ពលរដ្ឋកំពុងជាប់បំណុលលំនៅស្ថាន ជាមួយនឹងបុរីបានលើកឡើងថា ពួកគេពិតជាចង់ណាស់ នៅក្នុងការផ្ទេរបំណុលរបស់ពួកគេពីបុរីទៅគ្រឹះស្ថានធនាគារ ។ ប៉ុន្តែទោះបីជាយ៉ាងណាក៏ដោយបំណងរបស់ពួកគេ គឺត្រូវរាំងស្ទះនៅត្រង់ពួកគេមិនគ្រប់តាមលក្ខខណ្ឌកំណត់ដែលគ្រឹះស្ថានធនាគារ ឬស្ថាប័នហិរញ្ញវត្ថុផ្លូវការនានាទាមទារ ។ ប្រជាពលរដ្ឋម្នាក់ដែលសុំមិនបញ្ចេញឈ្មោះបានឲ្យដឹងថា…
ពលរដ្ឋកំពុងជាប់បំណុលលំនៅស្ថាន ជាមួយនឹងបុរីបានលើកឡើងថា ពួកគេពិតជាចង់ណាស់ នៅក្នុងការផ្ទេរបំណុលរបស់ពួកគេពីបុរីទៅគ្រឹះស្ថានធនាគារ ។ ប៉ុន្តែទោះបីជាយ៉ាងណាក៏ដោយបំណងរបស់ពួកគេ គឺត្រូវរាំងស្ទះនៅត្រង់ពួកគេមិនគ្រប់តាមលក្ខខណ្ឌកំណត់ដែលគ្រឹះស្ថានធនាគារ ឬស្ថាប័នហិរញ្ញវត្ថុផ្លូវការនានាទាមទារ ។
ប្រជាពលរដ្ឋម្នាក់ដែលសុំមិនបញ្ចេញឈ្មោះបានឲ្យដឹងថា នរណាក៏ដឹងដែរថា លក្ខខណ្ឌនៃការសងប្រាក់ និងលក្ខខណ្ឌច្បាប់របស់ធនាគារវាអំណោយផលជាងបុរីដែរ ប៉ុន្តែសំខាន់លក្ខខណ្ឌតម្រូវការរបស់ធនាគារវាខ្ពស់ ។ ដូច្នេះហើយ បានជាពលរដ្ឋបន្តនៅផុងខ្លួនជាមួយនឹងការបន្តបង់រំលោះជាមួយនឹងម្ចាស់បុរី ។
លោកបានបន្តថា នៅពេលដែលលោកបានសម្រេចចិត្តធ្វើការទិញផ្ទះល្វែងមួយនៅម្តុំផ្លូវវេងស្រេង លោកបានដើរសើបសួរធនាគារជាច្រើន ប៉ុន្តែធនាគារណាក៏ដូចជា ធនាគារណាដែរ គឺមិនអោយទេ ដោយសារតែលោក និងគ្រួសារមិនគ្រប់តាមលក្ខខណ្ឌដែលស្ថាប័នពួកគេត្រូវការ ។
លោកបានបន្តថា ធនាគារណាក៏ដូចជា ធនាគារណាដែរ គឺគេទាមទាររបាយការណ៍ហិរញ្ញវត្ថុ ប៉ុន្តែសម្រាប់លោកដែលជាអ្នកលក់ដូរចល័តតាមម៉ូតូមានរបាយការណ៍នោះពីណាមក គឺមានតែលុយសន្សំបន្តិចបន្តួចប្រចាំថ្ងៃ ។ ដូច្នេះហើយក៏សម្រេចចិត្តបង់រំលោះជាមួយនឹងបុរីតែម្តង ។ លោកបានបន្តថា «នរណាក៏ដឹងថា បង់បុរីវាយ៉ាប់រឿងការប្រាក់ ហើយអាចនឹងត្រូវបុរីរឹបអូស បើយើងបង់មិនទាន់ ប៉ុន្តែសំខាន់ គឺបុរីហ៊ានលក់អោយយើង ហើយយើងត្រូវការផ្ទះក៏ចេះតែតស៊ូទៅ ទោះយើងលុយមិនគ្រប់ក៏ដោយ» ។
មន្ត្រីបម្រើការនៅអង្គការក្រៅរដ្ឋាភិបាលម្នាក់ផ្សេងទៀត បានលើកឡើងថា នៅមុនពេលរៀបការលោកនៅផ្ទះជួល ហើយក្រោយពេលសន្សំប្រាក់រៀបការលោកពិតជាត្រូវការផ្ទះសមរម្យមួយរស់នៅ ប៉ុន្តែ ដើម្បីបានផ្ទះរស់នៅសមរម្យ ប្រសិនបើចង់ខ្ចីពីធនាគារគេទាមទារយ៉ាងហោចណាស់៣០ភាគរយទើបធនាគារយល់ព្រមឲ្យខ្ចី ។
លោកបានបញ្ជក់ថា «ដោយសារតែបែបនេះ ហើយខាងបុរីគេហ៊ានឲ្យសោរយើងចូលនៅផ្ទះគេទើបសង់រួចដោយទាមទារឲ្យយើងបង់ប្រចាំខែក៏ប្រថុយទៅដោយគិតថា បង់បុរីបង់ច្រើនតែវាប្រសើរជាងបង់ផ្ទះជួល ។ ប៉ុន្តែឥឡូវចំណូលយ៉ាប់ចង់រកធនាគារឡើងវិញក៏នៅតែមិនគ្រប់លក្ខខណ្ឌរឿងតម្រូវការ៣០ភាគរយមុននេះដដែល»។
លោកបានបន្តថា ការដែលលោកប្រថុយបែបនេះ ដោយសារតែបើរង់ចាំបានផ្ទះដែលមានតម្លៃសមរម្យហើយមានទីតាំងនៅក្រុងទម្រាំនឹងសន្សំបាន៣០ភាគរយ វានឹងឡើងថែមទៀត ។ ដូច្នេះក៏សម្រេចចិត្តពីព្រោះខ្លាចរង់ចាំផ្ទះចេះតែទៅឆ្ងាយៗហើយតម្លៃចេះតែឡើង ។
លោកបានបន្តថា កាលពេលដែលមានប្រាក់ខែច្រើន ប្រពន្ធមានមុខរបររកចំណូលបានគួរសមមិនអីទេ ចេះតែមានលទ្ធភាពបង់ ។ ប៉ុន្តែឥឡូវនេះ ជីវភាពកំពុងស្រុត ព្រោះការងារក៏ជិតចប់កុងត្រា ហើយរបរប្រពន្ធក៏រកចំណូលមិនសូវបានចេះតែខ្លាចស្ទះលុយបុរីគេរឹបអូស ។
កាលពីដើមខែមករា ឆ្នាំ២០២៥ កន្លងទៅនេះ មានកិច្ចប្រជុំមួយរវាងធនាគារជាតិនៃកម្ពុជា ជាមួយនឹងក្រសួងរៀបចំដែនដីនគរូបនីយកម្ម និងសំណង់ ក៏ដូចជា តំណាងសមាគមមកពីវិស័យសំណង់ និងអចលនទ្រព្យនានាពាក់ព័ន្ធនឹងការសម្របសម្រួលឱ្យអតិថិជនអាចផ្ទេរបំណុលពីម្ចាស់បុរីទៅគ្រឹះស្ថានធនាគារវិញ ។
តាមរយន្តការនេះ ភាគីពាក់ព័ន្ធចង់ធ្វើយ៉ាងណាឲ្យវិស័យធនាគារជួយសងបំណុលទៅម្ចាស់បុរីជំនួសអតិថិជន ប៉ុន្តែអតិថិជននៅតែបន្តសងបំណុលទៅឱ្យធនាគារវិញក្នុងលក្ខខណ្ឌធូរស្រាលជាងមុន ។ កិច្ចសម្របសម្រួលនេះនឹងជួយម្ចាស់បុរីដែលជាប់គាំងទុនបង្វិលបានលុយដុំមកវិញ ដើម្បីបន្តការអភិវឌ្ឍក្រុមហ៊ុនរបស់ពួកគាត់ ហើយក៏នឹងជួយអតិថិជនឱ្យទទួលបានឥណទានផ្ទះពីគ្រឹះស្ថានធនាគារដែលជាទូទៅមានការប្រាក់ទាបជាង និងមានរយៈពេលយូរជាងរហូតដល់២៥ឆ្នាំ ឬ៣០ឆ្នាំ ។ ប៉ុន្តែមកដល់ពេលនេះ គេនៅមិនទាន់ដឹងថា យន្តការនេះដំណើរការយ៉ាងណានៅឡើយទេ ។
មកដល់ឆ្នាំ២០២៤ ម្ពុជាមានធនាគារពាណិជ្ជសរុប៥៩ ធនាគារឯកទេស ៩គ្រឹះស្ថានមីក្រូហិរញ្ញវត្ថុ ទទួលប្រាក់បញ្ញើ៤ និងមិនទទួលប្រាក់បញ្ញើរ៨៥ ហើយមានអ្នកជំពាក់បំណុលសរុប២,៤លាននាក់ នៅក្នុងនោះ អ្នកទិញផ្ទះជាកម្មសិទ្ធិមាន១២,៥ភាគរយ និងអ្នកជួញដូអចលនទ្រព្យ១១,៦ ភាគរយ ហើយសំណង់មាន ៩,៧ ភាគរយ ៕
ចែករំលែកព័តមាននេះ