ទីក្រុងរ៉ង់ហ្គូន៖ ថ្ងៃនេះ ប្រទេសភូមាប្រគល់បុគ្គលិកជាជនជាតិចិនដែលបម្រើការនៅក្នុងមជ្ឈមណ្ឌលឆបោកទៅឱ្យអាជ្ញាធរថៃដើម្បីបញ្ជូនត្រឡប់ទៅមាតុភូមិរបស់ពួកគេវិញតាមជើងយន្តហោះពិសេស។ ចំណាត់ការនេះធ្វើឡើងនៅពេលប្រទេសថៃបន្តចាត់វិធានយ៉ាងក្ដៅគគុកទៅលើក្រុមឧក្រិដ្ឋជនឆបោកដែលសម្ងំលាក់ខ្លួនធ្វើសកម្មភាពនៅតាមព្រំដែនថៃ-ភូមា។
ទន្ទឹមនឹងនោះ ថៃក៏រៀបចំបញ្ជូនមនុស្ស៧ពាន់នាក់ដែលភូមាប្រគល់ឱ្យកាលពីប៉ុន្មានថ្ងៃមុនត្រឡប់ទៅប្រទេសរបស់ពួកគេផងដែរ។ ជនជាតិចិនត្រូវវិលត្រឡប់ទៅមុនគេតាមជើងយន្តហោះចាប់ពីថ្ងៃទី២០-២២ ខែកុម្ភៈ។ ប៉ុន្មានអាទិត្យទៅមុខទៀត អាជ្ញាធរនឹងសម្រុកដឹកជញ្ជូនមនុស្សរាប់ពាន់នាក់ដែលបម្រើការនៅមជ្ឈមណ្ឌលឆបោក និងដែលទើបតែរំដោះបានថ្មីៗ។
ទីតាំងឆបោកទាំងនោះគ្រប់គ្រងដោយមេម៉ាស់ផ្ចាធំៗដែលកើបលុយរាប់ពាន់លានដុល្លារ។ អ្នកដែលត្រូវគេរំដោះបានបានប្រាប់ថាពួកគេត្រូវគេល្បួងទៅធ្វើការនៅទីនោះដើម្បីបោកបញ្ឆោតជនរងគ្រោះនៅទូទាំងពិភពលោកឱ្យចូលទៅក្នុងអន្ទាក់របស់ពួកគេដោយប្រើប្រាស់បណ្ដាញអ៊ីនធឺណិត។ របបសឹកយោធាភូមាថ្លែងថាជនជាតិចិន៣រយនាក់ដែលទើបតែរំដោះបានថ្ងៃនេះបានប្រគល់ទៅឱ្យភាគីថៃគ្រប់ចំនួនអស់ហើយដោយឆ្លងកាត់ស្ពានមិត្តថៃ-ភូមានៅស្រុកមេសូត (Mae Sot)។
របបសឹកក៏កំពុងធ្វើការយ៉ាងដុតដៃដុតជើងដើម្បីរកមុខ, ចាប់ខ្លួន និងចាត់ការទៅលើជនជាតិបរទេសទាំងឡាយណាដែលជាប់ពាក់ព័ន្ធ ឬជាមេខ្លោងធំៗដែលបើកដំណើរការមជ្ឈមណ្ឌលឆបោកតាមអនឡាញ។ អ្នកនាំពាក្យក្រសួងការបរទេសចិនវាយតម្លៃខ្ពស់ចំពោះការចាត់វិធានការលឿនដូចផ្លេកបន្ទោររួមគ្នារវាងចិន ភូមា និងថៃដើម្បីចាត់វិធានការទៅលើរឿងនេះ។
លោកថ្លែងថាចិន និងប្រទេសដទៃទៀតប្ដេជ្ញាបោសសម្អាតល្បែងអនឡាញ និងអំពើឆបោកឆ្លងដែនដើម្បីការពារជីវិតរស់នៅ និងផលប្រយោជន៍ស្របច្បាប់របស់ជនជាតិចិន។ តាមរយៈវីឌីអូផ្សាយផ្ទាល់នៅលើទូរទស្សន៍ថៃ គេឃើញមនុស្សជាច្រើនបានឡើងជិះរថយន្តបឺស២ជាន់ និងឡើងជិះយន្តហោះរបស់ក្រុមហ៊ុនអាកាសចរណ៍ចិនត្រឡប់ទៅមាតុភូមិវិញ។
ជនជាតិចិន៥០នាក់បានឡើងជិះយន្តហោះនៅម៉ោង១០:៤០ព្រឹកថ្ងៃសុក្រ។ ប្រទេសចិនក៏បានបញ្ជូនយន្តហោះ៥គ្រឿងទៀតដើម្បីដឹកជញ្ជូនជនជាតិរបស់ខ្លួនជាបន្តបន្ទាប់ពេញ១ថ្ងៃសុក្រ។ រហូតដល់ថ្ងៃសៅរ៍សប្ដាហ៍នេះទើបជនជាតិចិននៅវគ្គទី១អាចដឹកជញ្ជូនអស់។ នៅពេលអាជ្ញាធរសាកសួរ ពួកគេប្រាប់ថាពួកគេក៏ជាជនរងគ្រោះដែរដែលត្រូវគេល្បួងទៅធ្វើការនៅទីនោះ។ ប៉ុន្តែអាជ្ញាធរចិនមិនទាន់ជឿជាក់ទាំងស្រុងទេ។ នៅពេលទៅដល់ប្រទេសចិនត្រូវសាកសួរពួកគេបន្ថែមទៀត។
អ្នកដែលចាប់បញ្ជូនទៅវិញនេះក៏ត្រូវជាប់នៅក្នុងបញ្ជីខ្មៅរបស់ថៃផងដែរ។ អាជ្ញាធរថៃបានប្រើប្រាស់វិធីស្កេនអត្តសញ្ញាណរបស់ពួកគេដើម្បីទប់ស្កាត់មិនឱ្យពួកគេប្រើប្រាស់ទឹកដីថៃធ្វើជាកន្លែងប្រព្រឹត្តអំពើឧក្រិដ្ឋ ឬជាកន្លែងឆ្លងកាត់សម្រាប់ទង្វើនេះនាពេលអនាគត។ នាយករដ្ឋមន្ត្រីថៃក៏បានជួបសមភាគីឡាវផងដែរដើម្បីសហការគ្នាចាត់ការទៅលើមជ្ឈមណ្ឌលឆបោកនៅតាមព្រំដែនប្រទេសទាំង២៕
ចែករំលែកព័តមាននេះ