បុរីវ៉ាទីកង់៖ បុរីវ៉ាទីកង់ថ្លែងថាសម្ដេចសង្ឃកាតូលិក ប៉ាបហ្វ្រង់ស៊ីស (Pope Francis) កំពុងធ្លាក់ខ្លួនឈឺធ្ងន់ មិនទាន់ដឹងថាព្រះអង្គអាចរួចផុតពីស្ថានភាពជំងឺនេះដោយជោគជ័យឬយ៉ាងណា។ សុខភាពរបស់ព្រះអង្គចាប់ផ្ដើមចុះទ្រុឌទ្រោមខ្លាំងឡើងៗនារយៈពេល២៤ម៉ោងចុងក្រោយនេះ។ នេះជាលើកទី១ដែលវ៉ាទីកង់ទទួលស្គាល់ថាស្ថានភាពជំងឺរបស់សម្ដេចឈានដល់ដំណាក់កាលធ្ងន់ធ្ងរ។ ឥឡូវនេះ ព្រះអង្គត្រូវដាក់បំពង់អុកស៊ីហ្សែនជាប់ជាប្រចាំ ហើយត្រូវបញ្ចូលឈាមជាបន្តបន្ទាប់។
សម្ដេចសង្ឃបាននិមន្តចូលមន្ទីរពេទ្យហ្គេមេលី (Gemelli) នៃទីក្រុងរ៉ូម ប្រទេសអ៊ីតាលី កាលពីថ្ងៃទី១៤ ខែកុម្ភៈបន្ទាប់ពីព្រះអង្គដកដង្ហើមថប់ៗជាច្រើនថ្ងៃ។ ក្រោយមក គ្រូពេទ្យធ្វើរោគវិនិច្ឆ័យឃើញថាព្រះអង្គមានជំងឺរលាកទងសួតទាំងសងខាង។ នៅក្នុងសេចក្ដីជូនដំណឹងកាលពីយប់ថ្ងៃសៅរ៍ បុរីវ៉ាទីកង់ថ្លែងថាសម្ដេចប៉ាបដែលមានព្រះជន្ម៨៨ព្រះវស្សាមានបញ្ហាផ្លូវដង្ហើមធ្ងន់ធ្ងររបៀបដូចជាជំងឺហឺតនៅពេលព្រឹក។ ដូច្នេះតម្រូវឱ្យប្រើប្រាស់បំពង់អុកស៊ីហ្សែនខ្នាតធំទើបអាចដកដង្ហើមបានធម្មតា។
វ៉ាទីកង់ថ្លែងបន្តទៀតថាស្ថានភាពជំងឺរបស់ព្រះអង្គនៅតែស្ថិតនៅក្នុងស្ថានភាពគ្រោះថ្នាក់។ ព្រះអង្គមិនទាន់រួចផុតពីគ្រោះថ្នាក់ដល់អាយុជីវិតនៅឡើយទេ។ ស្ថានភាពជំងឺថ្ងៃនេះកាន់តែធ្ងន់ជាងម្សិលមិញទៅទៀត។ ក្រៅពីដាក់បំពង់អុកស៊ីហ្សែនជាប់ជាប្រចាំ ព្រះអង្គត្រូវការបញ្ចូលឈាមជាបន្តបន្ទាប់ព្រោះគ្រាប់ឈាមធ្លាក់ចុះដោយសារព្រះអង្គមានជំងឺខ្វះគ្រាប់ឈាម។
វេជ្ជបណ្ឌិតអេនឌ្រា វីស៊ីនី (Andrea Vicini) ថ្លែងថាស្ថានភាពជំងឺស្ថិតនៅក្នុងដំណាក់កាលអាចគ្រប់គ្រងបាន។ ប៉ុន្តែរាងកាយរបស់ព្រះអង្គចាប់ផ្ដើមបង្ហាញសញ្ញាចុះខ្សោយខ្លាំងឡើងៗសឹងតែមិនអាចតស៊ូនឹងស្ថានភាពនេះបានតទៅទៀត។ ករណីដែលព្រះអង្គកើតជំងឺរលាកទងសួតទាំងសងខាងបែបនេះធ្វើឱ្យពិបាកដកដង្ហើម។ វ៉ាទីកង់ពិពណ៌នាស្ថានភាពជំងឺរបស់ព្រះអង្គថាមានលក្ខណៈស្មុគស្មាញ និងបង្កឡើងដោយមេរោគមួយ ឬពីរប្រភេទ។
វេជ្ជបណ្ឌិតសឺជីអូ អាល់ហ្វៀរី (Sergio Alfieri) ជាសមាជិកជាន់ខ្ពស់នៃមន្ទីរពេទ្យហ្គើមេលីប្រាប់ថាគេបារម្ភកំពុងបារម្ភខ្លាចក្រែងជំងឺរលាកទងសួតនេះរីករាលដាលទៅដល់ប្រព័ន្ធសរសៃឈាម ហើយធ្វើឱ្យមានប្រតិកម្មគ្រឿងក្នុង។ បើសិនជាឈានដល់ដំណាក់កាលនោះគឺពិបាកនឹងរស់។ សម្ដេចប៉ាបចាប់ផ្ដើមមានបញ្ហាសុខភាពធ្ងន់ធ្ងររយៈពេលពីរឆ្នាំចុងក្រោយនេះ។ ព្រះអង្គឧស្សាហ៍មានបញ្ហាសួតព្រោះព្រះអង្គកើតជំងឺរលាកសួតតាំងពីក្មេង និងធ្លាប់វះកាត់ចេញនូវសួតមួយផ្នែក៕
ចែករំលែកព័តមាននេះ