ទីក្រុងវ៉ាស៊ីនតោន៖ លោកត្រាំដកតំណែងនាយអគ្គសេនាធិការកងទ័ពអាមេរិក ឧត្ដមសេនីយ៍ប្រោន( Brown) និងដាក់ជំនួសឧត្ដមសេនីយ៍ផ្កាយបីចូលនិវត្តម្នាក់។ នេះជាផ្នែក១នៃការរុះរើសមាសភាពនៅក្នុងជួរថ្នាក់ដឹកនាំកំពូលៗនៃមន្ទីរបញ្ចកោណដើម្បីដកខ្សែរបស់លោកបៃដិនចេញដាក់ខ្សែរបស់លោកត្រាំជំនួស។ បើមិនដូច្នេះទេមិនអាចធ្វើការមិនស៊ីសង្វាក់គ្នាឡើយ។
លោកត្រាំអរគុណលោកប្រោនដែលខិតខំធ្វើការជាង៤០ឆ្នាំ រួមទាំងមុខតំណែងជានាយកអគ្គសេនាធិការកងទ័ពអាមេរិកផងដែរ។ លោកត្រាំថ្លែងថាមន្ត្រីយោធា៥រូបទៀតក៏ត្រូវដកតំណែងផងដែរ។ លោកប្រោនជាជនជាតិអាមេរិកស្បែកខ្មៅទី២នៅក្នុងប្រវត្តិសាស្ត្រអាមេរិកដែលកាន់តំណែងនេះ។ លោកជាអ្នកផ្ដល់យោបល់ទៅប្រធានាធិបតី និងរដ្ឋមន្ត្រីការពារជាតិ។
រដ្ឋមន្ត្រីការពារជាតិអាមេរិកធ្លាប់និយាយថាត្រូវដកតំណែងលោកប្រោនព្រោះគាត់មានជំហរផ្សេងពីនយោបាយរបស់លោកត្រាំ។ គាត់គាំទ្រពិពិធកម្ម, សមភាព និងកម្មវិធីបរិយាប័ណ្ណដទៃទៀតនៅក្នុងជួរកងទ័ព។ កាលយប់មិញ រដ្ឋមន្ត្រីការពារជាតិប្រកាសថាមន្ត្រីយោធា២នាក់ទៀតជាឧត្ដមនាវីជើងទឹក និងអគ្គសេនាធិការរងនៅកងទ័ពអាកាសក៏ត្រូវដកតំណែងដែរ។
អ្នកទាំងបីនេះតែងតាំងដោយលោកបៃដិន។ រដ្ឋមន្ត្រីការពារជាតិសរសេររៀបរាប់នៅក្នុងសេចក្ដីថ្លែងការណ៍ថានៅអាណត្តិរបស់លោកត្រាំ យើងដាក់មន្ត្រីយោធាដែលឱ្យតម្លៃខ្ពស់ទៅលើបេសកកម្មស្នូលរបស់យើងដើម្បីទប់ស្កាត់សង្គ្រាម, ប្រឡូកនៅក្នុងសង្គ្រាម និងមានជ័យជម្នះនៅក្នុងសង្គ្រាម។ លោកត្រាំនឹងតែងតាំងឧត្ដមសេនីយ៍ដាន់ខេន(Dan Caine) ជំនួសលោកប្រោន។ លោកខេនជាអ្នកបើកយន្តហោះ F-16 និងធ្លាប់បម្រើការជានាយករងស៊ីអាយអេ (CIA) ទទួលបន្ទុកកិច្ចការយោធា។
លោកប្រោនទើបតែចុះត្រួតពលបានប៉ុន្មានម៉ោងមុនពេលទទួលដំណឹងថាគាត់ត្រូវគេដកពីតំណែង។ តាមពិតលោកប្រោនត្រូវធ្វើការរហូតដល់ឆ្នាំ២០២៧ទើបផុតអាណត្តិ។ ប៉ុន្តែដំណឹងដកតំណែងចាប់ផ្ដើមផុលផុសនៅសប្ដាហ៍នេះ។ លោកប្រោនធ្លាប់មានជំហរកុងគ្នាជាមួយលោកត្រាំតាំងពីឆ្នាំ២០២០។ កាលនោះ គាត់ប្រឆាំងនឹងការរើសអើងជាតិសាសន៍ក្រោយការស្លាប់ចចផ្លយ (George Floyd) ដែលជាបុរសស្បែកខ្មៅត្រូវប៉ូលិសស្បែកស៣នាក់ព្រួតគ្នាជាន់សង្កត់ករហូតដល់ផុតដង្ហើម។
បន្ទាប់ពីស្បថចូលកាន់តំណែងកាលពីថ្ងៃទី២០ ខែមករា លោកត្រាំចាត់ការដកតំណែងមុនគេមេបញ្ជាការឆ្មាំការពារដែនសមុទ្រដែលជាស្ត្រី។ គាត់លើកហេតុផលថានៅក្នុងជួរកងទ័ពហាក់ដូចជាផ្ដោតសំខាន់ទៅលើឱកាសការងារសម្រាប់ស្ត្រីច្រើនពេក។ កាលពីខែវិច្ឆិកា រដ្ឋមន្ត្រីការពារជាតិថ្លែងថាមានបញ្ហារញ៉េរញ៉ៃច្រើននៅក្នុងជួរកងទ័ពដែលត្រូវដោះស្រាយ។
ជាដំបូងគេត្រូវតែដកតំណែងនាយអគ្គសេនាធិការកងទ័ពចេញសិន។ មន្ទីរបញ្ចកោណក៏ប្រកាសកាលពីយប់មិញផងដែរថាខ្លួននឹងកាត់បន្ថយខ្ទង់ថវិកាប្រើប្រាស់នៅក្នុងស្ថាប័នរបស់ខ្លួន និងត្រៀមបញ្ឈប់បុគ្គលិកធ្វើការសាកល្បង៥៤០០នាក់នៅសប្ដាហ៍ក្រោយ៕
ចែករំលែកព័តមាននេះ