ខេត្តសៀមរាប ៖ ក្មេងប្រុសស្រីចំនួន២នាក់ ត្រូវជាបងប្អូនជីដូនមួយនឹងគ្នា បានស្លាប់យ៉ាងអាណោចអាធ័ម ក្នុងឧបទ្ទវហេតុផ្ទុះគ្រាប់ បង្កការភ្ញាក់ផ្អើលកាលពីវេលាម៉ោង ០៦និង៣០នាទី ព្រឹក ថ្ងៃទី២២…
ខេត្តសៀមរាប ៖ ក្មេងប្រុសស្រីចំនួន២នាក់ ត្រូវជាបងប្អូនជីដូនមួយនឹងគ្នា បានស្លាប់យ៉ាងអាណោចអាធ័ម ក្នុងឧបទ្ទវហេតុផ្ទុះគ្រាប់ បង្កការភ្ញាក់ផ្អើលកាលពីវេលាម៉ោង ០៦និង៣០នាទី ព្រឹក ថ្ងៃទី២២ ខែកុម្ភ: ឆ្នាំ ២០២៥ ស្ថិតនៅត្រង់ចំណុចអូរត្រពាំងកូនទា ក្នុងភូមិក្រញូង ឃុំតាសៀម ស្រុកស្វាយលើ ខេត្តសៀមរាប ។ នេះបើតាមការបញ្ជាក់ពីកម្លាំងកងឯកភាពកម្ចាត់មីងទី៤ខេត្តសៀមរាប ហៅកាត់ស៊ីម៉ាក់ ។
បើតាមប្រសាសន៍របស់លោក អៀង ពិសិដ្ឋ អភិបាលនៃគណៈអភិបាលស្រុកស្វាយលើ បានប្រាប់ ភ្នាក់ងារកោះសន្តិ ភាព តាមតេលេក្រាម នៅព្រឹកថ្ងៃទី២៤ ខែកុម្ភៈ ឆ្នាំ២០២៥ នេះថា ក្មេងរងគ្រោះទាំង២នាក់ខាងលើ ក្នុងនោះម្នាក់ឈ្មោះ ធំ ប្រុសយ៉េត ភេទប្រុស អាយុ២ខួប រស់នៅភូមិក្រញូង ឃុំតាសៀម ស្រុកស្វាយលើ ខេត្តសៀមរាប និងក្មេងរងគ្រោះម្នាក់ទៀតឈ្មោះ ម៉ូ លីសា ភេទស្រី អាយុ២ខួប រស់នៅភូមិស្រះខ្វាវ ឃុំត្បែង ស្រុកបន្ទាយ ស្រី ខេត្តសៀមរាប ។ ក្មេងរងគ្រោះទាំង២នាក់ ត្រូវជាបងប្អូនជីដូនមួយនឹងគ្នា ។
លោកអភិបាលស្រុកបានបញ្ជាក់ថា បើយោងតាមការបំភ្លឺរបស់ឈ្មោះ ឡុញ ធំ ភេទប្រុស អាយុ២៣ឆ្នាំ មុខរបរ កសិករ ទីលំនៅបច្ចុប្បន្នភូមិក្រញូង ឃុំតាសៀម ស្រុកស្វាយលើ ខេត្តសៀមរាប បានឱ្យដឹងថា មុនពេលកើតហេតុរូបគាត់ និងបងប្រុសបង្កើតឈ្មោះ ឡុញ ម៉ូ អាយុ២៤ឆ្នាំ បានមកស្នាក់នៅផ្ទះរបស់ឈ្មោះ រ៉ុន រ៉ាត់ ក្នុងភូមិក្រញូង ឃុំតាសៀម ស្រុកស្វាយលើ ខេត្តសៀមរាប ហើយនឹងយកកូនតូចៗមកនៅជាមួយផងដែរ ពួកគាត់ទាំង២នាក់ បងប្អូនបង្កើត និងប្រពន្ធ មករស់នៅទីនេះ គឺក្នុងគោល បំណងស៊ីឈ្នួលអារឈើឱ្យឈ្មោះ រ៉ុន រ៉ាត់។
តាមប្រភពដដែលបានបន្តថា លុះដល់ថ្ងៃទី២១ ខែកុម្ភ: ឆ្នាំ២០២៥ គាត់និងបងប្រុសឈ្មោះ ឡុញ ម៉ ព្រមទាំងឈ្មោះ រ៉ុន រ៉ាត់ បាននាំគ្នាអារឈើក្នុងដីស្រែក្រោយផ្ទះ ក្រោយពេលអារឈើហត់អស់កម្លាំងក៏នាំមកសម្រាក ។ នៅវេលាម៉ោង៣ឈានចូលថ្ងៃទី ២២ ខែកុម្ភ: ឆ្នាំ២០២៥ មកដល់ភ្លាមក៏នាំគ្នាសម្រាកនៅលើឈើក្រោមដើមស្ដុកស្ដោនោះតែម្ដង ពេលដល់វេលាម៉ោង៦ ព្រឹកថ្ងៃ២២ ខែកុម្ភ: ឆ្នាំ ២០២៥ កូនប្រុសរបស់គាត់ឈ្មោះ ធំ ប្រុសយ៉េត និងកូនបងប្រុសរបស់គាត់ឈ្មោះ ម៉ូ លីសា បាននាំគ្នាអង្គុយ លេងនៅលើដីដែលនៅជិតកន្លែងពួកគាត់សម្រាក ។ ពេលនោះគាត់មិនបានចាប់អារម្មណ៍ថា កូនប្រុស និងក្មួយស្រី លេងអ្វីនោះទេ លុះដល់វេលាម៉ោង០៦ និង៣០នាទីព្រឹក ស្រាប់លឺសម្លេងផ្ទុះយ៉ាងខ្លាំងនៅក្បែរកន្លែងគាត់ដេកប្រវែងប្រហែល៥ម៉ែត្រ ។ ពេលនោះរូបគាត់ស្ទុះទៅមើល ស្រាប់តែឃើញកូនប្រុសរបស់គាត់ឈ្មោះ ធំ ប្រុសយ៉េត និងក្មួយស្រីឈ្មោះ ម៉ូ លីសា បានដួលផ្កាប់មុខទៅនឹងដីហើយមានស្នាមរបួសពេញខ្លួន ។ បន្ទាប់ពីឃើញដូច្នោះទើបគាត់ដឹងថាកូនរបស់ខ្លួន និងក្មួយត្រូវនឹងអំបែងគ្រាប់ស្លាប់បាត់បង់ជីវិតទៅហើយ ។
លោកអភិបាលស្រុកបានបន្ថែមថា ការពិនិត្យសពក្មេងរងគ្រោះទាំង២នាក់ ក្នុងនោះទី១-កុមារ៉ាឈ្មោះ ធំ ប្រុសយ៉េត មានស្នាមរបួសនៅលើថ្ពាល់ខាងឆ្វេងប្រវែង៤សង្ទីម៉ែត្រ ទទឹង២សង្ទីម៉ែត្រ ជម្រៅ ១សង្ទីម៉ែត្រ និងមានស្នាមដាច់រលាត់ ស្បែកនៅក្រោមជើងសក់ខាងស្ដាំចំនួន ២កន្លែង ស្នាមរបួសនៅលើកផ្នែកខាងស្ដាំប្រវែង៥សង្ទីម៉ែត្រ ទទឹង៣សង្ទីម៉ែត្រ ជម្រៅ២សង្ទីម៉ែត្រ និង នៅលើដងខ្លួនមានស្នាមរបួសនៅលើទ្រូងផ្នែកខាងស្ដាំចំនួន៨កន្លែង មានរាងមិនស្មើគ្នា ចំពោះ កំភូនដៃផ្នែកខាងស្ដាំមានស្នាមរបួសប្រវែង១១សង្ទីម៉ែត្រ ទទឹង៤សង្ទីម៉ែត្រ ជម្រៅ១សង្ទីម៉ែត្រ ជើងទាំង២ ម្រាមទាំង១០ ពុំមានស្លាកស្នាមត្រង់ចំណុចនេះឡើង ។
រីឯកុមារី ឈ្មោះ ម៉ូ លីសា មានស្នាមរបួសមុតតូចៗជាច្រើនកន្លែងនៅមុខ និងចង្កា និងនៅលើដងខ្លួនមានស្នាមរបួសមុតនៅលើទ្រូងចំនួន១៣ កន្លែង ចំណែក ដៃទាំង០២ ម្រាមទាំង ១០មិនស្លាកស្នាមត្រង់ចំណុចនេះទេ ផ្នែកជើងខាងស្ដាំមានស្នាមរបួសប្រវែង៧សង្ទីម៉ែត្រ និងទទឹង៤សង្ទីម៉ែត្រនៅលើជើងផ្នែកខាង ឆ្វេង មានស្នាមរបួសនៅភ្លៅប្រវែង៥សង្ទីម៉ែត្រ និងទទឹង៣សង្ទីម៉ែត្រ ជម្រៅ៣សង្ទីម៉ែត្រ និងមាន ស្នាមរបួសមុតជាច្រើនកន្លែង។
យោងតាមការបំភ្លឺពីសាក្សី អ្នកជិតខាង និង-ការពិនិត្យរបស់កម្លាំងជំនាញ និងការពិនិត្យកន្លែងកើតហេតុរបស់កងឯងភាពកម្ចាត់មីនទី៤ ខេត្តសៀមរាប ហៅកាត់ស៊ីម៉ាក់ បានសន្និដ្ឋានថា -សព ក្មេង ប្រុស ស្រីទាំង ០២នាក់ខាងលើ ពិតជាស្លាប់ដោយសារផ្ទុះគ្រាប់ ។
ក្រោយ ពីកម្លាំងជំនាញ បានពិនិត្យចប់ហើយ ក៏បានធ្វើការប្រគល់សពជូន ឪពុកម្តាយ ដើម្បីយកទៅធ្វើបុណ្យតាមប្រពៃណី ។
សូមបញ្ជាក់ថា បន្ទាប់ពីធ្វើបុណ្យសពកុមារា កុមារីទាំង២នាក់រួចមក ក៏ឃើញមានវត្តមាន លោក ស៊ុំ សំអន នាយកសាខាកាកបាទក្រហមកម្ពុជា ខេត្តសៀមរាប និងលោក អៀង ពិសិដ្ឋ ប្រធានគណៈកម្មាធិការអនុសាខាកាក បាទក្រហកម្ពុជា ស្រុកស្វាយលើ និងសហការី នាព្រឹកថ្ងៃទី២៣ ខែកុម្ភៈ ឆ្នាំ២០២៥ បាននាំយកគ្រឿងឧបភោគ បរិភោប ចូលរួមបុណ្យសព កុមារា កុមារី ២នាក់ រងគ្រោះដោយឧបទ្ទវហេតុផ្ទុះកង់ដង់ ឬ ក្បាលគីប ម៉ាកគ្រាប់បេ៦៣ ទំហំ៦៦មីលីម៉ែត្រ នៅព្រឹកថ្ងៃសៅរ៍ ថ្ងៃទី២២ ខែកុម្ភ: ឆ្នាំ២០២៥ ម៉ោង០៦និង៣០នាទី ស្ថិតនៅចំណុចអូរត្រពាំងកូនទា ក្នុងភូមិក្រញូង ឃុំតាសៀម ស្រុកស្វាយលើ ខេត្តសៀមរាប ។ គ្រឿងឧបភោគបរិភោប និងថវិកាចូលរួមបុណ្យ ក្នុងសព១មាន៖- អង្ករ៩០គីឡូក្រាម មី២កេស ត្រីខ២យួរ មុង១ ភួយ១ សារុង១ ក្រមា១ និងថវិកា ៤សែនរៀល ដើម្បី ចូលរួម រំលែកទុក្ខ ដ៏ក្រៀមក្រំ ជាមួយក្រុមគ្រួសារ នៃសព ទាំង ២ គ្រួសារ នេះផងដែរ៕
ចែករំលែកព័តមាននេះ