ទីក្រុងយេរូសាឡឹម៖ ក្រុមហាម៉ាស់ត្រៀមដោះលែងចំណាប់ខ្មាំង៦នាក់ទៀតជាថ្នូរនឹងអ៊ីស្រាអែលដោះលែងអ្នកទោសប៉ាឡេស្ទីនរាប់រយនាក់ពីពន្ធនាគារដើម្បីអនុវត្តបទតាមឈប់បាញ់ដ៏ផុយស្រួយដែលរកកលនឹងដួលរលំម្ដងៗ។ មុនដំបូង អ៊ីស្រាអែលប្រុងកិចកុកឈប់អនុវត្តតាមបទឈប់បាញ់បន្ទាប់ពីខ្លួនទទួលបានសាកសពមនុស្សផ្សេងពីចំណាប់ខ្មាំងឈ្មោះស៊ីរី ប៊ីបាស់ (Shiri Bibas)។
ប៉ុន្តែអ្វីៗត្រូវបានដោះស្រាយចប់សព្វគ្រប់អស់ហើយ។ ចំណាប់ខ្មាំងឈ្មោះថាល់ សូហាម (Tal Shoham) វ័យ៤០ឆ្នាំ និងអាវេរ៉ា មេងហ្គីសស្ទូ (Avera Mengistu) វ័យ៣៩ឆ្នាំត្រូវក្រុមហាម៉ាស់ប្រគល់ទៅឱ្យទីភ្នាក់ងារកាកបាទក្រហមអន្តរជាតិនៅតំបន់រ៉ាហ្វា (Rafah)។ មិនយូរទេ ចំណាប់ខ្មាំង៤នាក់ទៀតក៏នឹងត្រូវដោះលែងផងដែរ លើកនេះនៅតំបន់ហ្កាហ្សាភាគកណ្ដាល។
អ្នកទាំង៦នេះជាចំណាប់ខ្មាំងដោះលែងចុងក្រោយគេនៅក្នុងចំណោម៣៣នាក់ចាប់តាំងពីអនុវត្តបទឈប់បាញ់ដំណាក់កាលទី១កាលពីថ្ងៃទី១៩ ខែមករា។ ពោលគឺ១ថ្ងៃមុនពេលលោកត្រាំស្បថចូលកាន់តំណែង។ ក្រោយពេលទទួលដំណឹងនេះ ជនជាតិអ៊ីស្រាអែលសប្បាយរកអ្វីប្រៀបផ្ទឹមពុំបានទេ។ ពួកគេប្រមូលផ្ដុំគ្នានៅទីក្រុងតែឡាវីវក្រោមតំណក់ភ្លៀង។ អ្នកខ្លះស្រែកហ៊ោរកញ្ជ្រៀវនៅពេលមើលឃើញរូបវីឌីអូដោះលែងចំណាប់ខ្មាំងដែលគេចាក់បញ្ចាំងនៅលើអេក្រង់ដ៏ធំមួយ។
នៅភាគខាងត្បូងប្រទេស គេឃើញមនុស្សឈរតម្រង់ជួរគ្នានៅតាមដងផ្លូវក្បែរព្រំដែនហ្កាហ្សាដើម្បីស្វាគមន៍ក្បួនរថយន្តដឹកចំណាប់ខ្មាំង។ អ៊ីស្រាអែលនឹងដោះលែងអ្នកទោសប៉ាឡេស្ទីន៦០២នាក់ពីពន្ធនាគារ។ ក្នុងចំណោមនោះ ៤៤៥នាក់ជាអ្នករស់នៅតំបន់ហ្កាហ្សាដែលត្រូវទាហានអ៊ីស្រាអែលចាប់បាននៅអំឡុងពេលមានសង្គ្រាម។ ក្រៅពីនេះ ជនជាតិប៉ាឡេស្ទីនរាប់សិបនាក់ទៀតត្រូវតុលាការអ៊ីស្រាអែលកាត់ទោសឱ្យជាប់ពន្ធគារយូរអង្វែង។ អ្នកខ្លះជាប់ពន្ធនាគារមួយជីវិត ឬពីរជីវិត។
បទឈប់បាញ់នេះថ្វីដ្បិតមានបញ្ហារអាក់រអួលខ្លះៗ ប៉ុន្តែបាននាំមកនូវភាពស្ងប់ស្ងាត់ឡើងវិញ។ ទោះជាយ៉ាងណាក្ដី គេមិនទាន់ដឹងច្បាស់ថាតើសង្គ្រាមនឹងបិទបញ្ចប់ទាំងស្រុង ឬយ៉ាងណាទេ។ ជាលទ្ធផលនៃសង្គ្រាមរយៈពេលជាងមួយឆ្នាំ ជនជាតិប៉ាឡេស្ទីន៤៨០០០នាក់បានស្លាប់, ផ្ទះសម្បែង និងហេដ្ឋារចនាសម្ព័ន្ធនៅហ្កាហ្សារងការខូចខាតស្ទើរតែក្លាយជាផេះ។
ជនស៊ីវិលប៉ាឡេស្ទីនរាប់សែននាក់ត្រូវរស់នៅក្នុងទីជម្រកបណ្ដោះអាសន្ន និងពឹងអាស្រ័យទៅលើស្បៀងអាហារដែលដឹកតាមរថយន្តផ្ដល់ជំនួយរបស់អង្គការអន្តរជាតិ។ ក្រុមហាម៉ាស់នៅតែបង្ហាញចេតនាចង់គ្រប់គ្រងតំបន់ហ្កាហ្សាជាបន្តទៀត។ ភាគីទាំង២ អ៊ីស្រាអែល និងហាម៉ាស់ថ្លែងថាខ្លួនចង់ចាប់ផ្ដើមការចរចាគ្នាដើម្បីបន្តអនុវត្តបទឈប់បាញ់ដំណាក់កាលទី២។
ក្រុមប្រទេសសម្របសម្រួលការចរចាអះអាងថាពួកគេនឹងជជែកគ្នា២ចំណុច ទី១-ការដកកងទ័ពអ៊ីស្រាអែលពីហ្កាហ្សា និងទី២-ការដោះលែងចំណាប់ខ្មាំងដែលនៅសេសសល់ចុងក្រោយ៦០នាក់។ គេជឿជាក់ថាពាក់កណ្ដាលនៃអ្នកទាំងនោះបានស្លាប់បាត់ទៅហើយ។ ការចរចាគ្នានៅតែរអាក់រអួលព្រោះមានបញ្ហាខ្វែងគំនិតគ្នាពាក់ព័ន្ធនឹងអនាគតនៃតំបន់ហ្កាហ្សា។
ជាជំហររបស់លោកត្រាំ លោកមិនចង់ឱ្យជនស៊ីវិលប៉ាឡេស្ទីនវិលទៅហ្កាហ្សាវិញទេ។ លោកចង់ឱ្យប្រទេសខ្លះដូចជាហ្សកដានី និងអេហ្ស៊ីបទទួលយកពួកគេឱ្យស្នាក់នៅ។ ចំណែកហ្កាហ្សាលោកចង់អភិវឌ្ឍទៅជាតំបន់លំហែកាយ។ ដោយឡែក ក្រុមប្រទេសអារ៉ាប់ប្រឆាំងនឹងផែនការរបស់ត្រាំ។ ពួកគេត្រៀមកោះប្រជុំនៅអារ៉ាប៊ីសាអូឌីត និងត្រៀមរៃអង្គាសលុយឱ្យបាន២០ពាន់លានដុល្លារនៅក្នុងរយៈពេលបីឆ្នាំដើម្បីកសាងតំបន់ហ្កាហ្សាឡើងវិញ។ ឥឡូវនេះ អ៊ីស្រាអែលកំពុងតែសម្រួចមាត់ បើក្រុមហាម៉ាសហ៊ានធ្វើអ្វីឱ្យឃ្នើសចិត្ត ខ្លួននឹងធ្វើតាមការចង់បានរបស់លោកត្រាំជាមិនខាន៕
ចែករំលែកព័តមាននេះ