ទីក្រុងអូតាវ៉ា៖ នយោបាយរបស់លោកត្រាំធ្វើឱ្យកាណាដាដែលធ្លាប់ជាប្រទេសជាមិត្តចិត្តមួយថ្លើមមួយ និងជាប្រទេសភូមិផងរបងជាមួយនឹងអាមេរិកនោះចាប់ផ្ដើមក្លាយទៅជាមើលមុខគ្នាលែងចំទៅហើយឥឡូវនេះ។ លទ្ធផលស្ទង់មតិថ្មីៗនេះបង្ហាញថានៅក្នុងចំណោមប្រជាជនកាណដាដែលស្ទង់មតិ៤នាក់មានលើសពីម្នាក់ដែលចាត់ទុកអាមេរិកជាប្រទេសសត្រូវ។
អាមេរិក និងកាណាដាធ្លាប់ជាមហាមិត្តជាប្រវត្តិសាស្ត្រនឹងគ្នាជាយូរមកហើយ។ ប៉ុន្តែទំនាក់ទំនងរវាងប្រទេសទាំង២ចាប់ផ្ដើមល្វីងជូរចត់ខ្លាំងត្រឹមតែប៉ុន្មានខែចុងក្រោយនេះបន្ទាប់ពីលោកត្រាំអនុវត្តនយោបាយគ្មានមិត្ត គ្មានសត្រូវ មានតែផលប្រយោជន៍សម្រាប់ជាតិ។ ដូច្នេះពេលខ្លះប្រទេសធ្លាប់ជាមិត្តប្រែទៅជាសត្រូវបើគ្មានប្រយោជន៍សម្រាប់ប្រទេសរបស់លោក។
លោកត្រាំបានដំឡើងពន្ធ២៥%ទៅលើដែក និងអាលុយមីញ៉ូម ដោយអនុវត្តទៅលើប្រទេសទាំងអស់។ លោកដំឡើងពន្ធ២៥%ទៅលើទំនិញរបស់កាណាដា និងម៉ិកស៊ីកូព្រោះពួកគេបណ្ដោយឱ្យជនអន្តោប្រវេសន៍ និងគ្រឿងញៀនហូរចូលអាមេរិក។ សម្រាប់ពេលនេះ លោកព្យួរទុកការដំឡើងពន្ធរយៈពេល៣០ថ្ងៃដើម្បីទុកពេលឱ្យពួកគេចាត់ការទៅលើបញ្ហាទាំងនេះ។
លោកត្រាំនៅតែចិញ្ចឹមចិត្តចង់វាតទីខ្លាំងមែនទែននៅលើភូមិសាស្ត្រអន្តរជាតិ។ លោកចង់គ្រប់គ្រងព្រែកជីកប៉ាណាម៉ា, ចង់គ្រប់គ្រងតំបន់ហ្កាហ្សា និងចង់ដាក់បញ្ចូលកោះហ្គ្រីនលែន និងប្រទេសកាណាដាជាទឹកដីអាមេរិក។ គំនិតនេះត្រូវប្រជាជនកាណាដាប្រឆាំង។ លទ្ធផលស្ទង់មតិនេះបង្ហាញថាប្រទេសទាំង២ប្រេះឆាគ្នាដោយនិន្នាការនយោបាយ និងមនោគមន៍វិជ្ជា។
ការស្ទង់មតិពីថ្ងៃទី១៤-១៧ ខែកុម្ភៈបង្ហាញថាប្រជាជនកាណដា២៧%ចាត់ទុកអាមេរិកជាសត្រូវខណៈដែល៣០%ទៀតនៅតែចាត់ទុកអាមេរិកជាសម្ព័ន្ធមិត្តដដែល។ ក្រៅពីនេះ ២៧%នៅជាកណ្ដាល មានន័យថាមិនថាគិតថាជាមិត្ត ឬជាសត្រូវទេ។ នៅក្នុងការស្ទង់មតិនេះ គេបានសាកសួរជនជាតិកាណាដា១៥០០នាក់ និងជនជាតិអាមេរិក១០០០នាក់តាមអនឡាញ។
ប្រជាជនកាណាដារហូតដល់៧៤%ស្អប់លោកត្រាំ។ មានតែ១៣%ប៉ុណ្ណោះចូលចិត្តគាត់។ ការស្ទង់មតិនេះធ្វើឡើងបន្ទាប់ពីលោកត្រាំគំរាមដំឡើងពន្ធ២៥%ទៅលើទំនិញរបស់កាណាដា។ បើដូច្នេះមែន សេដ្ឋកិច្ចកាណាដានឹងរលាយហិនហោចជាមិនខានព្រោះប្រទេសនេះពឹងផ្អែកខ្លាំងបំផុតទៅលើការនាំចេញ។ ទំនិញ៧៥%របស់កាណាដានាំទៅលក់នៅអាមេរិក។
រដ្ឋមន្ត្រីក្រសួងពាណិជ្ជកម្មកាណាដាថ្លែងថាការដំឡើងពន្ធនឹងធ្វើបាបពលរដ្ឋអាមេរិកខ្លួនឯងទៅវិញទេ។ នៅពេលដំឡើងពន្ធ ទំនិញត្រូវតែលក់ថ្លៃជាងមុនដើម្បីកាត់កងគ្នាជាមួយពន្ធអាចបានចំណេញខ្លះ។ ហេតុនេះ ពលរដ្ឋអាមេរិកនឹងចំណាយកាន់តែច្រើនទៅលើជីវភាពរស់នៅប្រចាំថ្ងៃ។ រដ្ឋមន្ត្រីរូបនេះយល់ថានយោបាយដំឡើងពន្ធរបស់ត្រាំជាការឥតន័យ៕
ចែករំលែកព័តមាននេះ