ប្រទេសអ៊ីតាលី ៖ កីឡាការិនីបាល់ទាត់សិចស៊ីបំផុតលើពិភពលោក Alisha Lehmann កាលពីថ្មីៗនេះ បានបង្ហើបថា នាងអាចនឹងប្រឡូកក្នុងអាជីពជាតារាបង្ហាញម៉ូដនៅពេលអនាគត បន្ទាប់ពីនាងមានអារម្មណ៍ថាមានទំនុកចិត្តខ្ពស់នៅចំពោះមុខកាមេរ៉ា អំឡុងពេលថតផ្សព្វផ្សាយឈុតក្នុងឱ្យម៉ាកសំលៀកបំពាក់ដ៏ល្បីមួយរបស់ប្រទេសអ៊ីតាលី។…
ប្រទេសអ៊ីតាលី ៖ កីឡាការិនីបាល់ទាត់សិចស៊ីបំផុតលើពិភពលោក Alisha Lehmann កាលពីថ្មីៗនេះ បានបង្ហើបថា នាងអាចនឹងប្រឡូកក្នុងអាជីពជាតារាបង្ហាញម៉ូដនៅពេលអនាគត បន្ទាប់ពីនាងមានអារម្មណ៍ថាមានទំនុកចិត្តខ្ពស់នៅចំពោះមុខកាមេរ៉ា អំឡុងពេលថតផ្សព្វផ្សាយឈុតក្នុងឱ្យម៉ាកសំលៀកបំពាក់ដ៏ល្បីមួយរបស់ប្រទេសអ៊ីតាលី។ នេះបើតាមប្រភពពីកាសែត Daily Mail ចេញផ្សាយកាលពីថ្ងៃទី២៥ ខែកុម្ភៈ ឆ្នាំ២០២៥។
ខ្សែប្រយុទ្ធ Alisha Lehmann ដែលបច្ចុប្បន្នកំពុងតែប្រកបអាជីពជាមួយក្លិប Juventus បានធ្វើឱ្យអ្នកគាំទ្រភ្ញាក់ផ្អើលយ៉ាងខ្លាំង កាលពីថ្មីៗនេះ ជាមួយនឹងរូបថតជាច្រើនសន្លឹកផ្សព្វផ្សាយពីឈុតក្នុងសម្រាប់ក្រុមហ៊ុនសំលៀកបំពាក់ដ៏ល្បីមួយរបស់អ៊ីតាលី ដើម្បីអបអរទិវានៃក្តីស្រឡាញ់។
ខ្សែប្រយុទ្ធសញ្ជាតិស្វីសវ័យ២៦ឆ្នាំ ដែលចូលរួមក្លិប Juventus ជាមួយមិត្តប្រុសរបស់នាង គឺខ្សែបម្រើសញ្ជាតិប្រេស៊ីល Douglas Luiz កាលពីរដូវក្តៅមុននោះ បច្ចុប្បន្នកំពុង សម្រាកព្យាបាលរបួសភ្លៅ ហើយក្នុងឱកាសឃ្លាតឆ្ងាយពីទីលានប្រកួតនេះ ក៏បានជំរុញនាងឱ្យឈានជើងចូលក្នុងវិស័យម៉ូដតែម្តង។
ខ្សែប្រយុទ្ធឆ្នើមក្រុមជម្រើសជាតិស្វីសរូបនេះ បានថ្លែងថា «ខ្ញុំនឹងមិននិយាយថាការងារជាតារាបង្ហាញម៉ូដស្ថិតក្នុងការគិតរបស់ខ្ញុំនោះទេ។ ប៉ុន្តែវាពិតជាគួរឱ្យចាប់អារម្មណ៍ខ្លាំងណាស់ ហើយវាពិតជាមានការផ្លាស់ប្តូរខ្លាំងផងដែរសម្រាប់ខ្ញុំ។ ខ្ញុំតែងតែមានទំនុកចិត្តនៅចំពោះមុខកាមេរ៉ា។ នោះហើយជាមូលហេតុដែលខ្ញុំពិតជាចូលចិត្តការបង្ហាញម៉ូដ។ នៅពេលអ្នកបានធ្វើការជាមួយមនុស្សផ្សេងៗគ្នា អ្នកតែងតែអាចរៀនសូត្រអ្វីមួយថ្មី។ ខ្ញុំនឹងមិននិយាយថា ខ្ញុំគឺជាតារាបង្ហាញម៉ូដនោះទេ ព្រោះបច្ចុប្បន្នខ្ញុំគឺជាកីឡាការិនីបាល់ទាត់»។
សូមជម្រាបថា Alisha Lehmann បានចូលហ្វឹកហាត់បាល់ទាត់នៅសាលាថ្នាលក្លិប FC Konolfingen អំឡុងឆ្នាំ ២០០៨ ដល់ ២០១១ ហើយក្លាយជាកីឡាការិនីអាជីពនៅឆ្នាំ ២០១៦ ជាមួយក្រុម BSC YB Frauen នៅប្រទេសកំណើត មុនផ្លាស់មកចូលរួមក្រុម West Ham United នៅអង់គ្លេស ឆ្នាំ ២០១៨ និងត្រូវក្រុម Everton ខ្ចីជើងនៅឆ្នាំ ២០២១ មុនផ្លាស់ចូលរួមក្រុម Aston Villa នៅឆ្នាំដដែលនោះ។
កីឡាការិនីបង្ហាញខ្លួន ៥៨ប្រកួត ស៊ុតបញ្ចូលទី៩គ្រាប់ឱ្យក្រុមជម្រើសជាតិស្វីស ចាប់តាំងពីឆ្នាំ ២០១៧ មករូបនេះ បានផ្លាស់មកចូលរួមក្រុម Juventus នៅពាក់កណ្តាលឆ្នាំ ២០២៤ ដោយចុះកុងត្រារហូតដល់ឆ្នាំ ២០២៧។
កីឡាការិនី Alisha Lehmann ដែលត្រូវប្រព័ន្ធផ្សព្វផ្សាយអន្តរជាតិ និងអ្នកគាំទ្របាល់ទាត់ប្រសិទ្ធិនាមថា «កីឡាការិនីបាល់ទាត់សិចស៊ីបំផុតលើពិភពលោក» រូបនេះ ទទួល ការចាប់អារម្មណ៍ខ្លាំងទាំងលើទីលានប្រកួត និងលើប្រព័ន្ធផ្សព្វផ្សាយសង្គម តាមរយៈទេពកោសល្យដ៏ចំណានរបស់នាង ព្រមទាំងមកជាមួយនឹងរូបសម្រស់ដ៏ស្រស់ស្អាត និងភាពសិចស៊ីរបស់នាងផងដែរ៕ ដកស្រង់ ៖ Daily Mail
ចែករំលែកព័តមាននេះ