បន្ទាប់ពីសម្រុកការងារដ៏សស្រាក់សស្រាំនៅថ្នាក់មជ្ឈឹមពោល គឺថ្នាក់កណ្តាលជាមួយនឹងស្ថាប័នថ្នាក់ជាតិធំៗជិត២ឆ្នាំមកនេះ សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជាទំនងជាវាយលុកសមរភូមិ នយោបាយជាមួយនឹងពលរដ្ឋថ្នាក់មូលដ្ឋាន ហើយនៅមុនពេលការបោះឆ្នោតជ្រើសរើសក្រុមប្រឹក្សាឃុំ/សង្កាត់ និងថ្នាក់ជាតិមកដល់ ។…
បន្ទាប់ពីសម្រុកការងារដ៏សស្រាក់សស្រាំនៅថ្នាក់មជ្ឈឹមពោល គឺថ្នាក់កណ្តាលជាមួយនឹងស្ថាប័នថ្នាក់ជាតិធំៗជិត២ឆ្នាំមកនេះ សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជាទំនងជាវាយលុកសមរភូមិ នយោបាយជាមួយនឹងពលរដ្ឋថ្នាក់មូលដ្ឋាន ហើយនៅមុនពេលការបោះឆ្នោតជ្រើសរើសក្រុមប្រឹក្សាឃុំ/សង្កាត់ និងថ្នាក់ជាតិមកដល់ ។
គោលដៅនៃសកម្មភាពនយោបាយរបស់សម្តេចធិបតីនាយករដ្ឋមន្ត្រី នៅក្នុងឆ្នាំ២០២៥នេះទំនងជាវាយលុកខ្លាំង និងក្តៅគគុកនៅថ្នាក់មូលដ្ឋាន ដើម្បីក្តាប់សភាពការណ៍ និងស្វែងរកបទពិសោធន៍ក៏ដូចជា រិះរកនូវចំណុចនៃបញ្ហារសើបនានា នៅក្នុងមូលដ្ឋាន ដើម្បីបន្តកសាងមូលដ្ឋានគ្រឹះនៃអំណាចបន្ត ហើយក៏ដើម្បីរក្សាភាពឈ្នះរបស់គណបក្សកាន់អំណាចដែលមានប្រភពពីមូលដ្ឋានផងដែរ ។
កន្លងមកថ្នាក់ដឹកនាំគណបក្សប្រជាជនកម្ពុជាអាចច្បាមអំណាចបានពីព្រោះគណបក្សនេះក្តាប់បានអំណាចយ៉ាងរឹងមាំនៅមូលដ្ឋាន ។ ដូច្នេះថ្នាក់ដឹកនាំបន្តវេនរបស់គណបក្សនេះ នឹងមិនទុកមូលដ្ឋានឲ្យប្រហោងសម្រាប់ក្រុមប្រឆាំងមានចន្លោះហក់ចូលបានឡើយ ។
នៅក្នុងរយៈពេលជាង១ខែនៃឆ្នាំ២០២៥ សម្តេចធិបតី បានកាត់បន្ថយកម្មវិធីថ្នាក់ជាតិជាច្រើន ។ ជំនួបជាមួយនឹងភ្ញៀវការទូត និងក្រុមហ៊ុនក៏ដូចជា អ្នកជំនាញការបរទេស គឺនៅមានជាប្រក្រតី ប៉ុន្តែកម្មវិធីថ្នាក់ក្រសួង គឺសម្តេចបង្ហាញវត្តមានតិចបំផុត ស្របពេលដែលក្រសួងនានាបានធ្វើសន្និបាតបូកសរុបជាបន្តបន្ទាប់ក៏ដោយ ។
សម្តេចធិបតីបានបង្ហាញវត្តមានជាបន្តបន្ទាប់នៅថ្នាក់មូលដ្ឋាន ហើយកម្មវិធីនោះទៀតសោត គឺជាកម្មវិធីបែបសាមញ្ញបំផុត ។ សម្តេចធិបតីបានចំណាយពេលវេលាចុះទៅផ្ទាល់ជួបជាមួយនឹងកសិករ និងពលរដ្ឋនៅមូលដ្ឋានផ្ទាល់ៗជាមួយនឹងក្រុមការងារតិចតួចបំផុត ខណៈដែលបរិយាកាសនោះ គឺរឹតតែសាមញ្ញ ពោល គឺសឹងតែសាមញ្ញជាងកម្មវិធីចាក់បាសរាំតាមភូមិខ្លះផង ។
ករណីដូចជា ជំនួបផ្ទាល់ជាមួយនឹងបងប្អូនប្រជាកសិករនៅសហគមន៍កសិកម្មទំនើបស្វាយចន្ទី នៅ ស្រុកប្រាសាទសំបូរ ខេត្តកំពង់ធំជាដើម គឺសម្តេចធិបតី និងថ្នាក់ដឹកនាំបច្ចេកទេស២ទៅ៣រូប អង្គុយនៅលើក្រណាត់តង់ក្រាលលើដី នៅក្នុងសភាពស្មើភាពជាមួយនឹងកសិករ និយាយដោយក្បាលមីក្រូតិចៗ ។ កម្មវិធីនេះគ្មានការចាក់ផ្សាយផ្ទាល់ ហើយក៏គ្មានវេទិកា ដែលមានមន្ត្រីហែរហមអធិកអធមឡើយ គឺមានតែការនិយាយគ្នាត្រង់ទៅត្រង់មករវាងថ្នាក់ដឹកនាំកំពូល ថ្នាក់ដឹកនាំបច្ចេកទេស និងពលរដ្ឋផ្ទាល់ៗតែម្តង ។
ក្រៅពីនេះសម្តេចធិបតី ក៏បានចុះទៅជួបជាមួយនឹងកសិករសន្ទនាគ្នាយ៉ាងសប្បាយរីករាយនៅខេត្តតាកែវ ហើយនៅថ្ងៃអនាគតសម្តេចនាយករដ្ឋមន្ត្រីទំនងជានឹងបង្កើនសកម្មភាពបែបនេះនៅទីតាំងផ្សេងៗបន្ថែមទៀត ។
ជាការពិតប្រទេសកម្ពុជាមានផ្ទៃដី១៨១.០៣៥ គីឡូម៉ែត្រការ៉េ មានរដ្ឋបាលគ្រប់គ្រង២៥ខេត្តរាជធានី ហើយមានប្រជាពលរដ្ឋនោះប្រមាណជា១៧លាននាក់ ដូច្នេះថ្នាក់ដឹកនាំកំពូលទំនងជាមិនអាចដើរជួបទាំងអស់ និងគ្រប់កន្លែងបានទេ ។ ប៉ុន្តែ ដើម្បីបង្ការភាពចៃដន្យ ពលរដ្ឋគួរតែរៀនសន្សំ រៀនកសាងភាពក្លាហាន រៀននៅក្នុងការប្រមូលសន្សំនូវបញ្ហាធំៗនៅក្នុងមូលដ្ឋាន ដើម្បីត្រៀមគោរពរាយការណ៍ជូនថ្នាក់ដឹកនាំបើមានឱកាស ។ ការរាយការណ៍ផ្ទាល់ៗបែបនេះប្រសិទ្ធភាព គឺលឿន ហើយមិនចាំបាច់មានរបាយការណ៍គោរពសុំយោបល់ច្រើន ។
ឱកាសនៅក្នុងការជួបថ្នាក់ដឹកនាំដោយងាយៗនៅក្នុងបរិយាកាសបែបនេះកម្រមានណាស់ ដូច្នេះប្រសិនបើយើងអាចមានឱកាស យើងត្រូវតែតាំងចិត្តជាពលរដ្ឋវ័យឆ្លាត និងមានទំនួលខុសត្រូវ ហើយក្លាហានហ៊ាននិយាយចំៗអ្វីដែលជាបញ្ហានៅក្នុងសហគមន៍ អ្វីដែលតម្រូវការ និងអ្វីដែលជាការចង់បានរបស់ពលរដ្ឋជារួម ។
ប្រសិនបើយើងមានឱកាសជួបថ្នាក់ដឹកនាំផ្ទាល់ៗ ហើយលោកបើកដៃឲ្យនិយាយនៅក្នុងបរិយាកាសដែលរាក់ទាក់ស្និទ្ធស្នាលបែបនេះ គឺត្រូវតែហ៊ាននិយាយពីបញ្ហាប្រឈមក្នុងសហគមន៍បើមាន ដោយគូសបញ្ជាក់ពីបញ្ហាសំខាន់ៗដែលប៉ះពាល់ដល់ប្រជាជនដូចជាហេដ្ឋារចនាសម្ព័ន្ធ ការអប់រំ ការថែទាំសុខភាព សន្តិសុខ ឬការងារ ហើយសូម្បីតែរឿងរដ្ឋបាលមូលដ្ឋាន ដើម្បីស្វែងរកដំណោះស្រាយ ។
បងប្អូនកុំខ្លាច គឺត្រូវតែក្លាហានហ៊ាននិយាយ ហើយត្រូវចាំថា បើយើងជាពលរដ្ឋវ័យឆ្លាត គឺយើងអាចបង្កើតចំណាប់អារម្មណ៍ខ្លាំង រួមចំណែកយ៉ាងមានអត្ថន័យដល់ការអភិវឌ្ឍជាតិ និងធានាថា សំឡេង និងសហគមន៍របស់ពួកគេត្រូវបានបញ្ជូនដល់ថ្នាក់ដឹកនាំដោយផ្ទាល់ៗ ។
ប្រទេសមួយរីកចម្រើនត្រូវបានកសាងដោយពលរដ្ឋក្លាហាន ទទួលខុសត្រូវ និងសកម្ម។ ពលរដ្ឋដែលវ័យឆ្លាតមិនរង់ចាំការផ្លាស់ប្តូរតាមកត្តាសត្យានុម័តទេ គឺត្រូវតែសកម្ម ។ តាមរយៈការខិតទៅរកឱកាសទាំងនេះដោយប្រាជ្ញា ភាពក្លាហាន និងចក្ខុវិស័យសម្រាប់វឌ្ឍនភាព ប្រជាពលរដ្ឋអាចធានាថា សំឡេងរបស់អ្នកត្រូវបានឮ ហើយសហគមន៍របស់ពួកគេរីកចម្រើន ។ ផ្លូវទៅកាន់ភាពចម្រុងចម្រើនមិនមែនទៅមុខដោយខ្វះភាពក្លាហាននោះឡើយ វា គឺជាកិច្ចខិតខំប្រឹងប្រែងរួមគ្នាដែលទាមទារឱ្យទាំងអ្នកដឹកនាំ និងប្រជាជនធ្វើការរួមគ្នា ដើម្បីអនាគតដ៏ល្អប្រសើរ ៕
ចែករំលែកព័តមាននេះ