រាជធានីភ្នំពេញ ៖ លោកឧត្តមសេនីយ៍ទោ ខូវ ឆាយ ប្រធានសហព័ន្ធកីឡាប្រដាល់គុន បានបង្ហាញនូវចក្ខុវិស័យវែងឆ្ងាយ ក្នុងការពង្រឹងគុណភាពរបស់វិស័យកីឡាប្រដាល់គុនខ្មែរ ឱ្យមានធនធានសម្បូរបែប ប្រកបដោយគុណភាពខ្ពស់ៗ…
រាជធានីភ្នំពេញ ៖ លោកឧត្តមសេនីយ៍ទោ ខូវ ឆាយ ប្រធានសហព័ន្ធកីឡាប្រដាល់គុន បានបង្ហាញនូវចក្ខុវិស័យវែងឆ្ងាយ ក្នុងការពង្រឹងគុណភាពរបស់វិស័យកីឡាប្រដាល់គុនខ្មែរ ឱ្យមានធនធានសម្បូរបែប ប្រកបដោយគុណភាពខ្ពស់ៗ ជាពិសេស យុវវជនថ្នាល ដើម្បីឱ្យមានឱកាសចេញទៅប្រកួតផ្សព្វផ្សាយ នូវក្បាច់គុនអត្តសញ្ញាណជាតិខ្មែរ ដែលជាមរតកដូនតាខ្មែ ឬឱ្យបាន ១០ប្រទេស ក្នុង១ឆ្នាំ នោះក្នុងរយៈពេល១០ឆ្នាំ នឹងស្មើនឹង១០០ប្រទេស និងការប្រកាសតែងតាំងអគ្គលេខាធិការថ្មី ជាផ្លូវការទៀតផង ។
ការបង្ហាញចក្ខុវិស័យ និងការដាក់ផែនការ ប្រកបដោយភាពជឿជាក់ ក្នុងឆន្ទៈដ៏មោះមុតរបស់លោកប្រធាន ខូវ ឆាវ ត្រូវបានធ្វើឡើង នៅក្នុងឱកាសសន្និសីទសារព័ត៌មាន កាលពីល្ងាចថ្ងៃទី១៤ ខែកុម្ភៈ ឆ្នាំ២០២៥ នៅអគារដ្ឋបាលមជ្ឈមណ្ឌលកីឡាកងយោធពលខេមរភូមិន្ទ (ស្តាតចាស់) ស្តីពីការរៀបចំការប្រកួតកីឡាប្រដាល់គុនខ្មែរ ជ្រើសរើសជើងឯកថ្នាក់ជាតិ ប្រចាំឆ្នាំ២០២៤ ។
លោក ខូវ ឆាយ បានសង្កត់ធ្ងន់យ៉ាងដូច្នេះថា ៖ «ខ្ញុំតែងតែជម្រាបជូនថា ប្រភេទកីឡាប្រដាល់គុនខ្មែរ គឺជាកីឡាអត្តសញ្ញាណជាតិ ហើយកម្ពុជា គឺជាម្ចាស់ក្បាច់គុនមរតកដូនតាខ្មែរ។ ដូច្នេះ ក្នុងនាមយើងជាអ្នកស្នងមរតកក្បាច់គុនដូនតាខ្មែរ មានភារកិច្ចមិនត្រឹមតែដឹកនាំការប្រកួត ដណ្តើមមេដាយ ខ្សែក្រវាត់ជូនជាតិប៉ុណ្ណោះទេ ប៉ុន្តែយើងមានភារកិច្ចចម្បងមួយទៀត ក្នុងការផ្សព្វផ្សាយក្បាច់គុនមរតកដូនតាខ្មែរ ដើម្បីឱ្យពិភពលោកបានស្គាល់ថា តើក្បាច់គុនរបស់ខ្មែរមានភាពអស្ចារ្យបែបណា» ។
ប្រធានសហព័ន្ធកីឡាប្រដាល់គុនខ្មែរ គូសបញ្ជាក់បែបនេះទៀតថា ៖ «ទាំងនេះ គឺជាកាតព្វកិច្ច ដ៏ចម្បងរបស់យើងទាំងអស់គ្នា ក្នុងនាមជាប្រជាពលរដ្ឋខ្មែរ និងក្នុងនាមសហព័ន្ធកីឡាប្រដាល់គុនខ្មែរ ដែលជាអ្នកទទួលខុសត្រូវធំបំផុត ក្នុងការអភិរក្ស និងអភិវឌ្ឍវិស័យកីឡាប្រដាល់គុនខ្មែរ ទាំងក្នុងព្រះរាជាណាចក្រកម្ពុជា ទាំងក្នុងសកលលោក។ ក្នុងអាណត្តិថ្មីទី៨ ឆ្នាំ២០២៥-២០២៩ គណៈកម្មាធិការប្រតិបត្តិនៃសហព័ន្ធកំពុងរៀបចំផែនការចេញទៅប្រកួតផ្សព្វផ្សាយនៅកាន់ឆាកអន្តរជាតិ ក្នុង១ឆ្នាំ យ៉ាងតិច ក៏១០ប្រទេសដែរ ហើយក្នុងរយៈពេល ១០ឆ្នាំ យើងអាចចេញទៅផ្សព្វផ្សាយ ១០០ប្រទេសហើយ» ។
«ដូច្នេះតាមរយៈផែនការនេះ ក្នុងរយៈពេលអនាគតខាងមុខ វិស័យកីឡាប្រដាល់គុនខ្មែរនឹងអាចទៅដល់គ្រប់ទិសទី នៅក្នុងពិភពលោក ហើយប្រទេសទាំងនោះ ដែលកម្ពុជាបានទៅដល់នឹងបានស្គាល់ពីកម្ពុជាយើងជាក់ជាមិនខាន ដោយមិនត្រឹមស្គាល់ប្រភេទកីឡាប្រដាល់គុនខ្មែរប៉ុណ្ណោះទេ ប៉ុន្តែពួកគេអាចនឹងស្វែងយល់អំពីប្រាសាទអង្គរវត្ត ដែលជាអច្ឆរិយៈវត្ថុលើលោក សម្បត្តិវប្បធម៌ធម្មជាតិនានា តំបន់ទេសចរណ៍ធម្មជាតិ-ប្រវត្តិសាស្ត្រជាច្រើន រួមជាមួយនឹងប្រជាជនខ្មែរប្រកបដោយស្នាមញញឹមរួសរាយរាក់ទាក់ សីលធម៌ ប្រពៃណីវប្បធម៌ ទំនៀមទម្លាប់ដ៏ល្អផូរផង់ផងដែរ» នេះបើតាមលោក ខូវ ឆាយ បានបន្ថែម ។
សង្កត់ធ្ងន់បន្ថែមពីលើនេះ លោកបន្ថែមថា ទាំងអស់នេះ គឺជាចំណុចទាក់ទាញរបស់កម្ពុជានៅលើពិភពលោក ឱ្យងាកមកស្រឡាញ់រាប់អាន ប្រទេសជាតិ និងប្រជាជនរបស់យើង ដើម្បីលើកតម្កើងសេដ្ឋកិច្ចជាតិ ជីវភាពរបស់ប្រជាជនយើង។ នេះជាផែនការរបស់សហព័ន្ធប្រដាល់គុនខ្មែរ ក្នុងការរួមចំណែកជាមួយរាជរដ្ឋាភិបាលកម្ពុជា ក្នុងការលើកស្ទួយកិត្តិយស កិត្តិសព្ទជាតិខ្មែរ តាមរយៈវិស័យកីឡាប្រដាល់គុនខ្មែរ។ «ក្នុងឱកាសនេះ យើងខ្ញុំសូមអំពាវនាវដល់បងប្អូនប្រជាពលរដ្ឋខ្មែរទាំងអស់ គ្រប់ស្រទាប់វណ្ណៈ គ្រប់ទិសទី ទាំងក្នុង និងក្រៅប្រទេសទាំងអស់សូមចូលរួមជាចលនាគាំទ្រដល់វិស័យកីឡាប្រដាល់គុនខ្មែរ ដើម្បីល្បីរន្ទឺនៅលើពិភពលោក ដែលជាមោទកភាពជាតិខ្មែរយើងទាំងមូល» ។
ជាមួយគ្នាជាមួយគ្នានេះដែរ លោក ខូវ ឆាយ ប្រធានសហព័ន្ធកីឡាប្រដាល់គុនខ្មែរ ក៏បានដឹកនាំកិច្ចប្រជុំគណៈកម្មាធិការប្រតិបត្តិអាណត្តិថ្មី សម្រាប់អាណត្តិទី៨ ឆ្នាំ២០២៥-២០២៩ ជាលើកដំបូង។ ជាលទ្ធផល នៃកិច្ចប្រជុំសម្រេចបាន ទី១.អង្គប្រជុំសម្រេចជាឯកច្ឆន្ទតែងតាំងឧត្តមសេនីយ៍ត្រី សៀន សុភក្ត្រ ជាអគ្គលេខាធិការ សហព័ន្ធកីឡាប្រដាល់គុនខ្មែរសម្រាប់អាណត្តិទី៨នេះ ជាផ្លូវការហើយ។ ទី២.បែងចែកតួនាទីភារកិច្ចជូនសមាជិកគណកម្មាធិការប្រតិបត្តិ។ ទី៣.ការងារត្រៀមរៀបចំការប្រកួតកីឡាប្រដាល់ជ្រើសរើសជើងឯកថ្នាក់ជាតិប្រចាំឆ្នាំ២០២៤ ៕
ចែករំលែកព័តមាននេះ