រាជធានីភ្នំពេញ ៖ កម្លាំងនគរបាលនាយកដ្ឋានប្រឆាំងបទល្មើសបច្ចេកវិទ្យា បានឃាត់ខ្លួនជនសង្ស័យប្រុសស្រីចំនួន ២នាក់ ដែលបានបង្កើតគណនីតេឡេក្រាមក្លែងក្លាយ ដាក់ឈ្មោះបន្លំដូចទៅនឹងគណនីតេឡេក្រាមផ្លូវការរបស់សម្ដេចតេជោ ប្រធានព្រឹទ្ធសភា ឆបោកប្រជាពលរដ្ឋ បានលុយជាង…
រាជធានីភ្នំពេញ ៖ កម្លាំងនគរបាលនាយកដ្ឋានប្រឆាំងបទល្មើសបច្ចេកវិទ្យា បានឃាត់ខ្លួនជនសង្ស័យប្រុសស្រីចំនួន ២នាក់ ដែលបានបង្កើតគណនីតេឡេក្រាមក្លែងក្លាយ ដាក់ឈ្មោះបន្លំដូចទៅនឹងគណនីតេឡេក្រាមផ្លូវការរបស់សម្ដេចតេជោ ប្រធានព្រឹទ្ធសភា ឆបោកប្រជាពលរដ្ឋ បានលុយជាង ១៨ម៉ឺនដុល្លារអាមេរិក ។
យោងតាមនាយកដ្ឋានប្រឆាំងបទល្មើសបច្ចេកវិទ្យា បានឲ្យដឹងនៅថ្ងៃទី២១ ខែកុម្ភៈ ឆ្នាំ២០២៥នេះថា តាមបទបញ្ជារបស់នាយឧត្ដមសេនីយ៍ ស ថេត អគ្គស្នងការនគរបាលជាតិ និងតាមការចង្អុលណែនាំពីឧត្ដមសេនីយ៍ឯក ឌី វិជ្ជា អគ្គស្នងការរងនគរបាលជាតិ កាលពីថ្ងៃទី១៦ ខែកុម្ភៈ ឆ្នាំ២០២៥ បានបើកការស្រាវជ្រាវ និងឈានដល់ការបង្ក្រាប ករណីឆបោកក្រោមរូបភាពបោកបញ្ឆោតឱ្យជនរងគ្រោះដាក់ប្រាក់ដើម្បីវិនិយោគ ដោយទទួលបានប្រាក់ចំណេញច្រើន ក្នុងរយៈពេលខ្លី ។
នាយកដ្ឋានប្រឆាំងបទល្មើសបច្ចេកវិទ្យា បានបន្តថា ក្រុមជនល្មើសបានបង្កើតគណនីតេឡេក្រាមក្លែងក្លាយ ដែលបានដាក់ឈ្មោះបន្លំដូចទៅនឹង Channel Telegram តេឡេក្រាមផ្លូវការរបស់សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជា ដើម្បីធ្វើអោយមានការជឿជាក់ និងដាក់ប្រាក់វិនិយោគ ។
នាយកដ្ឋានប្រឆាំងបទល្មើសបច្ចេកវិទ្យា បន្តឲ្យដឹងទៀតថា ដោយមានការសម្របសម្រួលពីអយ្យការអមសាលាដំបូងរាជធានីភ្នំពេញ នាយកដ្ឋាន បានធ្វើការឃាត់ខ្លួនជនសង្ស័យ២នាក់ រួមមាន ៖
ទី១-ឈ្មោះ ក.ស.ន ភេទស្រី មុខរបរ ធ្វើការនៅហាងកែសម្ផស្ស ។
ទី២-ឈ្មោះ ប.ត.ម ភេទប្រុស មុខរបរ សន្តិសុខចំណតរថយន្ត នៅផ្សារទំនើប។
នាយកដ្ឋានប្រឆាំងបទល្មើសបច្ចេកវិទ្យា បានបញ្ជាក់ថា តាមការស្រាវជ្រាវរបស់សមត្ថកិច្ច បានរកឃើញថា ជនសង្ស័យទាំង២ បានឆបោកប្រាក់ជនរងគ្រោះប្រហែលជាង ១៨ម៉ឺនដុល្លាសហរដ្ឋអាមេរិក ។
បច្ចុប្បន្ន ជនសង្ស័យទាំង២នាក់ខាងលើ ត្រូវបាននាយកដ្ឋាន កសាងសំណុំរឿងបញ្ជូនទៅកាន់សាលាដំបូងរាជធានីភ្នំពេញ ដើម្បីចាត់ការតាមនីតិវិធី ។
ពាក់ព័ន្ធទៅនឹងករណីក្លែងបន្លំគណនីតេឡេក្រាមផ្លូវការរបស់សម្ដេចតេជោ ខាងលើនេះ កាលពីថ្ងៃទី១៥ ខែកុម្ភៈ ឆ្នាំ២០២៥ កន្លងមកនេះ សម្ដេចតេជោ ហ៊ុន សែន ប្រធានព្រឹទ្ធសភាកម្ពុជា បានប្រាប់ឲ្យបុគ្គល ដែលបានបង្កើតគណនី តេឡេក្រាមក្លែងក្លាយ ដោយបានយករូប និងឈ្មោះសម្ដេច ត្រូវបិទជាបន្ទាន់ ។
នៅលើគណនីហ្វេសប៊ុកសម្ដេចតេជោ បានបង្ហោះ នូវរូបពីរសន្លឹក ដោយភ្ជាប់នៅខ្លឹមសារទាំងស្រុងថា ៖ ថ្មីៗនេះ មានគណនី តេឡេក្រាមមួយ ឈ្មោះ « Samdech Hun Sen of Cambodia » ជាមួយរូបភាពសម្ដេចតេជោ ដូចបានភ្ជាប់ជូន បានធ្វើការផ្ញើសារទំនាក់ទំនងទៅគណនី តេឡេក្រាមរបស់ប្រជាពលរដ្ឋជាច្រើន ពិសេសក៏បានឆាតចូលក្នុងក្រុម : Samdech Hun Sen of Cambodia Chat ផងដែរ ។
គណនីតេឡេក្រាមខាងលើនេះ ជាគណនីក្លែងក្លាយ ដែលបានដាក់ឈ្មោះបន្លំ ដូចទៅនឹង Channel Telegram ផ្លូវការរបស់ សម្ដេចតេជោ ប្រធានព្រឹទ្ធសភា « Samdech Hun Sen of Cambodia» ដែលគណនីតេឡេក្រាមផ្លូវការតែ១គត់របស់ សម្ដេចតេជោប្រធានព្រឹទ្ធសភា និងមានសញ្ញា ធិក verified ពណ៌ខៀវពីក្រុមហ៊ុនតេឡេក្រាម ។ សូមបងប្អូនប្រជាពលរដ្ឋ ដែលទទួលបានសារ ពីគណនីក្លែងក្លាយនេះ សូមមានការប្រុងប្រយ័ត្នខ្ពស់ ។ បុគ្គលដែលបានបង្កើតគណនីនេះ សូមបិទជាបន្ទាន់ ៕
ចែករំលែកព័តមាននេះ