ទីក្រុងវ៉ាស៊ីនតោន៖ លោកត្រាំថ្លែងថាលោកមិនទាន់ប្រញាប់ប្រញាល់ពេកទេក្នុងការជជែកគ្នាជាមួយប្រធានាធិបតីចិនទោះបីសង្គ្រាមពាណិជ្ជកម្មចាប់ផ្ដើមផ្ទុះឡើងក៏ដោយ។ ការថ្លែងដូច្នេះបន្ទាប់ពីចិនដំឡើងពន្ធ១០%ទៅលើទំនិញរបស់អាមេរិក។ ជាពិសេស ហ្គាស និងធ្យូងថ្មដំឡើងពន្ធ១៥%។ លោកត្រាំសម្រេចចិត្តព្យួរទុកនូវគម្រោងដំឡើងពន្ធ២៥%ទៅលើប្រទេសកាណាដា និងម៉ិកស៊ីកូបន្ទាប់ពីប្រទេសទាំង២យល់ព្រមរឹតបន្តឹងសន្តិសុខនៅតាមព្រំដែនដើម្បីទប់ស្កាត់ជនអន្តោប្រវេសន៍ និងគ្រឿងញៀន។
ប៉ុន្តែប្រទេសចិនមិនបានបន្ទន់ឥរិយាបថ និងធ្វើតាមការទាមទាររបស់លោកត្រាំទេ។ មិនតែប៉ុណ្ណោះ ចិនធ្វើផ្គើនដាក់អាមេរិកថែមទៀតដោយដំឡើងពន្ធជាលក្ខណៈវាយបក។ លោកត្រាំធ្លាប់បង្ហើបឱ្យដឹងថាលោកចង់សន្ទនាគ្នាតាមទូរស័ព្ទជាមួយលោកស៊ីជីនពីងនៅដើមសប្ដាហ៍នេះ។ ប៉ុន្តែជាក់ស្ដែង លោកបានកែប្រែគម្រោងនេះវិញហើយ។ លោកនិយាយដោយខ្លីថាមិនចាំបាច់ប្រញាប់ប្រញាល់ពេកទេក្នុងការជជែកគ្នា។
កាលពីថ្ងៃចន្ទ អ្នកនាំពាក្យសេតវិមានថ្លែងថាលោកត្រាំត្រៀមជជែកគ្នាជាមួយលោកស៊ីជីនពីងនៅដើមសប្ដាហ៍នេះ។ ប៉ុន្តែកាលពីយប់មិញ គម្រោងសន្ទនាគ្នានេះគ្មានព័ត៌មានថ្មីបញ្ជាក់ថានឹងធ្វើឡើងនៅពេលណាទេ។ លោកស្រីបញ្ជាក់អំពីមូលហេតុធំដែលលោកត្រាំដំឡើងពន្ធនោះព្រោះមិនចង់ឱ្យគ្រឿងញៀនបន្តហូរចូលពីប្រទេសចិនទៅក្នុងប្រទេសអាមេរិក។
លើកនេះខុសពីអាណត្តិទី១របស់លោកត្រាំ។ ប្រទេសចិនត្រៀមចាត់វិធានទប់ទល់នឹងការដំឡើងពន្ធ។ កាលពីម្សិលមិញ ប្រទេសចិនប្រកាសដំឡើងពន្ធ១៥%ទៅលើធ្យូងថ្ម និងហ្គាស និង១០%ទៅលើប្រេងឆៅ, គ្រឿងយន្តកសិកម្ម, រថយន្តធុនធំ និងឡានភិកអាប់។ ចិនក៏ព្រមានចាត់វិធានការក្ដៅទៅលើក្រុមហ៊ុនបច្ចេកវិទ្យារបស់អាមេរិកដូចជាហ្គូហ្កល និងក្រុមហ៊ុនផលិតសំលៀកបំពាក់ជាដើម។ ចិនត្រៀមដាក់ពាក្យប្ដឹងទៅអង្គការពាណិជ្ជកម្មពិភពលោកថែមទៀតដើម្បីបង្ហាញការកើតទុក្ខមិនសុខចិត្ត។
របាយការណ៍របស់ប្រទេសចិនបង្ហាញថាទំហំនាំចេញហ្គាស ប្រេងឆៅ និងធ្យូងថ្មរបស់អាមេរិកទៅលក់នៅប្រទេសចិនមានទំហំទឹកប្រាក់៧ពាន់លានដុល្លារកាលពីឆ្នាំ២០២៤។ ប៉ុន្តែទំហំនេះមានចំនួនតិចតួចបើប្រៀបធៀបជាមួយទំហំដែលចិននាំចូលពីរុស្ស៊ី។ កាលពីឆ្នាំ២០២៤ ចិននាំចូលពីរុស្ស៊ីនូវទំនិញប្រភេទនេះនៅក្នុងតម្លៃសរុប៩៤ពាន់លានដុល្លារ។
បន្ទាប់ពីទទួលរងការដំឡើងពន្ធ២៥% កាណាដា និងម៉ិកស៊ីកូយល់ព្រមធ្វើតាមការទាមទាររបស់លោកត្រាំជាថ្នូរនឹងការព្យួរទុកការដំឡើងពន្ធនេះ។ នៅអំឡុងពេល៣០ថ្ងៃនៃការព្យួរនេះ ប្រទេសទាំង២នឹងពិភាក្សាគ្នាបន្ថែមទៀតនៅខែមីនាដើម្បីសម្រេចឱ្យបាននូវកិច្ចព្រមព្រៀងដ៏ច្បាស់លាស់មួយ។ ម៉ិកស៊ីកូថ្លែងថាខ្លួនចាប់ផ្ដើមបញ្ជូនកម្លាំង១ម៉ឺននាក់ដើម្បីទប់ស្កាត់អ្នកចំណាកស្រុក និងគ្រឿងញៀន។ ចំណែកកាណាដាត្រៀមស្រង់ឈ្មោះពួកជួញដូរគ្រឿងញៀនដាក់ទៅក្នុងបញ្ជីភេរវកម្ម៕
ចែករំលែកព័តមាននេះ