សង្ឃឹមថា ទឹកឃ្មុំដែលសមត្ថកិច្ចជំនាញសង្ស័យ ហើយចាត់វិធានការច្បាប់ប្រមាណជាជិត២០តោន គឺជាទឹកឃ្មុំសុទ្ធ និងមិនប៉ះពាល់សុខភាពទៅចុះ ប៉ុន្តែប្រសិនបើវា គឺជាផលិតផលក្លែងក្លាយ ហើយវាប៉ះពាល់ដល់សុខភាព ច្បាប់គួរតែអនុវត្តឲ្យបានតឹងរ៉ឹង ហើយក៏ពិចារណារលើបទចោទប្រកាន់ទាក់ទងក្រមព្រហ្មទណ្ឌផងដែរ…
សង្ឃឹមថា ទឹកឃ្មុំដែលសមត្ថកិច្ចជំនាញសង្ស័យ ហើយចាត់វិធានការច្បាប់ប្រមាណជាជិត២០តោន គឺជាទឹកឃ្មុំសុទ្ធ និងមិនប៉ះពាល់សុខភាពទៅចុះ ប៉ុន្តែប្រសិនបើវា គឺជាផលិតផលក្លែងក្លាយ ហើយវាប៉ះពាល់ដល់សុខភាព ច្បាប់គួរតែអនុវត្តឲ្យបានតឹងរ៉ឹង ហើយក៏ពិចារណារលើបទចោទប្រកាន់ទាក់ទងក្រមព្រហ្មទណ្ឌផងដែរ ។
កាលពីសប្តាហ៍មុន នាយកដ្ឋាននគរបាលប្រឆាំងបទល្មើសសេដ្ឋកិច្ចនៃក្រសួងមហាផ្ទៃ បានធ្វើការឃាត់ខ្លួនថៅកែស្រី ជាជនជាតិវៀតណាមម្នាក់ ជានាយក ក្រុមហ៊ុន ច័ន្ទ ហាន់នី អិមផត អិចផត ( CHAN HONEY IMPORT EXPO RT CO.,LTD) បញ្ជូនទៅសាលាដំបូងរាជធានីភ្នំពេញ ដោយជាប់ពាក់ព័ន្ធការនាំចូល និងស្តុកទឹកឃ្មុំក្លែងបន្លំប្រមាណជិត២០តោន ។
សមត្ថកិច្ចបានឲ្យដឹងថា ជនសង្ស័យមានឈ្មោះ ឃ្វៀន ធីថាញ់ធៀន ( NGUYEN THI THANH THIEN) ដែលមានអាស័យដ្ឋានផ្ទះលេខ៧៦ ភូមិបឹងឈូក សង្កាត់និរោធ ខណ្ឌច្បារអំពៅ រាជធានីភ្នំពេញ ។
ដំណើរការច្បាប់នេះ គឺបានចាត់វិធានការក្រោយពេលដែលសមត្ថកិច្ចជំនាញដែលមានការចូលរួមជាច្រើនសមាសភាពបានចុះប្រតិបត្តិការដល់ទីតាំងក្រុមហ៊ុន នោះផ្ទាល់ ។ នៅក្នុងអំឡុងពេលប្រតិបត្តិការនោះ សមត្ថិកិច្ចជំនាញបានរកឃើញទឹកឃ្មុំសរុបចំនួន១៣០ធុង ដែលមានទម្ងន់សរុបជិត២០តោន ។
ដោយមានភាពសង្ស័យចំពោះទឹកឃ្មុំទាំងអស់អាចជាផលិតផលក្លែងបន្លំប្រភព សមត្ថកិច្ចជំនាញក៏បានសម្រេចឲ្យសមត្ថកិច្ចធ្វើការដកហូតជាបណ្តោះអាសន្ន ដោយរក្សាទុកនៅក្នុងទីតាំងក្រុមហ៊ុនរួចធ្វើការបិទផ្លុំបេរ ដើម្បីធ្វើការត្រួតពិនិត្យបន្ត និងបាននាំខ្លួនម្ចាស់ទីតាំងជនជាតិវៀតណាម រួមនឹងបុគ្គលពាក់ព័ន្ធទៅសាកសួរបំភ្លឺ ហើយក៏ស្រាប់តែនៅថ្ងៃទី១៤ ក៏បានបញ្ជូលស្ត្រីរូបនេះទៅតុលាការតែម្តង ។
មកដល់ពេលនេះ គេនៅមិនទាន់ដឹងថា តើស្ត្រីជនជាតិវៀតណាមដែលជានាយកក្រុមហ៊ុននេះត្រូវចោទប្រកាន់យ៉ាងណានោះទេ ហើយគេក៏នៅមិនទាន់ដឹងថា តើទឹកឃ្មុំទាំងនោះវា គឺជាទឹកឃ្មុំធម្មតាដែលគេនាំចូល ឬក៏ជាទឹកឃ្មុំច្នៃពីអ្វីផ្សេង ដើម្បីក្លែងបន្លំយកលក់បានថ្លៃ ហើយក៏គេមិនដឹងថា តើទឹកឃ្មុំដែលសមត្ថកិច្ចរឹបអូសនេះ គឺជាផលិតផលដែលកើតពីការចម្រាញ់ ដែលខុសច្បាប់ ហើយអាចប៉ះពាល់ដល់សុខភាពយ៉ាងណានោះទេ ។
ពាក់ព័ន្ធនឹងបញ្ហានេះ សមត្ថកិច្ចជំនាញគួរតែប្រញាប់ធ្វើការជាមួយនឹងអគ្គនាយកដ្ឋានការពារអ្នកប្រើប្រាស់កិច្ចការប្រកួតប្រជែង និងបង្ក្រាបការក្លែងបន្លំ «ក.ប.ប.» នៃក្រសួងពាណិជ្ជកម្ម ដើម្បីបញ្ជាក់ឲ្យបានច្បាស់លាស់ឲ្យបានរហ័សប្រយ័ត្នយប់យូរសុបិនច្រើន ។
ករណីនេះមិនមែនជារឿងលេងសើច ដោយសារបរិមាណទឹកឃ្មុំដែលសង្ស័យនេះច្រើនណាស់ ។ ជិត២០តោន មិនមែនជារឿងតិចតួចឡើយ ហើយទម្រាំរកឃើញមិនដឹងថា ក្រុមហ៊ុននេះបាននាំចូលវាមកចែកចាយមិនដឹងប៉ុន្មានដង ប៉ុន្មានតោនមកហើយដែរ ។ សូមប្រញាប់ពិសោធន៍ និងប្រកាសលទ្ធផលបានឆាប់ពេលណាកាន់តែល្អពេលនោះ ហើយប្រកាសប្រាប់សាធារណៈជនភ្លាមៗ ។
នៅក្នុងករណីដែលទឹកឃ្មុំជាវត្ថុតាងសង្ស័យវា គឺជាទឹកឃ្មុំមែន ហើយក្រុមហ៊ុននោះខុសត្រូវរឿងគេចពន្ធ ឬរំលោភនិតិវិធីនាំចូលអី គឺវាមិនជាអីទេ គឺគ្រាន់តែនាំខ្លួនអ្នកពាក់ព័ន្ធធ្វើការបង់ពិន័យតាមច្បាប់ពាក់ព័ន្ធទៅគឺបានហើយ ។ ប៉ុន្តែប្រសិនបើវា គឺជាទឹកឃ្មុំដែលក្លែងក្លាយហើយជាពិសេសេវា គឺជាផលិតផលដែលចម្រាញ់ចេញពីសារធាតុគីមីប៉ះពាល់ដល់សុខភាព គួរតែប្រើប្រាស់ច្បាប់ឲ្យបានច្រើន ហើយពិន័យឲ្យម៉ឺងម៉ាត់ ។
មិនអាចបណ្តោយហើយក៏មិនគួរសម្រួលអ្វីទាំងអស់ ប្រសិនបើទឹកឃ្មុំនោះវាប៉ះពាល់ដល់សុខភាព ពីព្រោះនៅពេលនេះសុខភាពពលរដ្ឋយើងមួយចំនួន គឺពិតជាទ្រុឌទ្រោមខ្លាំងមែនដោយសារតែចំណីអាហារ ។ ពីមួយថ្ងៃទៅមួយថ្ងៃដោយសារតែការហូបចុកអាហារដែលមិនមានសុវត្ថិភាពមួយចំណែក និងការហូបចុកមិនចេះគិតមួយចំណែក អ្នកដែលរងគ្រោះព្រោះជំងឺមិនឆ្លងដូចជា ទឹកនោមផ្អែម បេះដូង ថ្លើម ក្រពះ ពោះវៀន តម្រង់នោម គឺកាន់តែមានច្រើន ។
នៅក្នុងករណីនេះ ប្រសិនបើវាប៉ះពាល់ដល់សុខភាពករណីច្បាប់ប្រឆាំងលើក្រុមហ៊ុន និងអ្នកដែលពាក់ព័ន្ធ ជាពិសេស គឺស្ត្រីដែលឃាត់ខ្លួនគួរតែឈានដល់ក្រមព្រហ្មទណ្ឌពីព្រោះវា គឺជារឿងអាយុជីវិត ។ ហើយលទ្ធផលនៃការពិសោធន៍នេះគួរតែផ្សព្វផ្សាយឲ្យពលរដ្ឋដឹង ដើម្បីពួកគេអាចអោយពលរដ្ឋប្រុងប្រយ័ត្ន ពីព្រោះទម្រាំរកឃើញមិនដឹងថា ក្រុមហ៊ុននេះនាំចូល និងចែកចាយប៉ុន្មានតោន ហើយនិងមានអ្នកដែលយកទៅចែកចាយបន្តប៉ុណ្ណាទេ ។ ក្រៅពីនោះ សមត្ថកិច្ចគួរតែស្រាវជ្រាវបណ្តាញ និងរកអ្នកដែលពាក់ព័ន្ធបោសសម្អាតឲ្យអស់ ។
សរុប ស្ថាប័នជំនាញ គួរតែកំណត់ និងធ្វើពិសោធន៍លើទឹកឃ្មុំទាំងនេះឲ្យបានរហ័ស ដើម្បីឆាប់ដឹងការពិត ។ ការដឹងការពិត កាន់តែលឿន ផលប៉ះពាល់ គឺកាន់តែតិច ។ ប៉ុន្តែប្រសិនបើការងារនេះយឺត ហើយលទ្ធផលបង្ហាញថា ទឹកឃ្មុំទាំងនេះក្លែងក្លាយហើយមានសារធាតុពលប៉ះពាល់ដល់សុខភាពក្រៅពីផ្តន្ទាទោសលើស្ត្រីរូបនេះអ្នកពាក់ព័ន្ធគួរតែស៊ើបអង្កេតបន្ថែម ហើយព្យាយាមរកបណ្តាញ ដើម្បីប្រមែប្រមូលផលិតផលទាំងនេះមកកម្ទេចចោល ដើម្បីកុំអោយវាបំផ្លាញសុខភាពពលរដ្ឋយើង ៕
ចែករំលែកព័តមាននេះ