រឿងក្តៅបំផុត នៅលើបណ្តាញសង្គមបានផ្ទុះករណីរិះគន់គ្នារវាងលោកបណ្ឌិត សុខ ទូច ប្រធានរាជបណ្ឌិត្យសភាកម្ពុជា ដែលមានឋានៈស្មើនឹងរដ្ឋមន្ត្រី និង ក្រុមការងារព័ត៌មាន និងប្រតិកម្មរហ័សនៃស្នងការនគបាលរាជធានីភ្នំពេញ ពាក់ព័ន្ធនឹងបញ្ហាត្រួតពិនិត្យជាតិស្រវឹង…
រឿងក្តៅបំផុត នៅលើបណ្តាញសង្គមបានផ្ទុះករណីរិះគន់គ្នារវាងលោកបណ្ឌិត សុខ ទូច ប្រធានរាជបណ្ឌិត្យសភាកម្ពុជា ដែលមានឋានៈស្មើនឹងរដ្ឋមន្ត្រី និង ក្រុមការងារព័ត៌មាន និងប្រតិកម្មរហ័សនៃស្នងការនគបាលរាជធានីភ្នំពេញ ពាក់ព័ន្ធនឹងបញ្ហាត្រួតពិនិត្យជាតិស្រវឹង នៅចំណុចផ្លូវភ្នំពេញហាណូយ មុខសាលាបឋមសិក្សាភ្នំពេញថ្មី ។
រឿងនេះផ្ទុះឡើង ក្រោយករណីត្រួតពិនិត្យជាតិស្រវឹងដែលបានកើតមានឡើងកាលពីវេលាម៉ោង១១ និង៥៥នាទីយប់ ថ្ងៃទី១៧ ខែកុម្ភៈ ឆ្នាំ២០២៥ ។ ក្រោយរឿងនេះកើតឡើងលោកបណ្ឌិត សុខ ទូច បានសរសេរនៅលើបណ្តាញសង្គម ហើយបានចែករំលែងតៗគ្នាថា វាកើតឡើងដោយសារលោកសុំប្តូរទុយោ លើម៉ាស៊ីនវាស់កម្រិតជាតិអាកុល ដោយសារតែបារម្ភខ្លាចឆ្លងរោគពីអ្នកដែលផ្លុំមុន ហើយក៏មានការគំហកដោយប្រើពាក្យអសុរសពីសមត្ថកិច្ច ហើយក៏កើតជាកំហឹងដោយសារតែអារម្មណ៍នៃភាពហត់នឿយ ក្រោយចុះស្រាវជ្រាវអស់រយ:ពេល៣ថ្ងៃនៅតំបន់ភ្នំ ។
លោកបានបន្តរៀបរាប់ និងទទួលស្គាល់ថា លោកពិតជាទទួលទានស្រាបៀរមែន ប៉ុន្តែមិនដល់កម្រិតស្រវឹងទេ ពោល គឺត្រឹមតែមួយកំប៉ុង ដើម្បីបំបាត់ និងរំសាយការហត់នឿយ ពេលហូបបាយជាមួយនឹងមន្ត្រី ហើយក៏បានបើកឡានជូនមន្ត្រីដែលទៅស្រាវជ្រាវជាមួយទៅយកម៉ូតូនៅកន្លែងធ្វើការ ។
លោកបានបន្តទៀតថា ក្រោយកើតភាពឆេវឆាវ ចំពោះរឿងដែលគេចោទលោកថា លោកស្រវឹងជោគជាំប្រហែលឃើញភ្នែកលោកក្រហម ដោយសារតែថ្ងៃនេះលោកដើរផង និងបើកឡានដោយខ្លួនឯងជាង៦០០គីឡូម៉ែត និងមានបញ្ហាភ្នែកស្ងួត លុបមុខញីភ្នែកជាច្រើនដងហត់នឿយជាប់មិនបានសម្រាក ។
លោកបានបន្តថា ក្រោយពេលដែលទប់មិនជាប់ក៏ឆេវឆាវកើតជារឿងតែក្រោយមកលោកបានសហការផ្លុំចំនួន៣ដង តែមិនឃើញកម្រិតជាតិអាល់កុល ហើយលោកក៏លែងសហការផ្លុំ ហើយក៏ច្រឡោតឡើងម្តងទៀតរហូតផ្ទុះបាតុភាពរិះគន់គ្នាទៅវិញទៅមក ។
ក្រោយការបង្ហោះនេះ ខាងក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលរាជធានីភ្នំពេញ នៅម៉ោង១១និង៣១នាទីព្រឹកថ្ងៃទី១៨ ខែកុម្ភៈ ឆ្នាំ២០២៥នេះ បានចេញសេចក្តីបំភ្លឺថា គេមិនស្គាល់លោកបណ្ឌិត សុខ ទូច ។ នៅពេលនោះ លោកបណ្ឌិតមានកាយវិការ និងពាក្យសម្តីមិនសមរម្យ មិនព្រមសហការផ្លុំរកជាតិអាល់កុល ហើយសមត្ថកិច្ចព្យាយាមណែនាំគាត់ឱ្យសហការត្រួតពិនិត្យជាតិអាល់កុល ។
ក្រោយមកលោកបណ្ឌិត បានយល់ព្រមផ្លុំខ្យល់៤ទៅ៥ដង ប៉ុន្តែការផ្លុំខ្យល់នោះមិនដល់កម្រិតខ្យល់ ដែលម៉ាស៊ីនចេញទិន្នន័យនោះទេ ហើយគាត់មិនព្រមសហការផ្លុំទៀត និងមានសកម្មភាពច្រងេងច្រងាងទាញកញ្ឆក់ម៉ាស៊ីនផ្លុំខ្យល់ពីដៃសមត្ថកិច្ច ដោយចោទថា ដាក់បំពង់ផ្លុំខ្យល់ចាស់ឱ្យគាត់ផ្លុំ ប៉ុន្តែសមត្ថកិច្ចបានពន្យល់ណែនាំគាត់ថា បំពង់ផ្លុំខ្យល់នេះ គឺផ្លុំមួយប្តូរបំពង់មួយថ្មី មិនប្រើបំពង់ផ្លុំ ហើយយកប្រើប្រាស់ទៀតនោះទេ ។ រួចគាត់ក៏បែរជា ចោទសមត្ថកិច្ចហៅគាត់(អា)ទៅវិញ និងចោទថា ប្រើប្រាស់កាយវិការមិនសមរម្យដាក់គាត់ទៀតផង ខណៈដែលសមត្ថកិច្ចស្នើសុំឱ្យគាត់សហការផ្លុំរកជាតិអាល់កុល ។
ក្រុមការងារព័ត៌មាន និងប្រតិកម្មរហ័ស បន្ថែមទៀតថា បន្ទាប់មក លោកបណ្ឌិត សុខ ទូច ក៏បានរើយកអីវ៉ាន់វ៉ាលី និងសម្ភារៈចេញពីក្នុងរថយន្ត រួចហៅផាស់អេបជិះចេញទៅបាត់ ដោយបន្សល់ទុករថយន្តនៅគោលដៅត្រួតពិនិត្យជាតិស្រវឹង បន្ទាប់មកសមត្ថកិច្ចយកទៅរក្សាទុកអធិការដ្ឋាននគរបាលខណ្ឌសែនសុខ រង់ចាំអ្នកបើកបរចូលមកដោះស្រាយ ។ ប៉ុន្តែទន្ទឹមនឹងការអះអាងបែបនោះមិនដូច្នេះទេ មានវីដេអូទី២ចេញបង្ហាញពីកាយវិការមិនសមរម្យរបស់សមត្ថកិច្ចទៅវិញរហូតដល់មហាជនកាន់តែរិះគន់ថែមទៀត ។
ពាក់ព័ន្ធនឹងរឿងផ្លុំម៉ាស៊ីនវាស់ជាតិអាលកុលនេះ បើតាមការបញ្ចេញយោបល់និងតាមអ្នកដែលធ្លាប់ជួបបទពិសោធន៍កន្លងមកបានលើកឡើងថា ពួកគេឧស្សាហ៍ជួបបែបនេះ ។ នៅពេលដែលពួកគេមិនបានទទួលគ្រឿងស្រវឹង ពេលជួបសមត្ថកិច្ចឲ្យផ្លុំពួកគេក៏ផ្លុំច្រើនដងបែបនេះ តែមិនចេញ ហើយសមត្ថកិច្ចនៅតែទាមទារថា ផ្លុំមិនត្រូវបច្ចេកទេស ហើយទុកពួកគេឲ្យនៅមួយដុំ ដល់តែយូបានអោយពួកគេទៅ ។ ពួកគេក៏បានលើកឡើង និងត្អូញត្អែថា ពាក្យសម្តីនិងកាយវិការរបស់សមត្ថកិច្ចដែលអនុវត្តច្បាប់នេះ គឺមិនសមជាសមត្ថកិច្ចដែលបម្រើរាស្ត្រនោះទេ ។
ផ្អែកតាមរូបភាព និងការបញ្ចេញយោបល់ជុំវិញបាតុភាពនេះ ភាគច្រើនពួកគេមិនបានវាយតម្លៃខ្លាំងលើសកម្មភាពលោកបណ្ឌិតពេលច្រឡោតនោះទេ ។ ហើយក្រុមបណ្ឌិត និងសាធារណៈជនខ្លះបានលើកឡើងធ្ងន់ៗថា សកម្មភាពរបស់សមត្ថកិច្ចជាដំបៅនៅក្នុងសង្គមមួយដែលទាមទារការព្យាបាល ។
សរុបមកវិញសង្ឃឹមថា មជ្ឈដ្ឋានទាំងពីរនឹងអាចសម្របសម្រួលគ្នាលើបញ្ហានេះ ។ ប្រសិនបើមជ្ឈដ្ឋានទាំងពីរនៅបន្តវែកញែកគ្នាបន្តទៀត គឺវាអាចហែកស្ថានការណ៍ទៅអ្វីមួយផ្សេង ហើយអ្នកខាតបង់ គឺជាតិនេះឯង ។ ប៉ុន្តែទន្ទឹមនឹងការសម្របសម្រួលនេះ សមត្ថកិច្ចនៅពេលដែលចុះអនុវត្តច្បាប់ជាមួយនឹងពលរដ្ឋក៏គួរតែពង្រឹងបែបបទនៃការធ្វើការ ជាពិសេស គឺកាយវិការ និងពាក្យសម្តីឡើងវិញ ។
ប្រជាពលរដ្ឋនៅមុនពេលរកឃើញទោសកំហុស ពួកគេមិនមែនជាអ្នកទោសទេ ។ ពួកគេ គឺជាចៅហ្វាយនាយ ដូច្នេះសម្តីសំដៅគួរឲ្យសមរម្យ ហើយទោះបីជាពួកគេអ្នកទោសក៏ពួកគេមានច្បាប់ទម្លាប់ការពារពួកគេដែរ ។ ពាក់ព័ន្ធនឹងរឿងពិនិត្យជាតិអាកុលនេះ បើផ្លុំឧបករណ៍វាស់នោះលទ្ធផលអវិជ្ជមានហើយ អោយពលរដ្ឋទៅៗកុំទុកគេ ។ ប៉ុន្តែបើគេពិតជាមានជាតិអាកុលនឹងហើយត្រូវអនុវត្តច្បាប់ និងពិន័យទោសទណ្ឌតាមច្បាប់ចុះ ប៉ុន្តែកុំលើស និងត្រីងៀតឆ្លៀតពង ។ សង្គមបើគ្រប់គ្នាអនុវត្តតែតាមច្បាប់ ហើយយកច្បាប់ជាធំសង្គមមិនច្របូកច្របល់ឡើយ ។ ចំណែកប្រជាជនកម្ពុជាទាំងអស់ក៏ត្រូវតែបង្កើនការគោរពច្បាប់អោយបានគ្រប់ៗគ្នា ។ ពលរដ្ឋល្អ ប្រទេសជាតិល្អ ។
ទន្ទឹមនោះ យើងគ្រប់គ្នាត្រូវចេះដោះស្រាយបញ្ហាដោយសន្តិវិធី និងតាមផ្លូវច្បាប់ ហើយកុំយកបណ្តាញសង្គមធ្វើជាកន្លែងជះកំហឹងពីព្រោះវាមានផលប៉ះពាល់ធ្ងន់ជាងអ្វីដែលយើងធ្លាប់គិត ។ ដូចជា ក្នុងករណីរឿងលោក បណ្ឌិត សុខ ទូច និងប៉ូលិសជាដើម វាបានធ្វើអោយផ្អើលពេញមួយប្រទេស ខណ:រឿងនេះមិនសមធ្ងន់ធ្ងរដល់ថ្នាក់នេះឡើយ បើសិនជាទាំងលោកបណ្ឌិត និងប៉ូលិសចេះនិយាយគ្នាចេះយោគយល់គ្នា ហើយចេះដោះស្រាយតាមសន្តិវិធី និងច្បាប់ ៕
ចែករំលែកព័តមាននេះ