ខេត្តកំពង់ស្ពឺ ៖​ កម្លាំងអាវុធហត្ថក្រុងច្បារមន​ បានធ្វើការស្រាវជ្រាវរហូតឈានដល់បំបែកសំណុំរឿងករណីជួញដូរគ្រឿងញៀនដ៏សកម្មមួយករណី​ ដោយជនសង្ស័យម្នាក់យកមុខរបរពុះអុសលក់បាំងមុខ​ តែធាតុពិតជាមេក្លោងជួញដូរ​ និងចែកចាយគ្រឿងញៀនដ៏សកម្មនៅក្រុងច្បារមន ។

លោកវរសេនីយ៍ត្រី ធី ឆៃ មេបញ្ជាការមូលដ្ឋានកងរាជអាវុធហត្ថក្រុងច្បារមន​ បានឱ្យដឹងនៅរសៀលថ្ងៃទី៣០ ខែមករា ឆ្នាំ២០២៥​នេះថា កម្លាំងជំនាញបានធ្វើការស្រាវជ្រាវ​ និងបានកំណត់មុខសញ្ញាលើអ្នកពុះអុសលក់ហើយឈានដល់ការឃាត់ខ្លួនមនុស្ស​ ២នាក់​ នៅវេលាម៉ោង​ ១០និង១០នាទី ព្រឹកថ្ងៃទី៣០ ខែមករា ឆ្នាំ២០២៥ និងរឹបអូសវត្ថុតាងគ្រឿងញៀនបានចំនួន ៣កញ្ចប់ ធំល្មម និងទូរស័ព្ទ២គ្រឿង។

មន្ត្រីកងរាជអាវុធហត្ថបានបញ្ជាក់ថាជនសង្ស័យទាំង២នាក់ ក្នុងនោះម្នាក់ឈ្មោះ ប៉ាង តៃ ភេទប្រុស អាយុ៤១ឆ្នាំ មុខរបរពុះអុស ទីលំនៅបច្ចុប្បន្ន ភូមិរលួស សង្កាត់ច្បារមន ក្រុងច្បារមន ខេត្តកំពង់ស្ពឺ និងម្នាក់ទៀតមានឈ្មោះ ម៉ែន មករា ហៅជ្រូក ភេទប្រុស អាយុ៤០ឆ្នាំ ជាអ្នកនៅពីក្រោយ បានឃាត់ខ្លួន នៅភូមិព្រៃក្តី សង្កាត់ស្វាយក្រវ៉ាន់ ក្រុងច្បារមន ខេត្តកំពង់ស្ពឺ។

បច្ចុប្បន្នក្រុមជនសង្ស័យទាំង២នាក់នេះ​ ត្រូវបានបញ្ជូនបន្តទៅមន្ទីរជំនាញនៃបញ្ជាការកងរាជអាវុធហត្ថខេត្ត​ ដើម្បីចាត់ការបន្តតាមតាមផ្លូវច្បាប់៕