ទីក្រុងប៊ែឡាំង៖ គណបក្សប្រជាធិបតេយ្យសង្គមនៅអាល្លឺម៉ង់ដែលកំពុងដឹកនាំប្រទេសអាល្លឺម៉ង់សព្វថ្ងៃនេះបានចេញមុខច្រានចោលផែនការរបស់លោកត្រាំដែលចង់គ្រប់គ្រងតំបន់ហ្កាហ្សា និងផ្លាស់ប្ដូរទីលំនៅរបស់ជនជាតិប៉ាឡេស្ទីននៅទីនោះនៅទីប្រទេសផ្សេងដូចជាអេហ្ស៊ីប និងហ្សក់ដង់ជាដើម។ លោកត្រាំចង់ប្រែក្លាយហ្កាហ្សាទៅជាតំបន់រមណីយដ្ឋានលំហែកាយមាត់សមុទ្រ។
អធិការបតីអាល្លឺម៉ង់ លោកសូល បានចេញមុខប្រឆាំងនឹងផែនការនេះ។ លោកសូមប្រឆាំងជាដាច់ខាតចំពោះផែនការរបស់លោកត្រាំនៅត្រង់ចំណុចនេះ។ លោកថ្លែងថាប្រជាជនដែលកំពុងរស់នៅតំបន់ហ្កាហ្សាសព្វថ្ងៃនេះមិនត្រូវគេផ្លាស់ប្ដូរទៅរស់នៅប្រទេសដទៃទៀតជាដាច់ខាត។ នេះមិនមែនជាផែនការដែលត្រឹមត្រូវនោះទេ។
លោកសូលសង្កត់ធ្ងន់ថាអ្វីដែលគេគួរខិតខំប្រឹងប្រែងឱ្យបានខ្លាំងគឺត្រូវផ្ដោតសំខាន់ទៅលើការបន្ធូរបន្ថយសភាពការណ៍ដែលកំពុងតានតឹងខ្លាំង និងស្វែងរកដំណោះស្រាយផ្នែកការទូតដើម្បីបិទបញ្ចប់ជម្លោះរវាងអ៊ីស្រាអែល និងប៉ាឡេស្ទីន។ ធ្វើបែបនេះដើម្បីធានាថាជនជាតិទាំង២អាចរួមរស់នៅជាមួយគ្នាដោយសន្តិសហវិជ្ជមាន។
ប្រសាសន៍របស់ថ្នាក់ដឹកនាំអាល្លឺម៉ង់ធ្វើឡើងដើម្បីជាការឆ្លើយតបទៅនឹងសេចក្ដីថ្លែងការណ៍របស់លោកត្រាំនៅក្នុងសន្និសីទសារព័ត៌មានរួមគ្នាជាមួយលោកណឺតាន់យ៉ាហ៊ូនៅសេតវិមាន។ កាលនោះ លោកត្រាំថ្លែងថាប្រជាជននៅតំបន់ហ្កាហ្សាគួរតែឈប់រស់នៅទីនោះតទៅទៀតបន្ទាប់ពីមានសង្គ្រាមដ៏បង្ហូរឈាមជាងមួយឆ្នាំធ្វើឱ្យខូចខាតហេដ្ឋារចនាសម្ព័ន្ធ និងផ្ទះសម្បែងស្ទើរតែក្លាយជាផេះ។
ឥឡូវនេះ សម្រាប់តំបន់ហ្កាហ្សា បើមិនអនុវត្តតាមសេណារីយោរបស់លោកត្រាំទេ តំបន់នេះត្រូវសាងសង់ឡើងវិញស្ទើរតែទាំងស្រុង ហើយត្រូវការចំណាយថវិកាច្រើនណាស់រហូតដល់រាប់ពាន់ ឬរាប់សិបពាន់លានដុល្លារ។ ផែនការរបស់លោកត្រាំទទួលរងការរិះគន់ពេញពិភពលោក។ ប្រទេស និងស្ថាប័នអន្តរជាតិជាច្រើនរួមទាំងអង្គការសហប្រជាជាតិក៏ចេញមុខជំទាស់ផងដែរ។ ប្រទេសចិន រុស្ស៊ី តួកគី អេស្ប៉ាញ បារាំង អារ៉ាប៊ីសាអូឌីត អេហ្ស៊ីប និងហ្សកដង់សុទ្ធតែចេញមុខប្រឆាំងយ៉ាងដាច់អហង្កា៕
<<កំណត់សម្គាល់: រាល់ការបញ្ចេញមតិទៅលើអត្ថបទមិនមែនជាការទទួលខុសត្រូវរបស់កោះសន្តិភាពទេ។ វាជាការទទួលខុសត្រួវដោយផ្ទាល់របស់អ្នកបញ្ចេញមតិ។ ដូច្នេះ សូមមិត្តអ្នកអានទាំងអស់ ធ្វើការបញ្ចេញ មតិប្រកបដោយការទទួលខុសត្រូវ មានសីលធម៌ និង ប្រកបដោយន័យស្ថាបនា ហើយចៀសវាង ការបញ្ចេញមតិណាដែលមិនពិត ជេរប្រមាថ និង អុជអាល នាំដល់ការយល់ច្រឡំ ឬ ការរើសអើង ជាតិសាសន៍ សាសនា ឬក៏ បុគ្គលណាមួយ។>>
ចែករំលែកព័តមាននេះ