ខេត្តបាត់ដំបង ៖ ពួកក្មេងអន្ធពាលចំនួន០២ក្រុមមានចំនួន០៧នាក់ ដែលដេញវាយតប់គ្នាផ្អើលពេញក្រុងកណ្ដាលយប់ដោយគ្មានអ្នកចាញ់គ្មានអ្នកឈ្នះ ត្រូវបានសមត្ថកិច្ចកសាងសំណុំរឿងបញ្ជូនទៅប្រគល់ជូនសាលាដំបូងខេត្តនៅព្រឹកថ្ងៃទី ០៥ កុម្ភៈ ដើម្បីចាត់ការតាមនីតិវិធី ។ លោក…
ខេត្តបាត់ដំបង ៖ ពួកក្មេងអន្ធពាលចំនួន០២ក្រុមមានចំនួន០៧នាក់ ដែលដេញវាយតប់គ្នាផ្អើលពេញក្រុងកណ្ដាលយប់ដោយគ្មានអ្នកចាញ់គ្មានអ្នកឈ្នះ ត្រូវបានសមត្ថកិច្ចកសាងសំណុំរឿងបញ្ជូនទៅប្រគល់ជូនសាលាដំបូងខេត្តនៅព្រឹកថ្ងៃទី ០៥ កុម្ភៈ ដើម្បីចាត់ការតាមនីតិវិធី ។
លោក ឈឿង គឹមសុង ស្នងការរងទទូលផែនព្រហ្មទណ្ឌបានប្រាប់ថា ក្រុមក្មេងទំនើងនេះ មាន០២ក្រុម បានដេញវាយតប់គ្នាយ៉ាងអនាធិបតេយ្យ ហើយត្រូវបានកម្លាំងអធិការក្រុងបាត់ដំបងចុះស្រាវជ្រាវតាមឃាត់ខ្លួនបានចំនួន០៧នាក់ជាបន្តបន្ទាប់ ។
លោកបានបញ្ជាក់ថា ក្មេងទំនើងទាំង០២ក្រុមនេះដេញវាយគ្នាទៅវិញទៅមក គ្មានទេភាគីរងគ្រោះ ។ អំពើហិង្សាដែលបង្កឡើងដោយក្រុមក្មេងអន្ធពាលទាំង០២នាក់ក្រុមនេះផ្ដើមចេញពីផឹកស៊ីប៉ះសម្ដីគ្នា ។
តាមរយៈរបាយការណ៍ អធិការក្រុងបាត់ដំបង លោកពេជ្រ សារ៉ែន បានឲ្យដឹងថា ជនទំនើងទាំង០៧នាក់នេះ មាន០២ក្រុម ។ ក្រុមទី១៖ ១-ឈ្មោះ គឹម ប្រឹក្សា អាយុ១៧ឆ្នាំ និង២-ឈ្មោះ វ៉ាត ដាវ័ន្ត អាយុ១៥ឆ្នាំ ។ ក្រុមទី២៖ ១-ឈ្មោះ រ៉េត ចាន់ អាយុ១ឆ្នាំ ២-ឈ្មោះ រី ចាន់ថា ហៅ ប្រូវី អាយុ១៦ឆ្នាំ ៣-ឈ្មោះ ឈឿង សុវណ្ណារាជ អាយុ១៦ឆ្នាំ ៤-ឈ្មោះ ជួប ហេងពេងលាភ អាយុ១៦ឆ្នាំ និង៥-ឈ្មោះ ខន វណ្ណា អាយុ១៧ឆ្នាំ ។
យោងតាមរបាយការណ៍អធិការក្រុងខាងលើបានឲ្យដឹងថា ក្រុមក្មេងអន្ធពាលទាំង០២ក្រុមនេះ បានប៉ះទង្គិចគ្នា (ដេញវាយគ្នា) កាលពីវេលាម៉ោងរំលងអធ្រាត្រឈានចូលថ្ងៃទី០៣ កុម្ភៈ នៅចំណុចស្ពានថ្មី ខាងមុខសាលាខេត្ត ស្ថិតក្នុងភូមិកម្មករ សង្កាត់ស្វាយប៉ោ ក្រុងបាត់ដំបង ។
ក្រោយពីទទូលព័ត៌មានពីប្រជាពលរដ្ឋ កម្លាំងជំនាញអធិការក្រុងបាត់ដំបង បានចុះស្រាវជ្រាវ រហូតដល់ថ្ងៃទី ០៤ កុម្ភៈ ទើបកម្លាំងជំនាញ កំណត់បាននូវមុខសញ្ញា និងតាមឃាត់ខ្លួនជនទំនើងទាំង០២ក្រុមបានជាបន្តបន្ទាប់ចំនួន០៧នាក់។ លោក ពេជ្រ សារ៉ែន បានប្រាប់ថា បើតាមការស្រាវជ្រាវជនទំនើងទាំង០២ក្រុមនេះ បានវាយគ្នាទៅវិញទៅមក គ្មានភាគីណាមួយជាភាគីរងគ្រោះ
ទេ ។
ពាក់ព័ន្ធនឹងសកម្មភាពក្រុមក្មេងទំនើងនេះ លោកអធិការក្រុងបានអំពាវនាវដល់ក្រុមយុវជន ឬក្រុមក្មេងទំនើងត្រូវបញ្ឈប់សកម្មភាពប្រព្រឹត្តល្មើសច្បាប់ ទោះក្នុងរូបភាពណាក៏ដោយ ដើម្បីចៀសវាងការប្រឈមនឹងផ្លូវច្បាប់ ។
ទោះយ៉ាងណា បើតាមលោកឈឿង គឹមសុង ស្នងការរងទទូលផែនព្រហ្មទណ្ឌបានបញ្ជាក់ថា ក្រុមក្មេងទំនើងទាំង០២ក្រុមនេះ ត្រូវលោកស្នងការខេត្ត បញ្ជាឲ្យកសាងសំណុំរឿងបញ្ជូនទៅតុលាការ នៅព្រឹកថ្ងៃទី០៥ កុម្ភៈ នេះ ដើម្បីចាត់ការតាមផ្លូវច្បាប់ហើយ ៕
ចែករំលែកព័តមាននេះ