រាជធានីភ្នំពេញ ៖ក្រោយទទួលបានការយកចិត្តទុកដាក់ជំរុញពីភាគីពាក់ព័ន្ធ ជាពិសេសប្រធានសហព័ន្ធកីឡាប្រដាល់គុនខ្មែរឯកឧត្តមខូវ ឆាយ មួយរយៈចុងក្រោយនេះគេសង្កេតឃើញទីផ្សារកីឡាការិនីគុនខ្មែរហាក់មានសន្ទុះឡើងវិញបណ្ដើរៗ ដោយសារស្ទើរតែគ្រប់សង្វៀនទូរទស្សន៍មានរៀបចំឱ្យមានការចាប់គូកីឡាការិនីទាំងឈុតធំ និងថ្នាលឡើងប្រកួតជាហូរហែមិនដែលខាន ។
ទោះបីទីផ្សារកីឡាការិនីគុនខ្មែរហាក់មានសន្ទុះឡើងវិញតាមរយៈចំនួនកីឡាការិនីដែលចូលប្រឡូកក្នុងអាជីពឈឺសាច់មួយនេះមានការកើនឡើងមែន ក៏ការចាប់គូឱ្យប្រកួតជារៀងរាល់សប្ដាហ៍នៅតែជួបការលំបាកសម្រាប់ផលិតករគុនខ្មែរនៅតាមបណ្ដាសង្វៀនទូរទស្សន៍នានា។
ជាក់ស្ដែង លោកកែវ ឆវ័ន្ត ដែលជាផលិតករគុនខ្មែរប្រចាំប៉ុស្ដ៍ CNC និង សង្វៀន CBS បានពន្យល់ថា ការលំបាកនោះ គឺដោយសារភាពខុសគ្នារវាងកម្រិត បច្ចេកទេស និងគីឡូរបស់កីឡាការិនី ។ ជាឧទាហរណ៍ កីឡាការិនីខ្លះមានគីឡូប៉ុនគ្នា ប៉ុន្ដែកម្រិតសមត្ថភាពប្រកួតខុសគ្នាឆ្ងាយ ខណៈកីឡារិនីខ្លះមានសមត្ថភាពប្រហាក់ប្រហែលគ្នាប៉ុន្ដែគីឡូខុសគ្នា ។ លោកកែវឆវ័ន្ត ថា បើទោះជាចំនួនកីឡាការិនីកើនឡើងនាមួយរយៈចុងក្រោយ តែក៏មិនច្រើនដូចកីឡាករនោះដែរជាហេតុធ្វើឲ្យលំបាកក្នុងការផ្គូផ្គង។ ដូច្នេះ ដើម្បីឲ្យមានការប្រកួតជារៀងរាល់សប្ដាហ៍សម្រាប់កីឡាការិនី លោក កែវ ឆវ័ន្ដ
បញ្ជាក់ថា មានពេលខ្លះ គឺត្រូវការសម្របសម្រួលពីភាគីប្រកួតទាំងសងខាង ទោះខុសគីឡូគ្នា បន្ដិចបន្ដួចក៏ដោយ។
កីឡាការិនីជម្រើសជាតិប្រដាល់គុនខ្មែរវី ស្រីឆាយ ដែលធ្លាប់ឈ្នះមេដាយសំរឹទ្ធស៊ីហ្គេម លើកទី៣១ ឆ្នាំ២០២២ នៅប្រទេសវៀតណាម និងស៊ីហ្គេម លើកទី៣២ ឆ្នាំ២០២៣ នៅកម្ពុជា បានទទួលស្គាល់ថា
កន្លងមក ការរកទីផ្សារប្រកួតសម្រាប់កីឡាការិនីពិតជាមានការលំបាក ធ្វើឱ្យកីឡាការិនី
មួយចំនួនធំបង្ខំចិត្តបញ្ចប់អាជីពនេះ ។ កីឡាការិនីកូន១រូបនេះបានទម្លាយឱ្យដឹងទៀតថា ការខ្សត់ទីផ្សារប្រកួតសម្រាប់កីឡាការិនីបានចាប់ផ្តើមតាំងពីឆ្នាំ២០១៨មក ហើយនៅពេលផ្ទុះជំងឺកូវីដ១៩ គឺលែងមានការប្រកួតសម្រាប់ស្ត្រីតែម្តង គឺទើបតែឆ្នាំ២០២៤ទេ ដែលទីផ្សារប្រកួតរបស់កីឡាការិនី ចាប់ផ្តើមកម្រើកវិញ។ ទោះបីជាយ៉ាងណា វី ស្រីឆាយ បានឱ្យដឹងថា ការខ្វះធនធានកីឡាការិនីនៅពេលនេះ វានៅតែជាបញ្ហាប្រឈមសម្រាប់ស្ត្រីបានឡើងប្រកួត ។ ចំពោះបញ្ហានេះនាងស្នើឱ្យថ្នាក់ដឹកនាំសហព័ន្ធកីឡាប្រដាល់គុនខ្មែរក៏ដូចជាម្ចាស់សង្វៀនទាំងអស់សូមចាប់គូឱ្យមានការប្រកួតសម្រាប់នារីឱ្យបានច្រើនផង។
ជាមួយគ្នានេះ ម្ចាស់មេដាយសំរឹទ្ធស៊ីហ្គេមរូបនេះ ក៏ស្នើទៅនារីដែលស្រឡាញ់កីឡានេះឱ្យចូលហ្វឹកហាត់ផងដែរព្រោះបើមានទីផ្សារប្រកួតច្រើនហើយចំនួនកីឡាការិនីមានចំនួនតិច ក៏នៅតែមានបញ្ហាប្រឈមដដែល ។ កីឡាការិនីវ័យ២៧ឆ្នាំរូបនេះបានបញ្ជាក់ថា ទីផ្សារប្រកួតចាប់ផ្តើមមានខ្លះៗវិញហើយ វាមិនខ្សត់ដូចប៉ុន្មានឆ្នាំមុនទេ ប៉ុន្តែធនធានកីឡាការិនីពេលនេះនៅមានចំនួនតិចនៅឡើយបើធៀបជាមួយកីឡាករ ហើយគីឡូខុសគ្នាទៀត អ៊ីចឹងវានៅតែមានការលំបាកក្នុងការផ្គូផ្គងឱ្យមានការប្រកួត ។
ជុំវិញបញ្ហាប្រឈមកង្វះធនធានកីឡាការិនីនេះ ឯកឧត្តម ខូវ ឆាយ ប្រធានសហព័ន្ធកីឡា
ប្រដាល់គុនខ្មែរ បានអះអាងប្រាប់គេហទំព័រព័ត៌មានក្នុងស្រុកថា សហព័ន្ធទើបតែបានចេញគោលការណ៍ទៅគ្រប់ស្ថានីយ និងដៃគូអភិវឌ្ឍថា រាល់កម្មវិធីប្រកួតត្រូវតែមានគូនារី១គូ ឬក៏គូយុវជនថ្នាល ហើយការជំរុញនេះ ដើម្បីឱ្យទីផ្សារប្រកួតរបស់នារីមានការកើនឡើង ។
ឯកឧត្តមថា កន្លងមកមានប្រតិកម្មមកថា កីឡាការិនីខ្វះកម្មវិធីប្រកួត អ៊ីចឹងយើងជំរុញឱ្យមានការបញ្ចូលការប្រកួតរបស់នារីឱ្យបានគ្រប់កម្មវិធី ហើយនៅពេលមានកម្មវិធីប្រកួត លោកជឿថា ការហ្វឹកហាត់របស់កីឡាការិនី នឹងមានការកើនឡើង ព្រោះយើងក៏បានផ្សព្វផ្សាយទៅដល់សមាគម-ក្លិបឱ្យមានការជ្រើសរើសកីឡាការិនីបន្ថែមដូចគ្នា ដោយសារពេលនេះយើងមានតម្រូវការទីផ្សារប្រកួតរបស់ពួកគាត់ហើយ។
ទន្ទឹមគ្នានេះ ឯកឧត្តម ខូវ ឆាយ ក៏បានជំរុញឱ្យគ្រប់ភាគីពាក់ព័ន្ធ ត្រូវផ្សព្វផ្សាយ និងលើកទឹកចិត្តធ្វើម៉េចឱ្យយុវនារីទាំងអាយុក្រោម១៣ឆ្នាំ និងក្រោម១៦ឆ្នាំ ចូលហ្វឹកហាត់ប្រដាល់ឱ្យបានច្រើន ព្រោះសហព័ន្ធបាននិងកំពុងរៀបចំឱ្យមានការប្រកួតសម្រាប់យុវជនថ្នាល និងផ្នែកនារីពីចន្លោះអាយុ១៣ទៅ១៦ឆ្នាំ ដើម្បីជំរុញឱ្យមានកីឡាការិនីចូលរួមកាន់តែច្រើន ៕
ចែករំលែកព័តមាននេះ