រាជធានីភ្នំពេញ ៖ ក្រោយប្រកាសចែកផ្លូវជាមួយលោក Jurgis Kalns គ្រូបង្វឹកជនជាតិឡាតវី មកពីទ្វីបអឺរ៉ុប ក្លិបបាល់ទាត់វិសាខាបានដាក់ការរំពឹងខ្ពស់ក្នុងការស្វែងរកគ្រូជនជាតិអាសុីដើម្បីជំនួសតំណែងដ៏សំខាន់មួយនេះ។ នេះបើតាមការលើកឡើងរបស់កញ្ញាអ៊ូ បញ្ញាសុកិត្យា…
រាជធានីភ្នំពេញ ៖ ក្រោយប្រកាសចែកផ្លូវជាមួយលោក Jurgis Kalns គ្រូបង្វឹកជនជាតិឡាតវី មកពីទ្វីបអឺរ៉ុប ក្លិបបាល់ទាត់វិសាខាបានដាក់ការរំពឹងខ្ពស់ក្នុងការស្វែងរកគ្រូជនជាតិអាសុីដើម្បីជំនួសតំណែងដ៏សំខាន់មួយនេះ។ នេះបើតាមការលើកឡើងរបស់កញ្ញាអ៊ូ បញ្ញាសុកិត្យា នាយិការគ្រប់គ្រងក្លិបបាល់ទាត់វិសាខានៅក្នុងសន្និសីទសារព័ត៌មានកាលពីល្ងាចថ្ងៃទី៣ខែកុម្ភះ នៅក្លិបបាល់ទាត់វិសាខា។
កញ្ញាអ៊ូ បញ្ញាសុកិត្យា បានឱ្យដឹងថា មូលហេតុដែលនាំឱ្យក្លិបវិសាខារៀបចំធ្វើសន្និសីទសារព័ត៌មាននេះឡើងដើម្បីស្រាយចម្ងល់ផ្សេងៗដែលបណ្ដាញសង្គមមួយចំនួនមានការមិនអស់ចិត្តពីរឿងការចែកផ្លូវគ្នារវាងគ្រូជនជាតិអឺរ៉ុបមួយនេះជាមួយក្លិបបាល់ទាត់វិសាខានៅមុនបញ្ចប់កិច្ចសន្យា ។ កញ្ញាបានលើកឡើងថាជារឿងធម្មតាទេ ក្នុងនាមជាប្ដីប្រពន្ធបើរស់នៅមិនចុះសម្រុងនឹងគ្នា វិធីម្យ៉ាងគត់មានតែចែកផ្លូវគ្នាដើរប៉ុណ្ណោះ ។ កញ្ញាមិនបានបន្ទោសថា ខាងត្រូវខាងណាខុសនោះឡើយព្រោះថាទាំងសងខាងប្រកាន់នូវគោលការណ៍រៀងៗខ្លួន។
ម្យ៉ាងវិញទៀត រយៈពេលកន្លងមកខាងក្លិបមិនដែលលូកដៃក្នុងការដោះដូរកីឡាករ ដែលនាំឱ្យមានការប៉ះពាល់ទៅដល់ការងារបច្ចេកទេសរបស់គ្រូបង្វឹកនេះទេ ។ ការបញ្ចប់កិច្ចសន្យានេះដែរ កញ្ញាក៏បានទទួលស្គាល់នូវការខាតបង់ផលប្រយោជន៍យ៉ាងធំធេងព្រោះបើយើងយកអ្នកណាម្នាក់ជាគ្រូឬជាកីឡាករសុទ្ធតែជាការបណ្ដាក់ទុន ហើយសម្រាប់ការបណ្ដាក់ទុនកន្លងមកនេះទៀតគឺស្មើនឹងសូន្យ ។ ដូច្នេះសម្រាប់ការចាកចេញមួយនេះអ្នកដែលទទួលបន្ទុកធ្ងន់គឺខាងក្លិប យើងមានការបាត់បង់គ្រប់យ៉ាងបូករួមទាំងស្មារតីក្រុមឡើងទៅ។
កញ្ញាអ៊ូ បញ្ញាសុកិត្យា ទទួលស្គាល់ថា កន្លងមកក្លិបបាល់ទាត់វិសាខាធ្លាប់រងនូវការរិះគន់លើបញ្ហាផ្សេងៗច្រើនជាងគេនៅលើបណ្ដាញសង្គម ប៉ុន្តែក្លិបមិនដែលបានចេញមកបកស្រាយនោះទេ ដោយសារតែក្លិបប្រកាន់គោលជំហររក្សាសុភាពរាបសារ តាមអត្តចរិកថ្នាក់ដឹកនាំកំពូលរបស់ក្លិប និងមានចក្ខុវិស័យវែងឆ្ងាយជាជាងយកបញ្ហាមកគិត ។
កញ្ញាអ៊ូ បញ្ញាសុកិត្យា សំណូមពរទៅដល់មហាជនអ្នកគាំទ្រវិស័យកីឡាបាល់ទាត់ទាំងអស់សូមចូលរួមគាំទ្រវិស័យបាល់ទាត់ខ្មែរយើងឱ្យបានច្រើន ជៀសវាងការបន្តុះបង្អាប់ដែលនាំឱ្យកីឡាករមានការបាក់ទឹកចិត្ត មិនថាក្លិបឬក្រុមជម្រើសជាតិនោះទេ។ យើងម្នាក់ៗសុទ្ធតែចង់ឱ្យវិស័យកីឡាបាល់ទាត់កម្ពុជាមានការរីកចម្រើនស្មើមុខស្មើមាត់នៅលើឆាកអន្តរជាតិ ទោះបីថ្ងៃហ្នឹងចាញ់ ថ្ងៃស្អែកយើងឈ្មះក៏មិនដឹង ព្រោះលទ្ធផលយ៉ាងណាយើងមិនដឹងនោះទេ។ យើងមិនមែនជាអ្នកដែលនៅលើទីលានប្រកួតជាក់ស្ដែង ប៉ុន្តែអ្វីដែលសំខាន់កុំបំបាក់ទឹកចិត្ត។បើនិយាយពីការចែកផ្លូវគ្នាជាមួយលោកJurgis Kalnsវិញ ក្លិបមានភាគរយខ្ពស់ក្នុងការសម្លឹងមើលគ្រូបង្ហាត់មកពីទ្វីបអាស៊ីជំនួស ព្រោះជនជាតិអាស៊ីដូចគ្នាមានការយល់ចិត្តគ្នា បូករួមទាំងបច្ចេកទេសហ្វឹកហាត់ឡើងទៅ។
គួររម្លឹកថា លោកJurgis Kalnsជនជាតិឡាតវី ត្រូវបានប្រកាសតែងតាំងជាគ្រូបង្ហាត់ក្រុមបាល់ទាត់ឈុតធំក្លិបវិសាខានៅថ្ងៃទី១៦ ខែមិថុនា ឆ្នាំ២០២៤ តែគេមិនដឹងថា កិច្ចសន្យានេះមានរយៈពេលប៉ុន្មានឆ្នាំនោះទេ ។ គេគ្រាន់តែដឹងថា បានចែកផ្លូវគ្នានៅត្រឹមថ្ងៃទី៣១ ខែមករា ឆ្នាំ២០២៥ ក្រោយពីក្រុមវិសាខាប្រកួតចាញ់ក្រុមអាយអេសអាយដង្កោសែនជ័យក្នុងលទ្ធផល៤-២ នៃព្រឹត្តិការណ៍លីគកំពូលកម្ពុជាកាលពីថ្ងៃទី២៥ ខែមករា ឆ្នាំ២០២៥ ធ្វើឱ្យវិសាខាស្ថិតនៅលេខរៀងទី៣ក្នុងតារាងដែលមាន១១ក្រុមចូលរួម ។ ក្នុងចំណោម១៨ប្រកួតវិសាខាមាន៣៨ពិន្ទុ ខណៈភ្នំពេញក្រោនឈរកំពូលតារាងប្រកួតបាន១៧លើកមាន៤៤ពិន្ទុ និងព្រះខ័នរាជស្វាយរៀងឈរនៅលេខរៀង
ទី២មាន៤៣ពិន្ទុក្នុងការប្រកួត១៧លើក ៕
ចែករំលែកព័តមាននេះ