ប្រទេស​ប្រេ​ស៊ី​ល ៖ វីរបុរស​បាល់ទាត់​ប្រេ​ស៊ី​ល លោក Ronaldo Nazario បាន​អះអាង​កាលពី​ពេល​ថ្មី​ៗ​នេះ​ថា សមត្ថភាព​លោក​ល្អ​ជាង Cristiano Ronaldo ប៉ុន្តែ​ទទួលស្គាល់​ថា សមត្ថភាព Lionel Messi ខ្ពស់​ជាង​។

ថ្លែង​នៅ​លើ​ទូរទស្សន៍ Romario TV ពិធីករ​បាន​ជំរុញ​ឱ្យ​មានការ​ប្រៀបធៀប​សមត្ថភាព​រវាង​លោក Ronaldo Nazario ខ្លួនឯង​ផ្ទាល់​ទៅ​នឹង​កីឡាករ​ល្អ​បំផុត​ក្នុង​ប្រវត្តិសាស្ត្រ​បាល់ទាត់​ជា​ច្រើន​នាក់​ផ្សេង​ទៀត រួម​មាន Thierry Henry, Erling Haaland, Robert Lewandowski, Adriano និង Cristiano Ronaldo ហើយដោយ​គ្មាន​ការ​ស្ទាក់​ស្ទើរនឹង​ឆ្លើយ​សំនួរ អតីត​ខ្សែប្រយុទ្ធ​ឆ្នើម​ក្រុម​សាំ​បា​ប្រេ​ស៊ី​លវ័យ​៤៨​ឆ្នាំ​រូប​នេះ បាន​បញ្ជាក់​ថា លោក​ល្អ​ជាង​កីឡាករ​ទាំង​ប្រាំ​ដែល​បាន​រៀបរាប់​។ ទោះជា​យ៉ាងណា​ក៏​ដោយ នៅ​ពេល​សួរ​អំពី Lionel Messi វិញ ស្រាប់តែ Ronaldo បាន​គិត​បន្តិច​មុន​ឆ្លើយ​ថា Messi ល្អ​ជាង​ខ្លួន​។

កន្លង​មក Ronaldo ប្រេ​ស៊ី​ល ធ្លាប់​បាន​លើក​សរសើរ Messi ថា​ជា​កីឡាករ​ល្អ​បំផុត​គ្រប់ពេល​ក្នុង​ប្រវត្តិសាស្ត្រ​។ លោក​ក៏​ធ្លាប់​ដាក់​ឈ្មោះ​កីឡាករ​១១​នាក់​ក្នុង​ក្តី​ស្រមៃ​របស់​ខ្លួន ដោយ​បញ្ចូល​ឈ្មោះ Messi ប៉ុន្តែ​គ្មាន Ronaldo ព័រ​ទុ​យ​ហ្គា​ល់​។ នៅ​ក្នុង​បទ​សម្ភាសន៍ កាលពី​ខែកញ្ញា ឆ្នាំ​២០២៤ ជាមួយនឹង​គេហទំព័រ goal.com លោក​ក៏​បាន​ប្រាប់​ឈ្មោះ​ខ្សែប្រយុទ្ធ​មាន​លក្ខណៈ​ពិសេស​បំផុត​នៅ​ក្នុង​ប្រវត្តិសាស្ត្រ​ដូច​ជា Messi, Ronaldinho, Diego Maradona និង Pele ។

ទោះជា​យ៉ាងណា​ក៏​ដោយ នៅ​ពេល​មួយ​នោះ Ronaldo ប្រេ​ស៊ី​ល​ក៏​បាន​ទទួលស្គាល់​ពី​ភាព​អស្ចារ្យ​របស់ Cristiano Ronaldo ផង​ដែរ ដោយ​ដាក់​ឈ្មោះ​ប្រធាន​ក្រុម​ជម្រើសជាតិ​ព័រ​ទុ​យ​ហ្គា​ល់​រូប​នេះ ក្នុង​ប​ញ្ចី​ក្រុម​កីឡាករ​ដ៏​អស្ចារ្យ​គ្រប់ពេល​ជាមួយ Maradona, Messi និង Pele ក្នុង​ចំណោម​កីឡាករ​ដ៏​អស្ចារ្យ​ផ្សេង​ទៀត​។

ស្ថិត​នៅ​ក្នុង​វ័យ​៤៨​ឆ្នាំ លោក Ronaldo Nazario បាន​បន្សល់​ទុក​កេរ្តិ៍​ដំណែល​បាល់ទាត់​ជា​ច្រើន​ទាំង​ក្លិប​អាជីព និង​ក្រុម​ជម្រើសជាតិ ជា​ពិសេស​តាម​រយៈ​ការ​ឈ្នះ​ពានរង្វាន់ FIFA World Cup ឆ្នាំ ១៩៩៤ និង ២០០២ និង​ការ​ឈ្នះ​ពានរង្វាន់​ឯកត្តជន FIFA World Player of the Year នៅ​ឆ្នាំ ១៩៩៦, ១៩៩៧ និង ២០០២​។

គ្រាប់​ដ៏​មាន​តម្លៃ​របស់​ប្រេ​ស៊ី​ល​រូប​នេះ ប្រកប​អាជីព​ជាមួយ​ក្លិប​កំពូល​ៗ​ជា​ច្រើន​រួម​ទាំង Barcelona, Inter Milan, Real Madrid និង AC Milan​។ នៅ​ក្នុង​បទ​សម្ភាសន៍​ជាមួយ​ទូរទស្សន៍ Romario TV លោក Ronaldo Nazario បាន​ចែករំលែក​ចំណូលចិត្ត​របស់​លោក​សម្រាប់​ក្លិប Real Madrid ជាង​ក្លិប Barcelona បើ​ទោះបីជា​មានសំណាង​លេង​ឱ្យ​ក្លិប​កំពូល​របស់​ពិភពលោក​ទាំង​ពីរ​យ៉ាង​ក៏​ដោយ​៕ ដកស្រង់ ៖ Sportskeeda និង VnExpress