ការសម្រេចចិត្តរបស់រដ្ឋបាល លោកប្រធានាធិបតីសហរដ្ឋអាមេរិក ដូណាល់ ត្រាំ នៅក្នុងការផ្អាក ឬឈានទៅបិទបញ្ចប់ប្រតិបត្តិការ៦៤ឆ្នាំ របស់ទីភ្នាក់ងារសហរដ្ឋអាមេរិកសម្រាប់ការអភិវឌ្ឈអន្តរជាតិ ហៅកាត់ថា USAID ត្រូវបានអ្នកវិភាគមួយចំនួនលើកឡើងថា…
ការសម្រេចចិត្តរបស់រដ្ឋបាល លោកប្រធានាធិបតីសហរដ្ឋអាមេរិក ដូណាល់ ត្រាំ នៅក្នុងការផ្អាក ឬឈានទៅបិទបញ្ចប់ប្រតិបត្តិការ៦៤ឆ្នាំ របស់ទីភ្នាក់ងារសហរដ្ឋអាមេរិកសម្រាប់ការអភិវឌ្ឈអន្តរជាតិ ហៅកាត់ថា USAID ត្រូវបានអ្នកវិភាគមួយចំនួនលើកឡើងថា គឺជាការជីកកប់កិត្យានុភាព ដែលប្រទេសមហាអំណាចនេះបានកសាងឡើងមកតាំងពីសម័យសង្គ្រាមត្រជាក់ ។
ការសម្រេចចិត្តនេះ ពិតណាស់កម្ពុជាក៏ទទួលផលប៉ះពាល់មួយផ្នែក ជាពិសេស គឺកម្មវិធីជំនួយដែលមាន ។ ក្នុងរយ:ពេលជាង៣០ឆ្នាំ នៃបេសកកម្មនៅកម្ពុជា អាមេរិកបានផ្តល់ជំនួញជាង៣ពាន់លានដុល្លារ ចាប់តាំងពីឆ្នាំ១៩៩២មក ។ នេះបើតាមការអះអាងរបស់លោកស្រី Samantha Power ដែលជាអ្នកគ្រប់គ្រងអង្គការ USAID ដែលបានមកបំពេញទស្សនកិច្ចនៅកម្ពុជាកាលពីខែតុលា ឆ្នាំ២០២៤ ។
ប៉ុន្តែ លោក ប៉ែន បូណា អ្នកនាំពាក្យរាជរដ្ឋាភិបាលបាននិយាយថា ការផ្អាកជំនួយរបស់USIAD ប៉ះពាល់តែគម្រោងតូចៗនៅកម្ពុជាប៉ុណ្ណោះ ហើយវាមិនធ្វើអោយជាប់គាំងដល់ដំណើរការរបស់រដ្ឋាភិបាលឡើយ ។
បើនិយាយអំពីទំហំនៃផលប៉ះពាល់នេះសម្រាប់កម្ពុជាវាមិនធំទេ បើធៀបនឹងកម្មវិធីជំនួយដែល USAID បានផ្តល់ដល់ប្រទេសកំពុងអភិវឌ្ឈន៍នានា ដោយរួមទាំងអង្គការសហប្រជាជាតិដែលមានទំហំទុនសរុបប្រមាណជាជាង ៧០ពាន់លានដុល្លារនៅក្នុងមួយឆ្នាំ ។
ការបិទបញ្ចប់ប្រតិបត្តិការរបស់ USAID នេះ ផលប៉ះពាល់ពិតប្រាកដ គឺអ្នកដែលបម្រើតាមគម្រោង និងស្ថាប័នដែលទទួលកញ្ចប់ជំនួយ និងអ្នកដែលទទួលផលពីគម្រោងនេះ ប៉ុន្តែនៅលើពិភពលោក គឺធំគួរសមដែរ ជាពិសេស គឺនៅអាហ្វ្រិក និងប្រទេសក្រីក្រផ្សេងៗទៀត ។
ជាក់ស្តែង អង្គការសុខភាពពិភពលោកបានអះអាងថា ការសម្រេចចិត្តនេះវាអាចធ្វើឲ្យកម្មវិធីប្រយុទ្ធប្រឆាំងការរីករាលដាលនៃមេរោគអេដស៍នៅប្រទេស៥០ ពិសេសនៅអាហ្វ្រិកស្ថិតនៅក្នុងហានិភ័យ ។
ជាមួយនឹងការសម្រេចចិត្តនៃអនាគតរបស់ USAID បែបនេះ អ្នកវិភាគខ្លះបានអះអាងថា ការសម្រេចចិត្តរបស់សហរដ្ឋអាមេរិកនេះ គឺជាការជីកកប់កិត្យានុភាពរបស់ខ្លួននៅក្នុងនាមជាមហាអំណាចពិភពលោក ។ ការអះអាងបែបនេះ ក៏ត្រូវបានលើកឡើងបញ្ជាក់នៅក្នុងអត្ថបទសារព័ត៌មានមួយរបស់សារព័ត៌មាន South China Morning Postផងដែរ ។
នៅក្នុងអត្ថបទសារព័ត៌មាននោះ លោក គ្រីស្ទ ខុន (Chris Coons) សមាជិកព្រឹទ្ធសភាអាមេរិកម្នាក់បានអះអាងថា ការបិទប្រតិបត្តិការ USAID នៅលើពិភពលោកនៅពេលនេះ គឺជាការហុចអំណោយមួយទៅឲ្យប្រទេសចិន ។
លោកបានអះអាងថា នេះ គឺជាការផ្តល់អំណោយដល់ដៃគូប្រជែងមួយដែលសហរដ្ឋអាមេរិកកំពុងតែប្រឈមជាមួយនៅលើពិភពលោកសព្វថ្ងៃ ។ ដោយឡែកក្រុមមន្ត្រីចិនដែលអះអាងដោយមិនបញ្ចេញឈ្មោះ បានលើកឡើងថា ការបិទប្រតិបត្តិការរបស់ USAID នឹងធ្វើឲ្យកិត្យានុភាពទីក្រុងប៉េកាំងរះឡើងនៅក្នុងប្រទេសតតីយលោក ដែលកំពុងតែត្រូវការការជួយសង្គ្រោះ ។
ការបិទបញ្ចប់បេសកម្មរបស់ USAID ដែលបានធ្វើព្យុះធ្វើភ្លៀងនៅក្នុងសម័យសង្គ្រាមត្រជាក់ ក្រោយពេលដែលបង្កើតឡើងនៅក្នុងឆ្នាំ១៩៦១ រហូតដល់អតីតសហភាពសូវៀតដូលរលំ នៅដើមទស្សវត្សរ៍នៃឆ្នាំ១៩៩០ នឹងបើកឱកាសឲ្យទីភ្នាក់ងារសហប្រតិបត្តិការអភិវឌ្ឍន៍អន្តរជាតិចិន (CIDCA) ដែលបានបង្កើតឡើងនៅក្នុងឆ្នាំ២០១៨ ពង្រីកសកម្មភាពដើម្បីលើកកម្ពស់កិត្យានុភាព និងឥទ្ធិពលរបស់ទីក្រុងប៉េកាំងនៅលើឆាកអន្តរជាតិ ។
ក្រោយពេលដែល USAID ត្រូវបានប្រកាសផ្អាកជំនួយកាលពីពេលថ្មីៗនេះ មន្ត្រីជាន់ខ្ពស់ម្នាក់នៃទីភ្នាក់ងារសហប្រតិបត្តិការអភិវឌ្ឍន៍អន្តរជាតិចិន (CIDCA) បានបង្ហើបថា ខ្លួននឹងបង្កើនការវិនិយោគក្នុងការអភិវឌ្ឍន៍អន្តរជាតិ និងធ្វើឲ្យប្រសើរឡើងនូវកម្មវិធីរបស់ខ្លួនចំពោះជំនួយបរទេស ។
នៅក្នុងបទសម្ភាសន៍ជាមួយទូរទស្សន៍ Phoenix TV លោក ហ៊ូ ជៀនលាន (Hu Zhangliang) អនុប្រធានទីភ្នាក់ងារសហប្រតិបត្តិការអភិវឌ្ឍន៍អន្តរជាតិចិនបានលើកឡើងដោយមិននិយាយចំនឹងសហរដ្ឋអាមេរិកឡើយ ។ លោកគ្រាន់តែនិយាយថា យើងនឹងមិនប្រពឹត្តិដូចជា ប្រទេសមួយចំនួនទុកឲ្យអ្នកដែលទទួលជំនួយនៅក្នុងស្ថានភាពអស់សង្ឃឹមឡើយ ។
មកដល់ពេលនេះក្រៅពី USAID និង CIDCA ចេញ ប្រទេសជាច្រើនបានបង្កើតទីភ្នាក់ងារអភិវឌ្ឈន៍អន្តរជាតិសម្រាប់ជួយប្រទេសក្រីក្រជាច្រើន គ្រាន់តែមូលនិធិវាមិនធំដូចជា USAID ។ ស្ថាប័នផ្តល់ជំនួយទាំងនោះមានដូចជា ទីភ្នាក់ងារសហប្រតិបត្តិការអន្តរជាតិជប៉ុន ហៅថា JICA , ទីភ្នាក់ងារអូស្ត្រាលីដើម្បីអភិវឌ្ឈន៍អន្តរជាតិ ហៅថា AusAID, ទីភ្នាក់ងារអភិវឌ្ឈន៍អន្តរជាតិកាណាដា CIDA, ទីភ្នាក់ងារអភិវឌ្ឈន៍បារាំង ហៅថា AFD ជាដើម ៕
ចែករំលែកព័តមាននេះ