នាយករដ្ឋមន្ត្រីបានប្រគល់ដំបងឲ្យទៅរាស្ត្រហើយ ដូច្នេះរាស្ត្រគួរតែប្រើប្រាស់ដំបងនេះឲ្យមានប្រសិទ្ធភា ពនៅក្នុងការចូលរួមកែលម្អសេវាសុខាភិបាលក៏ដូចជា សេវាកម្មមន្ត្រីដែលកំពុងតែផ្តល់ពាក់ព័ន្ធនឹងកិច្ចគាំពារសង្គមផ្សេងៗ ។ សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានប្រកាសលើកទឹកចិត្តឲ្យប្រជាពលរដ្ឋគ្រប់រូបត្រូវតែហ៊ានរាយការណ៍ចំពោះគ្រូពេទ្យ…
នាយករដ្ឋមន្ត្រីបានប្រគល់ដំបងឲ្យទៅរាស្ត្រហើយ ដូច្នេះរាស្ត្រគួរតែប្រើប្រាស់ដំបងនេះឲ្យមានប្រសិទ្ធភា ពនៅក្នុងការចូលរួមកែលម្អសេវាសុខាភិបាលក៏ដូចជា សេវាកម្មមន្ត្រីដែលកំពុងតែផ្តល់ពាក់ព័ន្ធនឹងកិច្ចគាំពារសង្គមផ្សេងៗ ។
សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានប្រកាសលើកទឹកចិត្តឲ្យប្រជាពលរដ្ឋគ្រប់រូបត្រូវតែហ៊ានរាយការណ៍ចំពោះគ្រូពេទ្យ និងមន្ត្រីអសកម្មណា ដែលរើសអើងក្នុងការពិនិត្យ និងផ្តល់សេវាព្យាបាលដល់ប្រជាពលរដ្ឋ និង អ្នកជំងឺដែលប្រើប្រាស់បណ្ណសមធម៌ និងបណ្ណ ប.ស.ស ។
នៅក្នុងពេលជាមួយគ្នានោះ សម្តេចមហាបវរធិបតី ក៏បានណែនាំឲ្យស្ថាប័នពាក់ព័ន្ធជាពិសេស គឺក្រសួងសុខាភិបាល ការងារ និងបណ្តុះបណ្តាលវិជ្ជាជីវៈ ផែនការ សង្គមកិច្ច និងអតីតយុទ្ធជន និងក្រសួងសេដ្ឋកិច្ច និងហរិញ្ញវត្ថុឲ្យពង្រឹងសេវាសុខាភិបាល និងប្រសិទ្ធភាពជូនប្រជាពលរដ្ឋដោយស្មើភាពដោយមិនមានការរើសអើងប្រជាពលរដ្ឋដែលប្រើប្រាស់សេវាសុខាភិបាលធម្មតា ឬតាមសេវាគាំពារសង្គមផ្សេងៗ ។
ថ្លែងក្នុងពិធី «បើកសប្តាហ៍គាំពារសង្គមកម្ពុជា ឆ្នាំ២០២៥ និងប្រកាសដាក់ឱ្យអនុវត្តជាផ្លូវការនូវក្របខណ្ឌគោលនយោបាយជាតិគាំពារសង្គម ឆ្នាំ២០២៤-២០៣៥» នាព្រឹកថ្ងៃទី២០ ខែកុម្ភៈ ឆ្នាំ២០២៥ សម្តេចធិបតី បានលើកឡើងថា ក្រសួងសុខាភិបាលត្រូវធានាចំពោះពលរដ្ឋគ្រប់រូបទាំងពលរដ្ឋ ដែលប្រើប្រាស់បណ្ណសមធម៌ បណ្ណងាយរងហានិភ័យ ឬបណ្ណ ប.ស.ស ត្រូវទទួលបានទាន់ពេលនូវសេវាសុខាភិបាល ដើម្បីចៀសវាងការថ្នាំងថ្នាក់ពីសំណាក់ប្រជាពលរដ្ឋដែលបានអនុវត្តគោលនយោបាយអាទិភាពចំពោះវិស័យសុខាភិបាលរបស់រាជរដ្ឋាភិបាល ។
ពាក់ព័ន្ធនឹងវិស័យសុខាភិបាលនេះ សម្តេចធិបតី បានគូសបញ្ជាក់ថា ត្រង់ចំណុចនេះសម្តេចបានលើកទឹកចិត្តដល់ប្រជាពលរដ្ឋ ត្រូវហ៊ានរាយការណ៍ ករណីគ្រូពេទ្យរូបណា ដែលមិនបានយកចិត្តទុកដាក់ចំពោះខ្លួន ឬអ្នកប្រើប្រាស់បណ្ណសមធម៌ បណ្ណ ប.ស.ស ដើម្បីទទួលបានសេវាពិនិត្យ និងព្យាបាលជំងឺ ។ ចំណុចនេះ សម្តេចបានបញ្ជាក់យ៉ាងច្បាស់ទៅកាន់ រដ្ឋមន្ត្រីក្រសួងសុខាភិបាល និង រដ្ឋមន្ត្រីក្រសួងការងារ ក្រសួងសេដ្ឋកិច្ច និងហិរញ្ញវត្ថុ គឺត្រូវតែធ្វើកិច្ចការនេះ ។
សម្តេចមហាបវរធិបតី បានបន្ថែមថា តម្លៃកម្មវិធីគាំពារសង្គម មិនមែនស្ថិតនៅលើទិន្នន័យ ឬតម្លៃចំនួនថវិការច្រើន ឬតិចនោះទេ ។ តម្លៃពិតប្រាកដ គឺប្រជាពលរដ្ឋ ដែលជាអ្នកទទួលបានផល និងជាអ្នកផ្តល់ឲ្យ ។ ដូច្នេះ ការគិតគូរពីគុណភាពសេវាព្យាបាលជាការចាំបាច់ ទាំងថ្នាំទាំងឧបករណ៍ ទាំងកន្លែងព្យាបាលត្រូវមាន និងបំពេញជូនពលរដ្ឋដោយស្មើភាព ។
សម្តេចមហាបវរធិបបតី បានបន្តថា តម្លៃមិនមែនត្រឹមកញ្ចប់ថវិការទេ គឺនៅពេលប្រជាពលរដ្ឋទៅព្យាបាលត្រូវទទួលបានសេវាទាន់ពេលវេលាមានការយកចិត្តទុកដាក់ដែលចំណុចនេះ គឺត្រូវតែយកចិត្តទុកដាក់យ៉ាងសំខាន់ ។
ជាមួយគ្នានោះដែរ សម្តេចធិបតី ក៏បានលើកឡើងថា ចំពោះការផ្តល់បណ្ណសមធម៌ ត្រូវតែធ្វើឲ្យបានម៉ត់ចត់ មានតម្លាភាព ដោយកុំឲ្យមានករណីមិនទៅព្យាបាលផងតែធ្វើបណ្ណសមធម៌ ដើម្បីទទួលបានលុយ គឺអត់មានទេ ។ លើសពីនេះ ត្រូវតែអនុវត្តឲ្យតឹងរឹងចំពោះអ្នកដែលមិនបានអនុវត្តតាមគោលការណ៍ ឬអ្នកមានការកេងបន្លំតាមរូបភាពណាមួយ ។
សម្តេចមហាបវរធិបតីបានសង្កត់ធ្ងន់ថា លុយសម្រាប់ជួយប្រជាពលរដ្ឋ ហើយសម្រាប់ត្រៀមបម្រុងជួយប្រជាពលរដ្ឋនៅពេលជួបការលំបាក ហើយបើសិនមូលដ្ឋាន ឬដៃគូណាមិនអនុវត្ត គឺត្រូវចាត់វិធានការឲ្យតឹងរឹងតែម្តង ។ រាល់ការចំណាយប្រាក់១ដុល្លារៗគឺត្រូវឲ្យចំគោលដៅ ហើយធានាឲ្យមានប្រសិទ្ធភាព ដូចនេះតួអង្គ ដែលពាក់ព័ន្ធទាំងអស់ត្រូវប្រកាន់ភ្ជាប់នូវក្រមសីលធម៌ តម្លាភាព និងការប្រព្រឹត្តិឲ្យបានត្រឹមត្រូវ ដើម្បីធ្វើយ៉ាងណាធានាការជួយដល់ប្រជាពលរដ្ឋរបស់យើង បានដោយចីរភាព ។
ការលើកឡើងខាងលើនេះ គឺជាសារមួយដែលនាយករដ្ឋមន្ត្រីបានផ្ញើជូនប្រគល់ជូនក្រុមគ្រូពេទ្យដែលកំពុងតែផ្តល់សេវាកម្មសុខាភិបាល និងមន្ត្រីដែលផ្តល់សេវាកម្មសុខមាលភាព និងគាំពារសង្គមឲ្យខិតខំលើកកមពស់សេវាកម្មរបស់ពួកគេឲ្យកាន់តែមានប្រសិទ្ធភាពបន្ថែមទៀត ។ ហើយនេះក៏ដំបងខាងស្មារតី ដែលប្រមុខរាជរដ្ឋាភិបាលប្រគល់ជូនរាស្ត្រទាំងអស់គ្នា ដើម្បីគោះតម្រង់ពង្រឹងក្រមសីលធម៌របស់មន្ត្រីវេជ្ជសាស្ត្រ និងសេវាកម្មគាំពារសង្គម នៅពេលឃើញរឿងមិនប្រក្រតីកើតមានឡើង ។
សូមកុំខ្លាចនឹងប្រើដំបងនេះ ដើម្បីធ្វើយ៉ាងណាជួយទាំងអស់គ្នានៅក្នុងការពង្រឹងសេវាកម្មសុខាភិបាលដែលនៅតែបន្តមានការរិះគន់ និងជំរុញសេវាកម្មគាំពារសង្គមនេះឲ្យកាន់តែមានប្រសិទ្ធភាពដោយស្មើភាព ។
សរុបទៅ ប្រសិនបើយើងទាំងអស់គ្នាជារាស្ត្រចេះប្រើប្រាស់ដំបងដែលប្រមុខរាជរដ្ឋាភិបាលប្រគល់អោយនេះឲ្យត្រឹមត្រូវតាមបញ្ហាដែលបានជួប ហើយមន្ត្រីសុខាភិបាលនិងមន្ត្រីគាំពារសន្តិសុខសង្គមយកចិត្តទុកដាក់កែលម្អប្រសិទ្ធភាពសេវាកម្មបន្ថែមទៀតនោះ បញ្ហាអសកម្មនៅក្នុងប្រព័ន្ធវិស័យសុខាភិបាល និង សង្គមកិច្ចកម្ពុជានឹងត្រូវដោះស្រាយមិនខាន ។ យើងរង់ចាំមើ់លលទ្ធផលជាក់ស្តែងទាំងអស់គ្នាថា តើគ្រូពេទ្យ និងមន្ត្រីទាំងអស់កែខ្លួនកម្រិតណា ៕
ចែករំលែកព័តមាននេះ