ខេត្តឧត្តរមានជ័យ ៖ តាមសេចក្តីប្រកាសព័ត៌មានរបស់អយ្យការអមសាលាដំបូងខេត្តឧត្តរ មានជ័យ ស្តីពីការចោទប្រកាន់លើអ្នកកាសែតអនឡាញម្នាក់ និងអ្នកបកប្រែភាសាថៃម្នាក់ ពាក់ព័ន្ធករណីយកមីនតោនមួយគ្រាប់ទៅដល់ស្នាក់ការនគរបាល ប៉ុស្តិ៍ថា កាលពីថ្ងៃទី០៧ ខែកុម្ភៈ…
ខេត្តឧត្តរមានជ័យ ៖ តាមសេចក្តីប្រកាសព័ត៌មានរបស់អយ្យការអមសាលាដំបូងខេត្តឧត្តរ មានជ័យ ស្តីពីការចោទប្រកាន់លើអ្នកកាសែតអនឡាញម្នាក់ និងអ្នកបកប្រែភាសាថៃម្នាក់ ពាក់ព័ន្ធករណីយកមីនតោនមួយគ្រាប់ទៅដល់ស្នាក់ការនគរបាល ប៉ុស្តិ៍ថា កាលពីថ្ងៃទី០៧ ខែកុម្ភៈ ឆ្នាំ២០២កន្លងមក អយ្យការអមសាលាដំបូងខេត្តឧត្តរមានជ័យ បានចាត់ការលើសំណុំ រឿងព្រហ្មទណ្ឌលេខ ០៣៧ ចុះថ្ងៃទី០៧ ខែកុម្ភៈ ឆ្នាំ២០២៥ ពាក់ព័ន្ធករណី(បោះបង់វត្ថុគ្រឿងផ្ទុះដែលអាចនាំឲ្យមានគ្រោះថ្នាក់ដល់បុគ្គល) ដែលបង្កឡើងដោយជនសង្ស័យ ៖១-ឈ្មោះ ទី ពិទូ ភេទប្រុស អាយុ៤៥ឆ្នាំ ជាអ្នកសារព័ត៌មានអនឡាញ ។
និង២-ឈ្មោះ ពែង ពុយ ភេទប្រុស អាយុ៤៤ឆ្នាំ ជាអ្នកបកប្រែភាសាថៃ បាននាំគ្នាធ្វើសកម្មភាពទៅយកគ្រាប់មីនតោន និងដឹកដែលជាវត្ថុងាយនឹងមានហានិភ័យខ្ពស់ អាចផ្ទុះធ្វើឲ្យមានគ្រោះថ្នាក់ដល់មនុស្សដោយគ្មានការអនុញ្ញាត ចេញពីទីកន្លែងដែលបានដាក់បំរាម និងហាមឃាត់នៃតំបន់គ្រោះថ្នាក់មីន យកមកទុកចោលក្នុងប៉ុស្តិ៍នគរបាលរដ្ឋបាលសង្កាត់អូរស្មាច់ ជាទីសាធារណៈ ដែលអាចសាធារណជនចូលដល់ ។
វត្ថុនេះ ជាមីនតោនដែលត្រូវបានអាជ្ញាធរប្រទះឃើញតាំងពីឆ្នាំ២០២១ ដោយអង្កភាពស៊ីម៉ាក់(CMAC)ដាក់ស្លាកបំរាម និងហាមឃាត់ក្នុងតំបន់គ្រោះថ្នាក់ដោយសារមីន និងជាចំណុចតំបន់ស ព្រំដែនរវាងប្រទេសកម្ពុជានិងប្រទេសថៃ ដោយអង្គភាពស៊ីម៉ាក់(CMAC)កម្ពុជាមិនអាចដោះមីននៅចំណុចនោះបាននៅឡើយ ដោយពុំទាន់មានការឯកភាពពីភាគីប្រទេសថៃ ។
ក្រោយពីបានពិនិត្យទៅលើសំណុំរឿង និងសួរចម្លើយលើជនសង្ស័យ តំណាងអយ្យការបានសម្រេចចោទ ប្រកាន់លើជនសង្ស័យ ១-ឈ្មោះ ទី ពិទូ ភេទប្រុស អាយុ៤៥ឆ្នាំ និង២-ឈ្មោះ ពែង ពុយ ភេទប្រុស អាយុ៤៤ឆ្នាំ ពីបទបោះបង់វត្ថុគ្រឿងផ្ទុះដែលអាចនាំឲ្យគ្រោះថ្នាក់ដល់បុគ្គល ប្រព្រឹត្តនៅចំណុចភូមិអូរស្មាច់ សង្កាត់អូរស្មាច់ ក្រុងសំរោង ខេត្តឧត្តរមានជ័យ កាលពីថ្ងៃទី០៦ ខែកុម្ភៈ ឆ្នាំ២០២៥ ។ នេះជាបទល្មើសព្រហ្មទណ្ឌដែលបញ្ញតិផ្តន្ទាទោសតាមមាត្រា ៤៩១ នៃក្រមព្រហ្មទណ្ឌ តាមដីកាសន្និដ្នានបញ្ជូនរឿងឲ្យស៊ើបសួរលេខ ០២២ ដសបស ចុះថ្ងៃទី០៨ ខែកុម្ភៈ ឆ្នាំ២០២៥ បញ្ជូនទៅចៅក្រមស៊ើបសួរនៃសាលាដំបូងខេត្តឧត្តរមានជ័យ ដើម្បីចាត់ការបន្តតាមនីតិវិធី ។
តាមសេចក្តីប្រកាសព័ត៌មានរបស់អ្នកនាំពាក្យអយ្យការអមសាលាដំបូងខេត្តឧត្តរមានជ័យ ស្តីពីការចោទប្រកាន់លើអ្នកកាសែតអនឡាញម្នាក់ និងអ្នកបកប្រែភាសាថៃម្នាក់ ពីបទបោះបង់វត្ថុគ្រឿងផ្ទុះដែលអាចនាំឲ្យគ្រោះថ្នាក់ដល់បុគ្គល តាមបញ្ញតិមាត្រា ៤៩១ នៃក្រមព្រហ្ម ទណ្ឌបានចែងពីបទបោះអាវុធនៅទីកន្លែងសាធារណៈ អំពើបោះបង់អាវុធ ឬវត្ថុដទៃទៀតដែលអាចនាំឲ្យមានគ្រោះថ្នាក់ដល់បុគ្គល នៅក្នុងទីសាធារណៈ ឬទីកន្លែងដែលសាធារណជនអាចចូលទៅបាន ត្រូវផ្តន្ទាទោសដាក់ពន្ធនាគារពី៦ខែទៅ៣ឆ្នាំ និងពិន័យជាប្រាក់ពី១លានទៅ៦លានរៀល ។
នេះជាលទ្ធផលអ្នកកាសែតអនឡាញម្នាក់ និងអ្នកបកប្រែភាសាថៃម្នាក់ ដែលអត់ការងារធ្វើរពិសដៃ ពាក្យចាស់ថា រពិសដៃផ្ទៃឆ្អែត ។ ប៉ុន្តែរពិសដៃបែបនេះ មិនមែនឆ្អែតផ្ទៃទេ គឺរពិសដៃវ៉ៃខ្នោះ ។ ពួកគេបានយកគ្រាប់មីនទៅដាក់ក្នុងស្នាក់ការនគរបាលប៉ុស្តិ៍ ឲ្យមានរឿងកើតឡើង ចាត់ទុកថា ជាសំណាងល្អដែលមីនតោនមិនផ្ទុះ បើមានហេតុការណ៍ផ្ទុះជាយថាហេតុ មិនដឹងជាមានមហន្តរាយបែបណាខ្លះនោះទេ ៕
ចែករំលែកព័តមាននេះ