រាជធានីភ្នំពេញ ៖ ម៉ូតូសណ្តោងរ៉ឺម៉កដឹកបន្លែ១គ្រឿង ខណៈពេលកំពុងបើកបរត្រឡប់មកពីលក់បន្លែនៅផ្សារទៅផ្ទះវិញ ស្រាប់បែកធ្លាយទុយោសាំងហូរស្រោចលើក្បាលប៊ូស៊ី បណ្តាលឲ្យឆាបឆេះចេញជាអណ្ដាតភ្លើងសន្ធោសន្ធៅបង្កឲ្យមានការភ្ញាក់ផ្អើលតាមដងផ្លូវ ។ ភ្លាមៗនោះ ប្រជាពលរដ្ឋអ្នកខ្លះបាននាំគ្នាយកទឹកជួយជះពន្លត់ និងខ្លះទៀតយកបំពង់ពន្លត់អគ្គិភ័យនាំបាញ់អស់ជាច្រើនបំពង់ទើបរលត់ទៅវិញទាំងស្រុង…
រាជធានីភ្នំពេញ ៖ ម៉ូតូសណ្តោងរ៉ឺម៉កដឹកបន្លែ១គ្រឿង ខណៈពេលកំពុងបើកបរត្រឡប់មកពីលក់បន្លែនៅផ្សារទៅផ្ទះវិញ ស្រាប់បែកធ្លាយទុយោសាំងហូរស្រោចលើក្បាលប៊ូស៊ី បណ្តាលឲ្យឆាបឆេះចេញជាអណ្ដាតភ្លើងសន្ធោសន្ធៅបង្កឲ្យមានការភ្ញាក់ផ្អើលតាមដងផ្លូវ ។
ភ្លាមៗនោះ ប្រជាពលរដ្ឋអ្នកខ្លះបាននាំគ្នាយកទឹកជួយជះពន្លត់ និងខ្លះទៀតយកបំពង់ពន្លត់អគ្គិភ័យនាំបាញ់អស់ជាច្រើនបំពង់ទើបរលត់ទៅវិញទាំងស្រុង ហើយម៉ូតូនោះរងការខូចខាតយ៉ាងដំណំ ។ ហេតុការណ៍នោះបានកើតឡើង កាលពីវេលាម៉ោង៩ព្រឹក ថ្ងៃទី២២ ខែកុម្ភៈ ឆ្នាំ២០២៥ នៅតាមផ្លូវជាតិលេខ៤ ត្រង់ចំណុចក្បែរសាលាសង្កាត់ចោមចៅទី៣ ស្ថិតនៅក្នុងភូមិថ្នល់បំបែក សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ ។
ប្រជាការពារបានប្រាប់ឲ្យដឹងថា ម៉ូតូសណ្ដោងកន្ទុយរ៉ឺម៉កដឹកបន្លែនោះម៉ាកស៊ីទីផ្លឹស សេ១០០កូរ៉េ ពណ៍ក្រហមគ្មានស្លាកលេខ ហើយនៅមុនពេលកើតហេតុ បុរសម្នាក់បានម៉ូតូសណ្ដោងកន្ទុយរ៉ឺម៉កនោះត្រឡប់មកមកពីលក់បន្លែនៅផ្សារសុភមង្គល ស្ថិតនៅក្នុងសង្កាត់កន្ទោក ខណ្ឌកំបូល ដោយមានស្ត្រីជាប្រពន្ធអង្គុយខាងក្រោយផងដែរ ។ ខណៈនោះបានធ្វើដំណើរតាមបណ្តោយផ្លូវជាតិលេខ៤ ក្នុងទិដៅពីលិចទៅកើត លុះពេលទៅដល់ត្រង់ចំណុចកើតហេតុ ស្រាប់បែកធ្លាយទុយោប្រេងសាំងហៀរហូរធ្លាក់លើក្បាលប៊ូស៊ី បណ្តាលឲ្យមានការឆាបឆេះយ៉ាងសន្ធោសន្ធៅ និងបង្កមានការភ្ញាក់ផ្អើតាមដងផ្លូវ ។
ពេលនោះ បុរសអ្នកបើកបរ និងប្រពន្ធរបស់គាត់បានលោតចុះចេញទាន់ ដោយឡែកប្រជាពលរដ្ឋដែលមានទីលំនៅតាមដងផ្លូវខាងលើបាននាំគ្នាយកទឹកជះ និងអ្នកខ្លះទៀតយកបំពង់ពន្លត់អគ្គិភ័យបាញ់ពន្លត់ទើបរលត់ទៅវិញទាំងស្រុង ។
ប្រភពដដែលបានប្រាប់ឲ្យដឹងបន្តទៀតថា នៅក្នុងហេតុការនេះមិនបានបណ្តាលឲ្យបុរសដែលជាអ្នកបើកបរ និងប្រពន្ធរបស់គាត់រងរបួសនោះឡើយ ប៉ុន្តែទំរាំតែពន្លត់រលត់បានបណ្ដាលឲ្យម៉ូតូនោះរងការខូចខាតយ៉ាងដំណំ ។
ក្រោយពេលកើតហេតុនគរបាលប៉ុស្តិ៍ចោមចៅទី៣បានចុះទៅពិនិត្យមើល ហើយបន្ទាប់ពីឃើញថា ពុំមានឆេះរាលដាលទៅបះពាល់ដល់អ្នកដ៏ទៃ និងមិនបណ្ដាលឲ្យមានអ្នករងរបួសនោះក៏បានអនុញ្ញាតឲ្យម្ចាស់នាំយកទៅធ្វើការជួសជុលឡើងវិញដោយខ្លួនឯង ៕
ចែករំលែកព័តមាននេះ