រឿងព្រំដែនរវាងកម្ពុជា និងថៃ បានក្លាយជាប្រធានបទរសើបជាថ្មីនៅសប្តាហ៍នេះពាក់ព័ន្ធនឹងស្ថានការណ៍ដែលកើតមាន នៅប្រាសាទតាមាន់ ក្រោយរឿងកោះគុតរាងដូចជាស្បើយបន្តិច ។ ប៉ុន្តែទោះបីជាយ៉ាងណាក៏ដោយ គ្រប់គ្នាគួរតែប្រុងប្រយ័ត្ន ហើយកុំឲ្យរឿងព្រំដែននេះក្លាយជាហ្គេមនយោបាយរបស់គេ ។…
រឿងព្រំដែនរវាងកម្ពុជា និងថៃ បានក្លាយជាប្រធានបទរសើបជាថ្មីនៅសប្តាហ៍នេះពាក់ព័ន្ធនឹងស្ថានការណ៍ដែលកើតមាន នៅប្រាសាទតាមាន់ ក្រោយរឿងកោះគុតរាងដូចជាស្បើយបន្តិច ។ ប៉ុន្តែទោះបីជាយ៉ាងណាក៏ដោយ គ្រប់គ្នាគួរតែប្រុងប្រយ័ត្ន ហើយកុំឲ្យរឿងព្រំដែននេះក្លាយជាហ្គេមនយោបាយរបស់គេ ។
បាតុភាពនៅប្រាសាទតាមាន់ បានកំពុងតែផុលផុសនៅលើបណ្តាញសង្គម ហើយកំពុងក្លាយជាប្រធានបទក្តៅគគុកកើតមានឡើង ទាំងនៅក្នុងប្រទេសកម្ពុជា និងនៅក្នុងប្រទេសថៃ ហើយអ្នកនយោបាយទាំងនៅថៃ និងអ្នកនយោបាយកម្ពុជានៅក្រៅប្រទេសមួយចំនួនបានកំពុងកញ្ជ្រោកស្ថានការណ៍បន្ថែម ។
ក្រុមអ្នកនយោបាយទាំងនេះបានកំពុងតែប្រើប្រាស់នូវទស្សនៈ និងមនោគមវិជ្ជាបែបជាតិនិយមជ្រុល ដើម្បីកេងចំណេញនយោបាយពីបញ្ហានេះ ។ ដោយព្រួយបារម្ភអំពីកំណើននៃកម្សួលក៏ដូចជា រលកនៃចលនាជាតិនិយមជ្រុលនេះបង្កើនផ្កាភ្លើងនយោបាយនៅក្នុងប្រទេសទាំងពីរសម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានថ្លែងនូវសារនយោបាយដ៏កម្រមួយពាក់ព័ន្ធនឹងរឿងព្រំដែនរវាងប្រទេសទាំងពីរ ពោល គឺកម្ពុជា និងថៃ។ សម្តេចធិបតីបានលើកឡើងថា ពាក់ព័ន្ធនឹងបញ្ហានេះពីណាក៏គិតដែរមិនមែនមានតែអ្នកជាតិនិយមនោះទេ ប៉ុន្តែរឿងព្រំដែនមិនមែនជារឿងងាយស្រួលដោះនោះឡើយ ។
សម្តេចធិបតីបានឲ្យដឹងបន្ថែម កាលពីថ្ងៃទី១៩ ខែកុម្ភៈ ឆ្នាំ២០២៥ថា សម្រាប់កិច្ចការព្រំដែនរវាងកម្ពុជាជាមួយនឹងថៃ គឺមានមួយផ្នែកមានការកំណត់ និងបោះបង្គោលរួចរាល់ ហើយមួយកំណាតទៀតមិនមានបង្គោលទេ គឺមានផែនទី គឺឆ្នាំ១៩០៨ និងសន្ធិសញ្ញាដែលធ្វើដោយក្រុមគណកម្មការព្រំដែនរបស់ឥណ្ឌូចិនក៏ដូចជា ឯកសារយល់ព្រមដោយភាគីទាំងពីរជាគោល ហើយភាគីទាំងពីរបានកំពុងតែបន្តធ្វើការចរចាដែលកិច្ចការនេះ គឺធ្វើតាំងពីឆ្នាំ១៩៩៨ ។
ជាការពិត មកដល់ពេលនេះ រឿងព្រំដែននេះ មិនមែនជារឿងងាយស្រួលទេ ប្រទេសធំ គឺនៅតែបន្តឈ្លោះគ្នាមិនទាន់ចប់នៅឡើយទេ ដូចជា ករណីជម្លោះព្រំដែនរវាងជប៉ុន និងរុស្ស៊ី បញ្ហាព្រំដែនរវាងចិន និងឥណ្ឌា ហើយនឹងព្រំដែន ថៃ និងម៉ាឡេស៊ី ជាដើម ។
ពាក់ព័ន្ធនឹងកិច្ចការព្រំដែននេះ នាយករដ្ឋមន្ត្រីកម្ពុជាបានផ្ញើសារជាលើកទី១ទៅកាន់អ្នកនយោបាយបរទេស ។ សម្តេចបានលើកឡើងថា «ខ្ញុំសូមយកឱកាសនោះបញ្ជូនសារទៅអ្នកនយោបាយទាំងអស់ទាំងកម្ពុជា និងថៃ សូមកុំយករឿងនយោបាយមកពាក់ព័ន្ធ និងកិច្ចការបច្ចេកទេសឲ្យសោះ ។ ពីព្រោះអ្នកនយោបាយអត់ដឹងកិច្ចការភូមិសាស្ត្រដូចអ្នកបច្ចេកទេសទេ ។ សូមទុកអោយអ្នកបច្ចេកទេសគេធ្វើការដោះស្រាយដោយឈរលើមូលដ្ឋានច្បាប់អន្តរជាតិ និងបច្ចេកទេស ។ អ្នកនយោបាយថៃ សូមកុំយករឿងនេះទៅជំរុញរកការចំណេញនយោបាយហើយ យកហេតុផលដែលមិនអាចយកជាការបាន» ។
សម្តេចធិបតីបានបន្ថែមយ៉ាងច្បាស់ថា កម្ពុជាមានគោលជំហរច្បាស់ណាស់ ដោយយកមូលដ្ឋាននៅលើច្បាប់អន្តរជាតិនៅក្នុងការថែរក្សាអធិបតេយ្យជាតិរបស់ខ្លួនពោល គឺកម្ពុជារកវិធីដោះស្រាយបញ្ហាដែលបន្សល់ទុកពីមុនតាមរយៈយន្តការដែលយើងបានឯកភាពគ្នាផ្លូវការដែលមានគណកម្មការព្រំដែនចម្រុះកម្ពុជាថៃ ហើយធ្វើការផ្អែកលើមូលដ្ឋានច្បាប់អន្តរជាតិផែនទីដែលយើងបានឯកភាពគ្នា ។
កម្ពុជាចង់ដោះស្រាយដោយសន្តិវិធី ប៉ុន្តែកម្ពុជាក៏រក្សាសិទ្ធិនៅក្នុងការការពារខ្លួនគ្រប់មធ្យោបាយ រួមទាំងការប្រើប្រាស់កម្លាំងប្រដាប់អាវុធ ប្រសិនបើប្រទេសណាប្រើប្រាស់កម្លាំងប្រដាប់អារុធមកឈ្លានពានប្រទេសកម្ពុជា ។
នៅក្នុងឱកាសនោះ សម្តេចធិបតិក៏បានលើកឡើង និងពិពណ៌នានាអំពីគ្រោះថ្នាក់នៃចលនាជាតិនិយមជ្រុលដែលបណ្តាលឲ្យពលរដ្ឋនៃប្រទេសទាំងពីររងគ្រោះចន្លោះពីឆ្នាំ២០០៨ ដល់២០១១ ដែលជាពេលដែលកម្ពុជា និងថៃផ្ទុះអាវុធនៅតាមខ្សែរបន្ទាត់ព្រំដែនជួរមុខ ជាពិសេស គឺនៅទិសប្រាសាទព្រះវិហារ។
នេះ គឺជាការលើកឡើងរបស់ប្រមុខរដ្ឋាភិបាលកម្ពុជា ពាក់ព័ន្ធនឹងគ្រោះថ្នាក់នៃអ្វីដែលគេហៅថាជាចលនាជាតិនិយមជ្រុល ។
សរុបទៅ ដើម្បីកុំអោយជាតិមានគ្រោះថ្នាក់សង្គម និងប្រជាពលរដ្ឋ សូមប្រុងប្រយ័ត្ននឹងចលនាក៏ដូចជា សកម្មភាពដែលបម្រើឲ្យក្រុមអ្នកនយោបាយជាតិនិយមជ្រុល ។ នរណាក៏ស្នេហារជាតិហើយស្រលាញ់ព្រំដែនដូចគ្នា ប៉ុន្តែប្រសិនបើយើងជ្រុលកុំភ្លេចថា គេក៏ស្រលាញ់យើងក៏ស្រលាញ់ ។ រឿងព្រំដែនទុកឲ្យអ្នកបច្ចេកទេសគេធ្វើការ ដោយឈរនៅលើច្បាប់ ផែនទី លិខិតតូបករណ៍ សន្ធិសញ្ញា កិច្ចព្រមព្រៀងនានា មិនមែនសំអាងនៅលើសម្តី និងសំណេរនៅលើបណ្តាញសង្គមនោះឡើយ ៕
ចែករំលែកព័តមាននេះ