រាជធានីភ្នំពេញ ៖ បុរសម្នាក់បើកបររថយន្តក្នុងល្បឿនលឿន ស្រាប់តែរេចង្កូតធ្លាក់ចូលប្រឡាយទឹក បង្កការភ្ញាក់ផ្អើលនៅវេលាម៉ោង១១និង៥០នាទីយប់ថ្ងៃទី១៨ ខែកុម្ភៈ ឆ្នាំ២០២៥ ស្ថិតនៅតាមបណ្ដោយផ្លូវ៣០ម៉ែត្រ សង្កាត់ព្រៃស ខណ្ឌដង្កោ រាជធានីភ្នំពេញ។

តាមប្រភពព័ត៌មានពីពលរដ្ឋបានឲ្យដឹងថា នៅមុនពេលកើតហេតុ គេឃើញរថយន្តម៉ាកតូយ៉ូតា កាមរីបាឡែន ពណ៌ទឹកប្រាក់ ពាក់ស្លាកលេខភ្នំពេញ2AH-7554 បើកបរដោយបុរសម្នាក់ធ្វើដំណើរតាមបណ្ដោយផ្លូវ៣០ម៉ែត្រក្នុងទិសដៅពីកើតទៅលិចក្នុងល្បឿនលឿនលុះមកដល់នៅចំណុចខាងលើស្រាប់តែរថយន្តបានរេចង្កូតមកផ្នែកខាងស្តាំ បណ្ដាលឲ្យជ្រុលធ្លាក់កង់ម្ខាង ។ នៅពេលនោះផងដែរម្ចាស់បានព្យាយាមបួងចង្កូតឡើងមកវិញដែរ តែឡើងមិនរួច ក៏ធ្លាក់ចូលទឹកតែម្ដង ។ ភ្លាមៗ​អ្នកបើកបរ​បានបើកទ្វារចេញមកខាងលើដោយមិនមានរងរបួសនោះទេ បន្ទាប់មកពលរដ្ឋបានរាយការណ៍ទៅនគរបាលមូលដ្ឋានភ្លាមៗ ។

​ក្រោយពេលកើតហេតុ នគរបាលមូលដ្ឋានក៏បានចុះមកពិនិត្យមើលនៅជុំវិញហេតុការណ៍ខាងលើដោយមិនមានបង្កប៉ះពាល់ដល់អ្នកដទៃក៏អោយម្ចាស់រថយន្តទាក់ទងហៅរថយន្តស្ទូចអូសទៅយកទៅជួសជុលខ្លួន ៕