គលល្បីៗនៅសហរដ្ឋអាមេរិកផ្សេងទៀតក្នុងប៉ុន្មានឆ្នាំថ្មីៗនេះ ដោយនៅក្នុងនោះរួមទាំងតារាសម្តែងហូលីវូដដ៏ល្បី លោក Michael B. Jordan និងកីឡាករបាល់បោះ LaMelo Ball ផងដែរ។

ក្រឡេកមក Jude Bellingham ឯណេះវិញ ស្ថិតក្នុងវ័យ២១ឆ្នាំ កំពុងរះចែងចាំងលើវិថីបាល់ទាត់ និងត្រូវបានចាត់ទុកជាកីឡាករបាល់ទាត់ល្អបំផុតមួយរូបនៅលើពិភពលោក។បន្ទាប់ពីផ្លាស់ពី Birmingham City មកចូលរួម Borussia Dortmund ខ្សែបម្រើកម្ពស់ ១,៨៦ម៉ែត្ររូបនេះ បានឈ្នះពានរង្វាន់កីឡាករបាល់ទាត់វ័យក្មេងឆ្នើមបំផុតប្រចាំឆ្នាំ ២០២៣ (Golden Boy) មុនពេលមកចូលរួមជាមួយ Real Madrid កាលពីខែមិថុនា ឆ្នាំ ២០២៣ នៅក្នុងតម្លៃ ១០៨លានដុល្លារ ដោយរួមចំណែកជួយក្រុមរហស្សនាមស្តេចសមួយនេះឈ្នះពានរង្វាន់ La Liga និង Champions League នៅរដូវកាលដំបូងរបស់ខ្លួនផងដែរ៕