រាជធានី​ភ្នំពេញ ៖ ក្រុមហ៊ុន SpaceX របស់​មហាសេដ្ឋី​អា​មេ​រិ​ក គឺ​លោក Elon Musk សិក្សា​ពី​លទ្ធភាព​នាំ​យក​អ៊ីនធឺណិត​ផ្កាយ​រណប​ល្បឿន​លឿន Starlink មក​កាន់​ប្រទេស​កម្ពុជា នៅ​ក្នុង​ឆ្នាំ​២០២៥​នេះ ។

នៅ​ព្រឹក​ថ្ងៃ​ទី​២០ ខែកុម្ភៈ ឆ្នាំ​២០២៥ នៅ​វិមាន​សន្ដិភាព សម្ដេច​មហា​បវរ​ធិ​បតី ហ៊ុន ម៉ា​ណែ​ត នាយក​រដ្ឋមន្ត្រី នៃ​ព្រះរាជាណាចក្រ​កម្ពុជា បាន​អនុញ្ញាត​ឱ្យ​លោកស្រី Rebecca Hunter នាយិកា​ទីផ្សារ នៃ​ក្រុមហ៊ុន SpaceX-Starlink របស់​លោក Elon Musk ចូល​ជួប​សម្ដែង​ការ​គួរសម និង​ពិភាក្សា​ការងារ ។

ក្នុង​ឱកាស​នៃ​ជំនួប លោកស្រី​នាយិកា​ទីផ្សារ​បាន​គោរព​ជម្រាប​ជូន​សម្ដេច​បវរ​ធិ​បតី​អំពី​ប្រតិបត្តិការ នៃ​សេវាកម្ម​របស់​ក្រុមហ៊ុន SpaceX – Starlink និង​បាន​គូសបញ្ជាក់​ថា កម្ពុជា គឺជា​គោលដៅ​អាទិភាព​ខ្ពស់ សម្រាប់​ការ​វិនិយោគ​របស់​ក្រុមហ៊ុន នៅ​ក្នុង​ឆ្នាំ​២០២៥ ។

លោកស្រី​នាយិកា​ទីផ្សារ​ក៏​បាន​គោរព​ជម្រាប​ជូន​សម្តេច​បវរ​ធិ​បតី​ថា គណៈប្រតិភូ​របស់​លោកស្រី ក៏​នឹង​មាន​ជំនួប​ពិភាក្សា​ការងារ​ជាមួយ​ក្រសួង​-​ស្ថាប័ន​ពាក់ព័ន្ធ​របស់​កម្ពុជា នៅ​ក្នុង​ឱកាស​នៃ​ដំណើរ​ទស្សនកិច្ច​នេះ​ផង​ដែរ ។

ជា​ការ​ឆ្លើយ​តប សម្ដេច​បវរ​ធីប​តី​បាន​សម្ដែង​នូវ​ការ​ស្វាគមន៍ និង​ក្ដី​សោមនស្ស​រីករាយ​ចំពោះ​ក្រុមហ៊ុន ដែល​បង្ហាញ​អំពី​ចំណាប់អារម្មណ៍​ក្នុង​ការ​ស្វែងរក​ឱកាស​វិនិយោគ ក៏​ដូច​ជា​ការ​ផ្សារ​ភ្ជាប់​ទំនាក់ទំនង​ជាមួយនឹង​រាជរដ្ឋាភិបាល​កម្ពុជា ។

សម្ដេច​បវរ​ធិ​បតី​ក៏​បាន​គូសបញ្ជាក់​អំពី​ការ​ដាក់​ចេញ​នូវ​គោលនយោបាយ​របស់​រាជរដ្ឋាភិបាល ក្នុង​ការ​អភិវឌ្ឍ​វិស័យ​បច្ចេកវិទ្យា ដើម្បី​ឆ្លើយ​តប​ទៅ​នឹង​កា​រវិ​វ​ឌ្ឍ​ដ៏​ឆាប់រហ័ស នៃ​បច្ចេកវិទ្យា នា​ពេល​បច្ចុប្បន្ន ។

ឆ្លៀត​ក្នុង​ឱកាស​នោះ សម្ដេច​បវរ​ធិ​បតី ក៏​បាន​លើកទឹកចិត្ត​ឱ្យ​លោកស្រី ដែល​ជា​តំណាង​ក្រុមហ៊ុន បន្ត​ផ្សារ​ភ្ជាប់​ទំនាក់ទំនង និង​ពិភាក្សា​ជាមួយ​ក្រសួង​-​ស្ថាប័ន​ពាក់ព័ន្ធ​របស់​កម្ពុជា ដើម្បី​ជំរុញ​ការ​ស្វែងរក​ឱកាស​វិនិយោគ នៅ​កម្ពុជា ។

នៅ​រសៀល​ថ្ងៃ​ទី​២០ ខែកុម្ភៈ ឆ្នាំ​២០២៥ ឯកឧត្តម ជា វ៉ា​ន់​ដេ​ត រដ្ឋមន្ត្រីក្រសួង​ប្រៃសណីយ៍ និង​ទូរគមនាគមន៍ បាន​អនុញ្ញាត​ឱ្យ​លោកស្រី Rebecca Hunter នាយិកា​ទីផ្សារ នៃ​ក្រុមហ៊ុន SpaceX – Starlink ជួប​សម្ដែង​ការ​គួរសម និង​ពិភាក្សា​ការងារ នៅ​ទីស្ដីការក្រសួង​ប្រៃសណីយ៍​និង​ទូរគមនាគមន៍ ។

ក្នុង​ជំនួប​នេះ​ដែរ ឯកឧត្តម​រដ្ឋមន្ត្រី បាន​ស្វាគមន៍​យ៉ាង​កក់ក្តៅ​ចំពោះ​លោកស្រី និង​សហការី ជា​ពិសេស​ក្រុមហ៊ុន SpaceX – Starlink ដែល​បង្ហាញ​អំពី​ចំណាប់អារម្មណ៍​ក្នុង​ការ​ស្វែងរក​ឱកាស​វិនិយោគ​នៅ​កម្ពុជា​។ ជាមួយ​គ្នា​នេះ ឯកឧត្តម​រដ្ឋមន្ត្រី បាន​លើកទឹកចិត្ត​ឱ្យ​ក្រុមហ៊ុន​ពិភាក្សា​ការងារ​បន្ត​ជាមួយ​និយ័ត​ករ​ទូរគមនាគមន៍​កម្ពុជា លើ​ការងារ​បច្ចេកទេស​ផ្សេង​ៗ ។

សូម​ជម្រាប​ផង​ដែរ​ថា Starlink គឺជា​គម្រោង​មួយ​របស់​ក្រុមហ៊ុន SpaceX របស់​លោក Elon Musk ។ គម្រោង​នេះ​មាន​គោលបំណង​ផ្តល់​សេវា​អ៊ីនធឺណិត​ដោយ​ប្រើប្រាស់​ផ្កាយ​រណប ហើយ​បាន​ផ្តល់​សេវា​អ៊ីនធឺណិត​ដល់​អតិថិជន​នៅ​ក្នុង​ប្រទេស​ជា​ច្រើន និង​កំពុង​ពង្រីក​សេវាកម្ម​របស់​ខ្លួន​ទៅ​កាន់​តំបន់​ផ្សេង​ៗ​ទៀត​។ សេវា​នេះ ពេញ​និយម​ដោយសារ​តែ​វា​អាច​ផ្តល់​អ៊ីនធឺណិត​ល្បឿន​លឿន ជា​ពិសេស​សម្រាប់​អ្នក​ដែល​រស់នៅ​តំបន់​ដាច់​ស្រយាល ៕