រាជធានីភ្នំពេញ ៖ រថយន្តធុនធំ សណ្តោងកន្ទុយរ៉ឺម៉ក ១គ្រឿង បានបើកក្នុងល្បឿនលឿន បន្ទាប់មក បានបត់ចូលទៅក្នុងយានដ្ឋានមួយកន្លែង ហើយក៏ជ្រុលទៅបុកម៉ូតូ ខ្ទាតផ្លោងចូលទៅក្នុងប្រឡាយទឹកស្អុយ…
រាជធានីភ្នំពេញ ៖ រថយន្តធុនធំ សណ្តោងកន្ទុយរ៉ឺម៉ក ១គ្រឿង បានបើកក្នុងល្បឿនលឿន បន្ទាប់មក បានបត់ចូលទៅក្នុងយានដ្ឋានមួយកន្លែង ហើយក៏ជ្រុលទៅបុកម៉ូតូ ខ្ទាតផ្លោងចូលទៅក្នុងប្រឡាយទឹកស្អុយ បណ្តាលឲ្យស្ត្រីអ្នកជិះម៉ូតូម្នាក់ រងរបួសធ្ងន់បាក់ដៃផង និងបាក់ជើងផង ចំណែកបុរសអ្នកឌុប រងរបួសស្រាល ហើយរថយន្តនោះ បានបន្ថែមល្បឿន គេចចូលទៅក្នុងយានដ្ឋានខាងលើបាត់ ។
ឧប្បត្តិហេតុនោះ បានកើតឡើងកាលពីវេលាម៉ោង១០ព្រឹកថ្ងៃទី២១ ខែកម្ភៈ ឆ្នាំ២០២៥ នៅតាមមហាវិថីឈ្នះឈ្នះ ស្ថិតនៅក្នុងភូមិត្រពាំងធ្នង់ សង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញ ។
រថយន្តបង្កខាងលើ មិនត្រូវបានគេស្គាល់ម៉ាកនោះទេ ចំណែកស្ត្រី ដែលជាជនរងគ្រោះ ឈ្មោះ ពុធ សុជា អាយុ២៧ឆ្នាំ មុខរបរកសិករ រងរបួសធ្ងន់បាក់ជើង និងបាក់ដៃខាងឆ្វេង។ រីឯម្នាក់ទៀត ឈ្មោះ ធីម អាយុ២៤ឆ្នាំ មុខរបរកសិករ ជាអ្នកឌុបរងរបួសស្រាល ហើយអ្នកទាំង២នាក់នេះ មានស្រុកតំណើត នៅឃុំព្រែកអញ្ចាញ ស្រុកមុខកំពូល ខែត្តកណ្តាល ។
សាក្សី នៅកន្លែងកើតហេតុ បានប្រាប់ឲ្យដឹងថា នៅវេលាម៉ោងខាងលើ ជនរងគ្រោះទាំង២នាក់ បានជិះម៉ូតូ ១គ្រឿង ម៉ាកហុងដាឌ្រីមសេ១២៥ ស៊េរីឆ្នាំ២០១៥ ពណ៍ខ្មៅ ពាក់ស្លាកលេខភ្នំពេញ 1FI-9934 ចេញពីស្រុកកំណើតឆ្ពោះទៅកាន់ខេត្តកំពង់ស្ពឺ ។ ខណៈនោះបានធ្វើដំណើរតាមមហាវិថីឈ្នះឈ្នះ ក្នុងទិសដៅពីជើងទៅត្បូង លុះពេលមកដល់ត្រង់ចំណុចកើតហេតុ ស្រាប់តែរថយន្តធុនធំ សណ្តោងកន្ទុយរ៉ឺម៉ក ១គ្រឿងនោះ បើកបរក្នុងទិសដៅស្របគ្នា ទៅបត់ចូលយានដ្ឋានមួយស្ថិតនៅក្បែរនោះ ជ្រុលទៅបុកម៉ូតូពីក្រោយទាំងកំរោល តែម្ដង ។
សាក្សី ដដែលបានប្រាប់ឲ្យដឹងបន្តទៀតថា ពេលនោះ បានបណ្ដាលឲ្យខ្ទាតផ្លោងទាំងមនុស្ស និងម៉ូតូចូលទៅក្នុងប្រឡាយទឹកស្អុយ រងរបួសធ្ងន់ម្នាក់ និងស្រាលម្នាក់ បន្ទាប់មករថយន្តបង្ក បានបើកចូលទៅក្នុងយានដ្ឋាននោះបាត់។ ក្រោយពេលឃើញបែបនេះ ប្រជាពលរដ្ឋ ដែលស្ថិតនៅជិតនោះ រួមទាំងអ្នកដំណើរតាមផ្លូវ បានជួយស្រង់ទាំងជនរងគ្រោះ និងម៉ូតូឡើងលើគោក រួចហៅរថយន្តពេទ្យដឹកយកស្ត្រីរងគ្រោះ របួសធ្ងន់ ទៅសង្គ្រោះនៅមន្ទីពេទ្យជាតិ តេជោសន្តិភាព ។
ដោយឡែក នគរបាលប៉ុស្តិ៍សំរោងក្រោម និងនគរបាលខណ្ឌពោធិ៍សែនជ័យ បានចុះទៅកាន់កន្លែងកើតហេតុ រួចបានហៅខាងភាគីរថយន្តបង្ក ឲ្យជួបធ្វើការសម្របសម្រួលគ្នា ជាមួយភាគីជនរងគ្រោះ នៅកន្លែងកើតហេតុ ប៉ុន្តែមិនបានដឹងថា ត្រូវរ៉ូវគ្នាបែបណាឡើយ ៕
ចែករំលែកព័តមាននេះ