ខេត្តព្រះសីហនុ ៖ រឿងដីធ្លីក៏មានហេតុការណ៍ចូលកាប់ប្លន់ និងដុតផ្ទះប្រជាពលរដ្ឋទាំងយប់ បណ្តាលឲ្យមនុស្សរងរបួសចំនួន២នាក់ដំបូង កាលពីវេលាម៉ោង១ និង២០នាទីរំលងអធ្រាត្រចូលថ្ងៃទី២១ កុម្ភៈ ស្ថិតនៅចំណុចអូរដា ក្នុងភូមិពូធឿង…
ខេត្តព្រះសីហនុ ៖ រឿងដីធ្លីក៏មានហេតុការណ៍ចូលកាប់ប្លន់ និងដុតផ្ទះប្រជាពលរដ្ឋទាំងយប់ បណ្តាលឲ្យមនុស្សរងរបួសចំនួន២នាក់ដំបូង កាលពីវេលាម៉ោង១ និង២០នាទីរំលងអធ្រាត្រចូលថ្ងៃទី២១ កុម្ភៈ ស្ថិតនៅចំណុចអូរដា ក្នុងភូមិពូធឿង សង្កាត់បិតត្រាំង ក្រុងកំពង់សោម ខេត្តព្រះសីហនុ ។
អាជ្ញាធរបានឲ្យដឹងថា មានករណីហិង្សាមួយកើតឡើងបង្កដោយជនសង្ស័យមួយក្រុម មានគ្នាប្រហែល២០នាក់មិនស្គាល់អត្តសញ្ញាណ្ណ បានធ្វើសកម្មភាពចូលវាយកាប់ និងដុតផ្ទះប្រជាពលរដ្ឋ បណ្តាលឱ្យមានមនុស្សរងរបួសចំនួន២នាក់ ១-ឈ្មោះ សឿង សុភក្រ័ ភេទប្រុស អាយុ៥៦ឆ្នាំ (មុខរបរយោធា) ស្នាក់នៅផ្ទះកើតហេតុចំណុចអូរដា (រងបួសក្បាលធ្ងន់) ២-ឈ្មោះ ចាយ ចាន់ ភេទប្រុស អាយុ២៩ឆ្នាំ (មុខរបរកម្មករ) ស្នាក់នៅផ្ទះ ចំណុចកើតហេតុ (រងរបួសស្រាល) ខូចខាតឆេះផ្ទះ ចំនួន៤ខ្នង និងម៉ូតូ២គ្រឿង ។
បើតាមការបំភ្លឺរបស់ឈ្មោះហេង វត្តី ភេទស្រី អាយុ២៩ឆ្នាំ (ជាប្រពន្ធជនរងគ្រោះ )បានឱ្យដឹងថា មុនកើតហេតុ ឮសម្លេងក្ឌូងក្តាំង និងស្រែកឱ្យចេញៗពីផ្ទះបើមិនចេញដុតផ្ទះចោល ។ ភ្លាមៗនោះក៏ក្រោកឡើងមើលឃើញឆេះផ្ទះអ្នកជិតខាងហើយក៏ចុះដើទៅមើល ស្រាប់តែក្រុមជនបង្កកាប់គាត់១កាំបិតតែម្តង បណ្តាលឱ្យរងបួសត្រង់ក្បាល ។ ក្រោយកើតហេតុ ត្រូវបានក្រុមគ្រួសារនាំទៅព្យាបាលនៅមន្ទីរពេទ្យបង្អែក ខេត្តព្រះសីហនុ ហើយបច្ចុប្បន្នបញ្ជូនបន្តទៅមន្ទីពេទ្យភ្នំពេញ ។
ដោយឡែក លោក.ឈុំ ឡឺ ដែលជាប្រជាពលរដ្ឋរស់ក្នុងទីតាំងកើតហេតុបានបញ្ជាក់បន្ថែមថា ចំពោះទីតាំងកើតហេតុខាងលើ មានប្រជាពលរដ្ឋជាក់ស្ដែងប្រមាណជាង300គ្រួសារដែលបានអាស្រ័យផលជាយូរឆ្នាំមកហើយ ពុំដែលមានបញ្ហាឡើយ ទើបតែនៅមួយរយៈចុងក្រោយនេះ ខណៈពេលដែលក្រុមការងារជំនាញសុរិយោដីចុះមកធ្វើការវាស់វែងចុះបញ្ជីលក្ខណៈប្លង់ប្រព័ន្ធរួចរាល់ ស្រាប់តែមានបណ្ដឹងជំទាស់ដោយចោទពួកគាត់ថា បានមករកនៅលើដីរបស់គេទៅវិញ ។
រហូតមកដល់កំឡុងខែមករា ឆ្នាំ2025 បានលេចមុខមនុស្សមួយក្រុម សុទ្ធតែពាក់មួកសុវត្ថិភាពនិងពាក់ម៉ាស់ ដឹករបងថ្មមុខបម្រុងហ៊ុមដីដែលពួកគាត់កំពុងរស់នៅ ប៉ុន្តែត្រូវបានពួកគាត់រារាំង។
រហូតមកដល់ថ្ងៃ១១ ខែកុម្ភៈ ឆ្នាំ 2025 ស្រាប់តែមានលិខិតអញ្ជើញពីស្នងការដ្ឋាននគរបាលខេត្តព្រះសីហនុ ជម្រាបមកលោកសឿង សុភ័ក្ត្រ ដែលជាជនរងគ្រោះឲ្យទៅបំភ្លឺនៅស្នងការដ្ឋាននគរបាលខេត្តព្រះសីហនុ នៅថ្ងៃទី20 ខែកុម្ភៈ ឆ្នាំ២០២៥ តាមបណ្ដឹងរបស់ឈ្មោះ ផល គឹមវីរៈ ប៉ុន្តែដោយក្នុងលិខិតអញ្ជើញជាឯកសារខុសកាលបរិច្ឆេទ ទើបលោកសឿងសុភ័ក្រ ពុំបានចូលខ្លួនទៅបំភ្លឺនៅស្នងការរដ្ឋាននគរបាលខេត្តព្រះសីហនុទេ ។
នៅយប់កើតហេតុលាម៉ោង១រំលងអធ្រាត្រ ឈានចូលថ្ងៃទី២១ ខែកុម្ភៈ ស្រាប់តែមានជនអនាមិកមួយក្រុម មានគ្នាប្រមាណ៦០នាក់ បែងចែកជាច្រើនក្រុមដោយមួយក្រុមមានគ្នាប្រមាណ20នាក់ចូលបិទបារ៉ែតភ្លើង និងដុតកម្ទេចផ្ទះ ។ ខណៈនោះបងប្អូនប្រជាពលរដ្ឋបានស្រែកឆោឡោ និងបានរត់ទៅជួយផ្ទះដែលឆេះ តែត្រូវជនអនាមិកស្ទាក់កាប់យ៉ាងសាហាវ សំណាងល្អពុំមានប្រជាពលរដ្ឋណាបាត់បង់ជីវិត គឺមានតែរងរបួសធ្ងន់និងស្រាលចំនួន4នាក់ ។
ក្រោយហេតុការណ៍ដ៏អាក្រក់នេះ ក្រុមជនសង្ស័យគេចខ្លួនបាត់អស់ បើទោះបីជាសមត្ថកិច្ចមកជួយអន្តរាគមន៍យ៉ាងណាក្តី បានត្រឹមតែវត្ថុតាងដែលបានបន្សល់ទុកនៅកន្លែងកើតហេតុ រួមមាន៖ ១-សាំង ចំនួន៦ដប ២-កាំបិត និងផ្គាក់១ដើម ។
បច្ចុប្បន្ន កម្លាំងមូលដ្ឋានកងរាជអាវុធហត្ថក្រុងកំពង់សោម កំពុងសហការជាមួយកម្លាំងអធិការដ្ឋាននគរបាលក្រុងកំពង់សោម និងប៉ុស្តិ៍រដ្ឋបាលសង្កាត់បិតត្រាំង កំពុងស្រាវជ្រាវតាមស្វែងរកក្រុមមុខសញ្ញាបង្ក ទាំងនោះ ដើម្បីចាត់ការតាមច្បាប់ ៕
ចែករំលែកព័តមាននេះ