ខេត្តសៀមរាប ៖ ចៅក្រមស៊ើបសួរនៃសាលាដំបូងខេត្តសៀមរាប សម្រេចឱ្យកម្លាំងនគរបាលការិយាល័យជំនាញបញ្ជូនជនសង្ស័យ២នាក់ទៅដាក់ពន្ធនាគាររួចហើយ ខណ:ជនសង្ស័យបានធ្វើសកម្មភាពលួចម៉ូតូពីប្រជាពលរដ្ឋនៅក្នុងស្រុកប្រាសាទបាគង ដែលប្រើប្រាស់ឯកសណ្ឋាន និងកាតសម្គាល់ខ្លួនក្លែងក្លាយ(អ្នកសារព័ត៌មាន,កាតអង្គការបរិស្ថាន) ។
កម្លាំងនគរបាលខេត្តសៀមរាបបានឱ្យដឹងថា ដោយមានការយកចិត្តទុកដាក់ជាប្រចាំពីសំណាក់លោកឧត្តមសេនីយ៍ទោ ហួត សុធី ស្នងការនគរបាលខេត្តសៀមរាប ចំពោះប្រជាពលរដ្ឋក្នុងខេត្តសៀមរាប ទាំងមូលអំពីបញ្ហាសន្តិសុខ សុវត្ថិភាព និងមានកិច្ចសម្របសម្រួលនីតិវិធីពីឯកឧត្តម មាស ច័ន្ទពិសិដ្ឋ ព្រះរាជអាជ្ញានៃអយ្យការអមសាលាដំបូងខេត្តសៀមរាប ។
សូមបញ្ជាក់ថា កាលពីថ្ងៃទី១៩ ខែកុម្ភៈ ឆ្នាំ២០២៥ នៅវេលាម៉ោង១១ និង០០នាទី មានករណីអំពើលួច (លួចម៉ូតូ) កើតហេតុនៅចំណុចទំនប់បឹងផ្ដៅ ស្ថិតក្នុងភូមិច្រេស ឃុំកណ្ដែក ស្រុកប្រាសាទបាគង ខេត្តសៀមរាប ។
សមត្ថកិច្ចបន្តថា បន្ទាប់ពីទទួលបានព័ត៌មានករណីខាងលើ លោកឧត្តមសេនីយ៍ទោស្នងការនគរបាលខេត្តសៀមរាប បានដាក់បទបញ្ជាដ៏ម៉ឺងម៉ាត់ចាត់មន្ត្រីក្រោមឱវាទ ឱ្យចុះធ្វើការស្រាវជ្រាវភ្លាមៗ រហូតឃាត់ខ្លួនជនសង្ស័យចំនួន២នាក់ ដែលជាមុខសញ្ញាប្រព្រឹត្តបទល្មើសយ៉ាងសកម្ម ក្នុងខេត្តសៀមរាប មានឈ្មោះដូចខាងក្រោម៖
១-ឈ្មោះ រឿម គង់ ភេទប្រុស អាយុ៤៥ឆ្នាំ មានទីលំនៅបច្ចុប្បន្នភូមិភ្នំក្រោម សង្កាត់សៀមរាប ក្រុងសៀមរាប ខេត្តសៀមរាប( បន្លំខ្លួនក្លែងក្លាយ ជា(អ្នកសារព័ត៌មាន) ។ ២-ឈ្មោះ ពុត កុសន ភេទប្រុស អាយុ៣២ឆ្នាំ មានទីលំនៅបច្ចុប្បន្ន ភូមិតានីធម្មជាតិ សង្កាត់រុនតាឯក ក្រុងរុនតាឯកតេជោសែន ខេត្តសៀមរាប បន្លំ(ខ្លួនក្លែងក្លាយអង្គការបរិស្ថាន)។
សមត្ថកិច្ចបន្ថែមថា នៅថ្ងៃទី១៩ ខែកុម្ភៈ ឆ្នាំ២០២៥ វេលាម៉ោង៨និង០០នាទីព្រឹក ជនរងគ្រោះឈ្មោះ រ៉េត រី ភេទប្រុស អាយុ៤៧ឆ្នាំ រស់នៅភូមិឃុនមោឃ ឃុំកណ្ដែក ស្រុកប្រាសាទបាគង បានជិះម៉ូតូចំនួន០១គ្រឿងម៉ាកសង់ សេរីឆ្នាំ២០២១ ពណ៌ខ្មៅ ពាក់ផ្លាកលេខសៀមរាប ១Ak-៦៦ ៣៣ លេខតួលេខម៉ាស៊ីន ៥៩២៣២២១ ទៅមើលលបដាក់ត្រី នៅចំណុចកើតហេតុ ពេលទៅដល់ជនរងគ្រោះបានទុកម៉ូតូក្បែរទំនប់ទឹក ហើយបានដកកូនសោដាក់ក្នុងហោប៉ៅ បន្ទាប់មកទៅមើលលបដែលដាក់ត្រី លុះដល់វេលាម៉ោង១១ និង០០នាទីថ្ងៃត្រង់ ជនរងគ្រោះបាន ត្រឡប់មកវិញ រកម៉ូតូក៏បាត់ ខណៈពេលនោះ ក៏បានរាយការណ៍ជូនសមត្ថកិច្ចមូលដ្ឋានថា មានចោលួចកាច់សោកម៉ូតូរបស់ខ្ញុំបាត់ហើយ។
ក្រោយពីទទួលបានព័ត៌មាន កម្លាំងផែនការងារនគរបាលព្រហ្មទណ្ឌ នៃស្នងការដ្ឋាននគរបាលខេត្តសៀមរាប សហការជាមួយកម្លាំងអធិការដ្ឋាននគរបាលស្រុកប្រាសាទបាគង ចុះធ្វើការស្រាវជ្រាវរហូតដល់វេលាម៉ោង១៣ និង០០នាទី ថ្ងៃខែឆ្នាំដដែល ទើបឃាត់ខ្លួនជនសង្ស័យ បានទាំង០២នាក់ រួចនាំខ្លួនយកមកសួរ នៅអធិការដ្ឋាននគរបាលស្រុកប្រាសាទ បាគង ហើយរៀបចំកសាងសំណុំរឿងបញ្ជូនទៅកាន់ការិយា ល័យនគរបាលជំនាញ ដើម្បីចាត់ការបន្តតាមនីតិវិធីច្បាប់។
យោងតាមចម្លើយសារភាព របស់ជនសង្ស័យទាំង០២នាក់ខាងលើ បានឆ្លើយថា ពួកខ្លួនទាំង០២នាក់ ពិតជាបានធ្វើ សកម្មភាពលួចម៉ូតូ របស់ជនរងគ្រោះខាងលើពិតប្រាកដមែន ហើយពួកខ្លួនបានធ្វើសកម្មភាពលួចច្រើនលើកក្នុងក្រុងសៀមរាប និងតាមបណ្ដាស្រុកផ្សេងទៀត ដោយប្រើប្រាស់រូបភាពជាអ្នកសារព័ត៌មាន ឬមន្ត្រីអង្កការបរិស្ថាន ជិះរកមើលម៉ូតូណាដែលទុកប្រហែស ពុំមានចាក់សោសុវត្ថិភាព ពួកខ្លួន ក៏បានធ្វើ សកម្មភាព លួច តែម្តង ខណៈពេលនោះ ដែលប្រជា ពលរដ្ឋឃើញ ពួកខ្លួនបានយកកាត់សម្គាល់ខ្លួន មកបង្ហាញ និងអះអាងថា ខ្លួនជាអ្នកសារព័ត៌មាន និង មន្ត្រីអង្កការ បរិស្ថាន ឃើញដូច្នោះ ក៏មិនស្មាន តែចោរ ក៏ ទុកម៉ូតូចោល រួច ហើយ ដើរ ទៅមើលលប នៅចំណុចទំនប់បឹងផ្ដៅដែលមានចម្ងាយឆ្ងាយ ពីភូមិ ។ ក្រុមចោរ ឃើញឱកាសល្អ កាច់សោរក ម៉ូតូ របស់ជនរងគ្រោះជិះគេចខ្លួនបាត់តែម្ដង។
សមត្ថកិច្ចបន្ថែមថា វត្តុតាងដែលសមត្ថកិច្ចដកហូតពីជន សង្ស័យមាន៖១-ម៉ូតូចំនួន២គ្រឿង -ទី១ ម៉ូតូ ម៉ាក់សង់ សេរីឆ្នាំ២០២១ ពណ៌ខ្មៅ ផ្លាកលេខសៀមរាប ១AK-៦៦៣៣ ជាមូ៉តូ( របស់ជនរងគ្រោះ ) និងម៉ូតូទី២ ម៉ាកសង់ សេរីឆ្នាំ ២០១៥ ឡើងតែម ២០១៦ ផ្លាកលេខសៀមរាប ១B-៦៨៥៣ លេខតួលេខម៉ាស៊ីន (ត្រូវបានឈូសលុប ដែលជារបស់ជនសង្ស័យជិះសម្រាប់ធ្វើសកម្មភាព ) -កូនសោរ ចំនួន៣ , ដង្កាប់ចំនួន៤ ,ម៉ាលេតចំនួន១ ,ខ្សែលួសមួយចំនួន (ឧបករណ៍សម្រាប់ប្រព្រឹត្តបទល្មើស មួយចំនួនផងដែរ)។
បច្ចុប្បន្ន ជនសង្ស័យទាំង០២នាក់ខាងលើ ត្រូវបានចៅក្រមសម្រេចឱ្យកម្លាំងនគរបាលការិយាល័យជំនាញ យកទៅឃុំ ខ្លួន ដាក់ពន្ធនាគារ រួចហើយ ពាក់ព័ន្ធនឹងករណីចំនួន០២ ទី១-ករណី អំពើលួច (លួចម៉ូតូ) មានស្ថានទម្ងន់។ ទី២ករណី ប្រើប្រាស់ឯកសារក្លែង។
ជាមួយគ្នានោះដែរ លោកឧត្តមសេនីយ៍ទោស្នងការ សូមធ្វើការអំពាវនាវ ដល់បងប្អូនក្នុងខេត្តសៀមរាបទាំងអស់ សូមបង្កើនការប្រុងប្រយ័ត្ន កុំធ្វេសប្រហែលទុកម៉ូតូចោលនៅតាមទីវាល ដោយពុំបានចាក់សោរសុវត្ថិភាព និងជាពិសេស កុំចាញ់បោកមុខសញ្ញា ដែលក្លែងខ្លួនជាអ្នកសារព័ត៌មាន ឬមន្ត្រីអង្កការបរិស្ថានដូចករណីខាងលើ៕
ចែករំលែកព័តមាននេះ