រាជធានីភ្នំពេញ ៖ នៅទីស្នាក់ការគណៈកម្មាធិការជាតិអូឡាំពិកកម្ពុជា កាលពីរសៀលថ្ងៃទី២៨ មិថុនា មានរៀបចំពិធីបំពាក់មេដាយមុនីសារាភ័ណ្ឌដល់គ្រូបង្វឹក-គ្រូជំនួយ ថ្នាក់ដឹកនាំ និងកីឡាករ-កីឡាការិនី ជនពិការ ចំនួន១៣នាក់ និងគ្រឿងឥស្សរិយយសព្រះរាជាណាចក្រកម្ពុជាថ្នាក់ធិបឌិន្ទចំនួន១គ្រឿង ជូនលោកយី វាសនា អគ្គលេខាធិការគណៈកម្មាធិការប៉ារ៉ាឡាំពិកកម្ពុជា។ ពិធីនេះ បានប្រារព្ធធ្វើក្រោមអធិបតីភាព លោកថោង ខុន រដ្ឋមន្ត្រីក្រសួងទេសចរណ៍ និងជាប្រធានគណៈកម្មាធិការជាតិអូឡាំពិកកម្ពុជា។
លោកយី វាសនា គឺជាអ្នកដឹកនាំដ៏ឆ្នើម និងមានស្នាដៃល្អជាច្រើននាពេលកន្លងមក ហើយត្រូវបានព្រះមហាក្សត្រនៃព្រះរាជាណាចក្រកម្ពុជា ព្រះករុណាព្រះបាទសម្តេចព្រះបរមនាថ នរោត្តមសីហមុនី ប្រោសព្រះរាជទាននូវគ្រឿងឥស្សរិយយសព្រះរាជាណាចក្រកម្ពុជា ថ្នាក់ធិបឌិន្ទ។ ចំណែក១៣នាក់ផេ្សងទៀតមាន៣នាក់ ទទួលបានមេដាយមុនីសារាភ័ណ្ឌថ្នាក់ធិបឌិន្ទគឺ លោកអ៊ន អេង គ្រូបង្វឹក លោកជឹម ផាន កីឡាករ លោកគឹម វណ្ណា កីឡាករ។
រីឯមេដាយមុនីសារាភ័ណ្ឌថ្នាក់សេនាមានចំនួន១០នាក់គឺ ១-លោកជំទាវនៅ លក្ខិណា ភរិយាលោកយី វាសនា និងជាជំនួយការអគ្គលេខាធិការគណៈកម្មាធិការប៉ារ៉ាឡាំពិកកម្ពុជា ២-លោកម៉ៅ សុថា ប្រធានប្រតិភូកីឡា ៣-លោកហែម លំផាត់ គ្រូបង្វឹក ៤-លោកផៃ សុខ គ្រូជំនួយ ៥-លោកយ៉ែម បៃ គ្រូជំនួយ ៦-លោកបុន ហុង កីឡាករ ៧-លោកកន កាន កីឡាករ ៨-លោកណុប រដ្ឋា កីឡាករ ៩-លោកហ៊ុន ប៊ុនទិត្យ កីឡាករ និង១០-កញ្ញាចិន សេងហុង កីឡាការិនី។
ទាំងគ្រូបង្វឹក គ្រូជំនួយ ថ្នាក់ដឹកនាំ និងកីឡាករ កីឡាការិនីទាំង១៣រូប ដែលទទួលបានមេដាយនាពេលនេះ គឺសុទ្ធសឹងតែជាអ្នកដែលមានស្នាដៃឆ្នើមក្នុងការចូលរួមប្រកួតកីឡាអាស៊ីប៉ារ៉ាហ្គេមលើកទី១ នៅទីក្រុងហ្គ័ងចូវ ប្រទេសចិនកន្លងមក ដែលទទួលបានមេដាយមាស ប្រាក់ និងសំរឹទិ្ធយ៉ាងច្រើនសន្ធឹកសន្ធាប់ជូនប្រទេសជាតិ៕
ចែករំលែកព័តមាននេះ