ទីក្រុងម៉ូស្គូ៖ វិមានក្រឹមឡាំងថ្លែងថាប្រទេសអាមេរិក និងរុស្ស៊ីយល់គ្នាទៅវិញទៅមកថាចាំបាច់ត្រូវតែមានកិច្ចជំនួបកម្រិតកំពូលរវាងលោកត្រាំ និងលោកពូទីនដើម្បីដោះស្រាយបញ្ហាអ៊ុយក្រែនឱ្យជ្រះស្រឡះជាស្ថាពរ។ ប៉ុន្តែសេចក្ដីលម្អិតនៃគម្រោងជួបគ្នាមិនទាន់ត្រូវប្រទេសទាំង២កំណត់ឱ្យបានជាក់លាក់នៅឡើយទេ។ អ្នកនាំពាក្យរុស្ស៊ី លោកប៉េស្កូស ថ្លែងថាភាគីទាំង២បានឯកភាពគ្នានៅក្នុងកិច្ចជំនួបដំបូងនៅទីក្រុងរីយ៉ាត ប្រទេសអារ៉ាប៊ីសាអូឌីត ថាថ្នាក់ដឹកនាំទាំង២គួរតែជួបគ្នា។
ថ្នាក់ដឹកនាំទាំង២ក៏បានបង្ហាញចេតនាចង់ជួបមុខគ្នាដោយផ្ទាល់ដើម្បីជជែកគ្នាផងដែរ។ លោកប៉េស្កូសថ្លែងថាប្រធានាធិបតីទាំង២ពិតជាអន្ទះសាចង់ជួបមុខគ្នាជាខ្លាំង ហើយក៏បានណែនាំឱ្យមន្ត្រីក្រោមឱវាទត្រៀមរៀបចំគម្រោងជួបគ្នាជាបណ្ដើរៗផងដែរ។ លោកយល់ថាប្រទេសទាំង២ត្រូវការជជែកពិភាក្សាគ្នានៅក្នុងដំណាក់កាលត្រៀមជួបគ្នាកម្រិតកំពូលនេះ។
ក្រោយកិច្ចជំនួបរវាងគណៈប្រតិភូអាមេរិក និងរុស្ស៊ីកាលពីថ្ងៃអង្គារ លោកត្រាំប្រកាសថាលោកអាចនឹងជួបលោកពូទីននៅក្នុងខែកុម្ភៈនេះតែម្ដងក៏អាចថាបាន។ ចំណែកលោកពូទីនក៏បានថ្លែងកាលពីថ្ងៃពុធផងដែរថាគម្រោងជួបគ្នា (កម្រិតកំពូល) ត្រូវតែរៀបចំឱ្យបានប្រយ័ត្នប្រយែងដើម្បីធានាថាមិនមែនជួបគ្នាឥតប្រយោជន៍ទេ ជួបគ្នាហើយចេញជាលទ្ធផលតែម្ដង។
កាលពីយប់ថ្ងៃព្រហស្បតិ៍ រដ្ឋមន្ត្រីការបរទេសអាមេរិក លោករូប៊ីយ៉ូ ថ្លែងថាគម្រោងជួបគ្នារវាងលោកត្រាំ និងលោកពូទីនអាស្រ័យមួយផ្នែកធំទៅលើការចរចាគ្នារីកចម្រើនកម្រិតណា។ ជាពិសេស លោកត្រាំចង់ដឹងថាតើលោកពូទីនមានឆន្ទៈមោះមុតកម្រិតណានៅក្នុងការបញ្ចប់សង្គ្រាម។
លោកប៉េស្កូសបញ្ជាក់ថាលោកពូទីនបើកចិត្តទូលាយជានិច្ចនៅក្នុងគម្រោងចរចាគ្នាដើម្បីដោះស្រាយជម្លោះ។ យើងមានគោលដៅរបស់យើងដែលជាប់ទាក់ទងយ៉ាងជិតស្និទ្ធទៅនឹងសន្តិសុខជាតិ និងផលប្រយោជន៍ជាតិរបស់យើង ហើយយើងត្រៀមខ្លួនសម្រេចឱ្យបានគោលដៅនេះតាមរយៈការចរចាសន្តិភាព។
អ្នកនាំពាក្យវិមានក្រឹមឡាំងក៏សូមច្រានព័ត៌មានចុះផ្សាយនៅលើទំព័រសារព័ត៌មាន ហ្វានណាន់សល ថាមស៍ (Financial Times) ដែលថានៅក្នុងកិច្ចជំនួបនៅអារ៉ាប៊ីសាអូឌីត ភាគីរុស្ស៊ីបានទាមទារឱ្យអង្គការណាតូដកកម្លាំងរបស់ខ្លួនដែលកំពុងឈរជើងនៅតំបន់អឺរ៉ុបខាងកើត។ នេះជាអ្វីដែលរុស្ស៊ីធ្លាប់ទាមទារនៅពេលចរចាគ្នាដំបូងៗបន្ទាប់ពីសង្គ្រាមទើបតែផ្ទុះឡើងបានប៉ុន្មានខែ។
ពាក់ព័ន្ធនឹងកិច្ចជំនួបនៅអារ៉ាប៊ីសាអូឌីតនោះ លោកប៉េស្កូសយល់ថាសម្រាប់ពេលនេះ លោកមិនទាន់អាចធ្វើអត្ថាធិប្បាយថាតើប្រតិបត្តិការយោធាដែលរុស្ស៊ីបានដាក់ចេញនោះសម្រេចតាមផែនការកម្រិតណាទេ។ លោកថាប្រតិបត្តិការនេះនៅតែបន្តធ្វើដូចភ្លៀងរលឹម។ គោលដៅដែលលោកពូទីនដាក់ចេញក្នុងនាមជាប្រមុខរដ្ឋ និងជាអគ្គបញ្ជាការកងទ័ពរុស្ស៊ីត្រូវតែសម្រេចឱ្យបាន៕
ចែករំលែកព័តមាននេះ