ដូងខ្ចី ដែលជាផលិតផលមួយដែលទំនងជាលំបាកនៅក្នុងការវេចខ្ចប់ ដើម្បីនាំចេញ ប៉ុន្តែថ្មីៗនេះវាបានក្លាយទៅជាផលិតផលមួយ ដែលប្រទេសនៅក្នុងតំបន់ រួមទាំងកម្ពុជាផងដែរបានកំពុងតែខិតខំជំរុញការនាំចេញ ។ ចាប់តាំងពីខែមេសា ឆ្នាំ២០២៤មកកម្ពុជាបានទទួលភ្លើងខៀវ ឲ្យនាំចេញជាផ្លូវការនូវដូងខ្ចីស្រស់រួចហើយ…
ដូងខ្ចី ដែលជាផលិតផលមួយដែលទំនងជាលំបាកនៅក្នុងការវេចខ្ចប់ ដើម្បីនាំចេញ ប៉ុន្តែថ្មីៗនេះវាបានក្លាយទៅជាផលិតផលមួយ ដែលប្រទេសនៅក្នុងតំបន់ រួមទាំងកម្ពុជាផងដែរបានកំពុងតែខិតខំជំរុញការនាំចេញ ។
ចាប់តាំងពីខែមេសា ឆ្នាំ២០២៤មកកម្ពុជាបានទទួលភ្លើងខៀវ ឲ្យនាំចេញជាផ្លូវការនូវដូងខ្ចីស្រស់រួចហើយ ដោយពិធីសម្ភោធការនាំចេញដូងរបស់កម្ពុជាទៅកាន់ប្រទេសចិនបានធ្វើឡើង នៅរាជធានីភ្នំពេញក្រោមវត្តមានលោក ស៊ុន ចាន់ថុល ឧបនាយករដ្ឋមន្ត្រី និងជាអនុប្រធានទីមួយនៃក្រុមប្រឹក្សាអភិវឌ្ឍន៍កម្ពុជា និងលោក វ៉ាង យី រដ្ឋមន្ត្រីក្រសួងការបរទេសចិន ។
កិច្ចខិតខំបើកទីផ្សារដូងនៅចិននេះ គឺកម្ពុជាបានទទួលភ្លើងខៀវពីទីផ្សារចិន សម្រាប់ចម្ការដូង ប្រមាណជា១៣ និងរោងចក្រកែច្នៃចំនួន៥ ខណៈដែលក្រសួងកសិកម្ម រុក្ខាប្រមាញ់និងនេសាទបានបង្ហាញថា កម្ពុជាបានដាំដូងលើផ្ទៃដីសរុបជិត២ម៉ឺនហិកតា ក្នុងនោះដូងនៅលើផ្ទៃដីជាង១៤.០០០ ហិកតា ឬ៧១ ភាគរយកំពុងប្រមូលផល ។
នេះ គឺជាការខិតខំរបស់កម្ពុជា ប៉ុន្តែទោះបីជាយ៉ាងណាក៏ដោយ នៅក្នុងតារាងទំនិញនាំចេញ កាលពីឆ្នាំ២០២៤ នៅមិនទាន់ឃើញកត់ត្រាការនាំចេញដំណាំនេះនៅឡើយ ខណៈដែលវៀតណាម និងថៃ ដែលជាប្រទេសមានបទពិសោធន៍ក្រាស់ក្រែលរឿងធ្វើពាណិជ្ជកម្មលើដំណាំកសិកម្មកំពុងតែប្រជែងគ្នាដណ្តើមទីផ្សារដូង ។
ជុំវិញបញ្ហានេះ អ្នកវិភាគបានលើកឡើងថា ជាធម្មតាទេ យើងនៅថ្មី ដំណើរការវាអាចរអាក់រអួលខ្លះ ប៉ុន្តែសំខាន់ក្រោយពេលដែលយើងនាំចេញទៅហើយ គឺធានានិរន្តរភាព ជាមួយនឹងកំណើនជាជំហ៊ានៗ និងមាននិរន្តភាព ។ លោកបានអះអាងថា «ទីផ្សារដូងពីមុន គឺមានតែទឹកដូងកំប៉ុង និងខ្ទិះកំប៉ុង ប៉ុន្តែឥឡូវ គឺដូងខ្ចីស្រស់តែម្តង ដូច្នេះវា គឺជាក្តីសង្ឃឹមរបស់យើង ។ មិនបាច់លឿនទេ តែយើងទៅមុខសន្សឹមៗហើយរឹងមាំក៏ប្រសើរពីព្រោះវាក៏ជាផលិតផលមានតម្រូវការខ្ពស់ដែរ នៅក្នុងទីផ្សារនៅក្នុងស្រុក »។
មកដល់ពេលនេះ ចម្ការដូងដែលគេបានដាំជាប្រពៃណី និងមានរស់ជាតិផ្អែមនៅកម្ពុជា គឺភាគច្រើននៅភាគនិរតីនៃប្រទេសដូចជានៅ ខេត្តកំពត កែប តាកែវ ព្រះសីហនុ កោះកុង និងកំពង់ស្ពឺជាដើម ។ មកដល់ពេលនេះ តាមអត្ថបទដែលចុះផ្សាយដោយសារព័ត៌មាន VN Express បានឲ្យដឹងថា វៀតណាម កាលពីឆ្នាំ២០២៤ គឺបាននាំចេញសរុបលើសពី១ពាន់លានដុល្លារ កើនឡើង២០ភាគរយ រីឯចម្ការដូង នៅប្រទេសនេះវិញ គឺកើនដល់២០ម៉ឺនហិកតាហើយ ជាមួយនឹងផលប្រមាណជា២លានតោននៅក្នុងមួយឆ្នាំ ។
ការនាំចេញដូងវៀតណាម គឺតាមរយៈចម្ការ និងក្រុមហ៊ុនកែច្នៃដល់ទៅជាង៦០០ កន្លែង ហើយទីផ្សារដូងវៀតណាម គឺចិន២០ភាគរយ ក្រៅពីនោះ គឺមាន សហភាពអឺរ៉ុប អាមេរិក កាណាដា និង កូរ៉េខាងត្បូង ជាដើម ។ ដោយឡែកថៃវិញ គឺអាចរកចំណូលពីការនាំចេញផលិតផលដូងស្រស់ និង កែច្នៃជាទឹកដូងដប ជាមួយនឹងចំណូលប្រមាណជា ៥៥០ លានដុល្លារនៅក្នុងមួយឆ្នាំ ។
កាលពីឆ្នាំទៅថៃបានអះអាងថា ទីផ្សារនាំចេញថៃរកសំពាធ ព្រោះតែស្ថានភាពនៃអាកាសធាតុមិនសូវអំណោយផល ។
មកដល់ពេលនេះសម្រាប់ដូងមួយផ្លែនៅក្នុងប្រទេសកម្ពុជា គឺមានតម្លៃប្រមាណជា ៣០០០ ទៅ៤០០០រៀល ប៉ុន្តែនៅលើទីផ្សារអន្តរជាតិ គឺប្រមាណជា២៥.០០០ រៀលនៅក្នុងមួយផ្លែ ។
ដូច្នេះ បើសិនជាកម្ពុជាអាចនាំចេញផ្លែដូងដូចប្រទេសវៀតណាម និងថៃនោះវានឹងក្លាយជាប្រភពចំណូលដ៏សំខាន់មួយសម្រាប់កសិករដែលធ្វើការដាំផ្លែដូងនេះ ៕
ចែករំលែកព័តមាននេះ